ايشا بەستاەۆا: «بىزدە مەيىربيكەلەر دە قابىلداۋ جۇرگىزەدى»
استانا قالاسىنداعى «دەمەۋ» وتباسى وقۋ-تاجىريبەلىك مەديتسينالىق كومەك كورسەتۋ ورتالىعى باس دارىگەرىنىڭ ورىنباسارى وقىرمان سۇراقتارىنا جاۋاپ بەردى.
سەرىك ايداربەكۇلى:
– قازىر استانادا ەمحانانى تاڭداۋ بويىنشا تىركەۋ ناۋقانى ءجۇرىپ جاتىر دەگەندى ەستىدىك. ول قاي ۋاقىتقا دەيىن جالعاسادى؟
– 2010 جىلدىڭ 1 قاڭتارىنان باستاپ ەلىمىزدە بىرىڭعاي ۇلتتىق دەنساۋلىق ساقتاۋ جۇيەسى ەنگىزىلگەن بولاتىن. سونىڭ اياسىندا ۇستىمىزدەگى جىلدىڭ 15 قىركۇيەگىنەن باستاپ تۇرعىنداردىڭ مەديتسينالىق ۇيىمدى ەركىن تاڭداۋىنا مۇمكىندىك جاسالىپ وتىر. العاشقى مەديتسينالىق-سانيتارلىق جاردەم كورسەتەتىن ۇيىمدارعا تىركەۋ ناۋقانى 15 قاراشاعا دەيىن جۇرگىزىلەدى. وسىعان وراي, قازاقستان رەسپۋبليكاسىنىڭ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنىڭ 88-بابىنا سايكەس, قالانىڭ ءاربىر تۇرعىنى قالاۋى بويىنشا ۇناعان ەمحاناسىندا نەمەسە العاشقى مەديتسينالىق- سانيتارلىق جاردەم (امسج) ورتالىعىندا تىركەلۋگە قۇقىلى. قازاقستان رەسپۋبليكاسى ۇكىمەتىنىڭ 2011 جىلعى 1 قاراشاداعى «باستاپقى مەديتسينالىق-سانيتارلىق كومەك كورسەتۋ ءتارتىبىن بەكىتۋ تۋرالى» №1263 قاۋلىسىن نەگىزگە الا وتىرىپ, ءوز ەركىڭىزبەن ەمحاناعا تىركەلگەننەن كەيىن ءسىز سول مەكەمەنىڭ قىزمەتىنە جۇگىنەتىن بولاسىز. بۇل جەردە ۋچاسكەلىك تەراپەۆتەر, پەدياترلار, جالپى پراكتيكا دارىگەرلەرى, فەلدشەرلەر, اكۋشەرلەر مەن مەيىربيكەلەر سىزگە مەديتسينالىق-سانيتارلىق كومەك كورسەتەدى. ءبىزدىڭ ەلدە ءاربىر ازامات قازاقستان رەسپۋبليكاسى ۇكىمەتىنىڭ 2009 جىلعى 15 جەلتوقسانداعى № 2136 قاۋلىسىمەن بەكىتىلگەن تەگىن مەديتسينالىق كومەكتىڭ كەپىلدىك بەرىلگەن كولەمىنىڭ تىزبەسىنە سايكەس ءوزى تىركەلگەن ەمحانادا مەديتسينالىق كومەكتى تەگىن الا الادى.
ايگۇل ساعىندىققىزى:
– «دەمەۋ» وتباسىلىق دەنساۋلىق ورتالىعىندا قانداي الەۋمەتتىك قىزمەتتەر كورسەتىلەدى؟
– ءبىزدىڭ ورتالىقتا تۇرعىندارعا الەۋمەتتىك ماڭىزدى اۋرۋلار ماسەلەسى بويىنشا جەكە كەڭەس بەرۋ, ياعني پروفيلاكتيكالىق ارالاسۋ, اڭگىمە نەمەسە ۇسىنىمدار, دەنساۋلىق مەكتەپتەرى, پاتسيەنت ءومىرىنىڭ الەۋمەتتىك ءار الۋان قىرلارى بويىنشا پسيحوالەۋمەتتىك كەڭەستەر, مىنەز-قۇلىق جەلىسىن وزگەرتۋ بويىنشا تۇزەتۋ جانە ت.ب. قىزمەت تۇرلەرى كورسەتىلەدى. بۇلاردى جۇزەگە اسىرۋ بارىسىندا قازاقستان رەسپۋبليكاسىنىڭ 2008 جىلعى «ارنايى الەۋمەتتىك قىزمەتتەر تۋرالى» زاڭىن جانە باسقا دا نورماتيۆتىك قۇجاتتاردى باسشىلىققا الامىز.
سونداي-اق, ورتالىعىمىزدا دەنساۋلىق مەكتەپتەرى بار. وندا ءبىزدىڭ ماماندار ءارتۇرلى توپتار بويىنشا ترەنينگتەر ۇيىمداستىرىپ وتىرادى. ءتىپتى, قاجەت بولعان جاعدايلاردا كەيبىر اۋرۋلاردىڭ ۇيىنە بارىپ, ولاردىڭ تۇرمىسىمەن, الەۋمەتتىك جاعدايلارىمەن تانىسۋدىڭ ءمۇمكىندىكتەرى دە قاراستىرىلعان.
ءبىز كۇن سايىن تاڭەرتەڭگى ساعات 9-دان كەشكى 18.00-گە دەيىن تۇرعىندارعا الەۋمەتتىك قىزمەت كورسەتەمىز. ال, كۇندىزگى ساعات 14.00 مەن 15.00 ارالىعىندا تۇسكى ءۇزىلىس. ورتالىقتاعى دەنساۋلىق مەكتەپتەرى كەستە بويىنشا كۇن سايىن جۇمىس ىستەيدى.
مارال بەيبىتقىزى:
– ءسىزدىڭ مەكەمەدە ءتۇرلى اۋرۋلاردىڭ الدىن الۋعا باعىتتالعان ەكپەلەر جاسالا ما؟ ولاردى الۋ ءۇشىن ورتالىققا قاي كۇندەرى بارعانىم دۇرىس؟
– ءيا, ونداي ەكپەلەر ءبىزدىڭ ورتالىقتا اپتانىڭ بەس كۇنىندە جاسالادى. ماسەلەن, دۇيسەنبى كۇنى – بتسج, سەيسەنبى, سارسەنبى, بەيسەنبى كۇندەرى – باسقا بارلىق پروفيلاكتيكالىق ەكپەلەردى الۋىڭىزعا بولادى. ال, مانتۋ سىناماسىن جاساتۋ ءۇشىن جۇما كۇنى كەلگەنىڭىز ءجون.
سالتانات قايىرجانقىزى:
– استاناعا باسقا قالادان كوشىپ كەلىپ ەدىك. ءۇش جاسار بالام بار. ءسىزدىڭ ورتالىقتا كىشكەنتاي بالالارعا تەگىن ءدارى-دارمەكتەر بەرىلە مە ؟
– الدىمەن ءسىز ءبىزدىڭ ورتالىققا كەلىپ, تىركەلۋىڭىز كەرەك. ول ءۇشىن بۇعان دەيىن قارالعان ەمدەۋ مەكەمەسىنەن تىركەۋدەن شىققانىڭىز جونىندە تالون الىڭىز. قازاقستان رەسپۋبليكاسى دەنساۋلىق ساقتاۋ مينيسترلىگىنىڭ 2011 جىلعى 4 قاراشاداعى №786 بۇيرىعىنا سايكەس ورتالىعىمىزدا تىركەۋدە تۇرعان بەس جاسقا دەيىنگى, ال ديسپانسەرلىك ەسەپتە تۇرعان 18 جاسقا دەيىنگى بالالارعا ءدارى-ءدارمەكتەر تەگىن بەرىلەدى.
التىن بالاباەۆا:
– ءسىزدىڭ ورتالىق قالاداعى باسقا ەمحانالارعا مۇلدە ۇقسامايدى. نەگە؟
– ءيا, ءوزىڭىز بايقاعانداي, ءبىزدىڭ ورتالىقتا باسقا ەمحانالارداعىداي نەفرولوگ, ۋرولوگ, گينەكولوگ جانە باسقا دا ماماندار جوق. مۇندا تەك وتباسىلىق دارىگەرلەر جانە مەيىربيكەلەر عانا قابىلداۋ جۇرگىزەدى. ولار بىرنەشە باعىتتا جۇمىس ىستەيدى, سوندىقتان دا بىزدەگى مامان دارىگەرلەر وتباسىنىڭ بارلىق مۇشەلەرىن تۇگەل تەكسەرەدى. دەمەك, وتباسىلىق نەمەسە جالپى تاجىريبەلى دارىگەرلەر بالالاردى دا, ەرەسەك ادامداردى دا, ياعني وتباسى مۇشەلەرىن تەگىس قارايدى. بۇل وتباسى مۇشەلەرىنە دە, دارىگەرگە دە وتە ىڭعايلى. ويتكەنى, باسقا ەمحانالاردا بالالاردى پەدياتر, ۇلكەندەردى تەراپەۆت قاراسا, جالپى ءتاجىريبەلى دارىگەر وتباسىنا بارعان كەزدە ولاردىڭ بارلىعىنا بىردەي مەديتسينالىق كومەك كورسەتەدى. وسى ارقىلى ءبىز وتباسى مۇشەلەرىنىڭ تۇرمىس جاعدايىن, الەۋمەتتىك احۋالىن ءبىلىپ قانا قويماي, ولارعا پسيحولوگيالىق, الەۋمەتتىك كومەك كورسەتۋ ءۇشىن نەنى باسىمدىققا الۋ كەرەكتىگىن, جالپى اۋرۋدىڭ قالاي قاراي بەت الىپ بارا جاتقانىن قاداعالاپ, باقىلاپ وتىرامىز. دەگەنمەن, ءبىزدىڭ ورتالىقتىڭ قالاداعى باسقا ەمحانالارمەن ۇقساس جاقتارى دا جوق ەمەس. مىسالى, بىزدە دە تۇرعىندارعا العاشقى مەديتسينالىق كومەكتىڭ بارلىق ءتۇرى كورسەتىلەدى.
سونىمەن قاتار «دەمەۋ» مەديتسينالىق كومەك كورسەتۋ ورتالىعىندا مەيىربيكەلەر باسقا ەمحانالارداعىداي دارىگەرمەن بىرگە وتىرمايدى. بىزدە مەديتسينالىق بيكەلەر ءوز بەتىمەن قابىلداۋ جۇرگىزەدى. ياعني, جەكە ناۋقاستىڭ ءارى حالىقتىڭ دەنساۋلىعىنا بايلانىستى كوپتەگەن ماسەلەلەردى مەيىربيكە ءوز بەتىمەن شەشە الادى. بۇل دارىگەر مەن پاتسيەنتتىڭ ۋاقىتىن ۇنەمدەيدى, وتباسىلىق دارىگەر قابىلداۋىنىڭ قۇپيالىلىعى ساقتالادى. وسى ارقىلى مەيىربيكەلەردىڭ كاسىبي جاعىنان تالداۋ جانە كلينيكالىق ويلاۋ قابىلەتتەرى داميدى. شەتەلدە مەيىربيكە دەربەس ماماندىق بولىپ ەسەپتەلەدى جانە ولار جەكە قابىلداۋ جۇرگىزەدى.
مايرا كوكەنوۆا:
– جەتكىنشەك قىزىم بار. سوڭعى كەزدە اشۋلانشاق, كەيدە ءتىپتى تۇيىق بوپ بارا جاتقانداي كورىنەدى, ەسكەرتپەلەرىمە قۇلاق اسپايدى. پسيحولوگتىڭ كومەگىنە جۇگىنۋىم كەرەك پە؟
– ورتالىعىمىزدا پسيحولوگيالىق قىزمەت ماماندارى جۇمىس ىستەيدى. ءسىز سولارمەن حابارلاسىپ كورىڭىز. ەگەر ءبىزدىڭ ورتالىقتا ءتىركەلگەن بولساڭىز, تەلەفون ارقىلى قابىلداۋعا جازىلىپ, پسيحولوگ ماماننىڭ كەڭەسىن تەگىن الا الاسىز. ول ءۇشىن 27-45-15 تەلەفونىنا حابارلاسىپ, ماماننىڭ قابىلداۋىنا جازىلىڭىز نەمەسە ءوز وتباسىلىق دارىگەرىڭىز ارقىلى حابارلاسىڭىز. ال, ەگەر ءبىزدىڭ ورتالىققا ءتىركەلمەگەن بولساڭىز, سىزگە تەك اقىلى نەگىزدە عانا قىزمەت كورسەتىلەدى. سونداي-اق, ءبىزدىڭ ورتالىقتا «ەر مەن ايەل», «بالانى قالاي تاربيەلەۋ كەرەك؟», «وزىڭە-ءوزىڭ سەنىمدى بولىپ, ماقساتتارعا جەتۋدىڭ جولدارى» سياقتى كوپتەگەن اقىلى پسيحولوگيالىق ترەنينگتەر وتكىزىلىپ تۇرادى. جالپى, ونعا تولماعان بالالارعا اتا-انا رۇقساتىنسىز پسيحولوگ كەڭەس بەرە المايدى. ال, ون ءۇش جاستان اسقان جەتكىنشەكتەر پسيحولوگقا وزدىگىنەن جۇگىنە الادى.
سايلاۋ مەيىربەك:
– وسى وتباسىلىق دارىگەر نەمەسە سوڭعى كەزدە ءجيى ايتىلىپ ءجۇرگەن جالپى تاجىريبەلى دارىگەر دەگەن كىم؟
– وتباسىلىق دارىگەر نەمەسە جالپى ءتاجىريبەلى دارىگەر – بۇل دەنساۋلىق ساقتاۋ سالاسىنىڭ العاشقى باسپالداعىنداعى مامان, ول ادام دەرتىن كەشەندى قاراپ, تەرەڭدە جاتقان سەبەبىن تۇسىنۋگە تىرىسادى. ياعني, وتباسىلىق دارىگەر وتباسىلىق ەرەكشەلىكتەردى, تۇقىم قۋالاۋ فاكتورىن, تەگىن, الەۋمەتتىك جاعدايىن زەردەلەيدى جانە بالالار مەن ەرەسەكتەردى بايقاۋ بويىنشا كلينيكالىق بىلىمگە يە.
گۇلبارشىن وكەشقىزى