اپتا باسىندا ەكسپو قالاشىعىنداعى NOMAD city hall-دا الەۋمەتتىك قورعاۋ جۇيەسى قىزمەتكەرلەرىنىڭ كۇنىنە وراي سالتاناتتى جيىن ءوتتى. Nur Otan پارتياسىنىڭ قالالىق فيليالىنىڭ قولداۋىمەن وتكەن شارا بارىسىندا نۇر-سۇلتان قالاسىنىڭ «الەۋمەتتىك قورعاۋ جۇيەسىنىڭ ۇزدىگى» بايقاۋىنىڭ جەڭىمپازدارى ماراپاتتالدى.
جيىندى نۇر-سۇلتان قالالىق ءماسليحاتىنىڭ حاتشىسى ەرلان كاناليموۆ العى سوزىمەن اشتى.
– الەۋمەتتىك قورعاۋ جۇيەسى قىزمەتكەرلەرىنىڭ كاسىبي مەرەكەسىن اتاپ ءوتۋ باستاماسى وسىدان تۋرا 10 جىل بۇرىن قولعا الىندى. ەلباسىنىڭ 2011 جىلعى قازانداعى جارلىعىمەن الەۋمەتتىك قورعاۋ جۇيەسى قىزمەتكەرلەرىنىڭ كۇنى رەسمي بەكىتىلدى. بۇل – ادامگەرشىلىكتى تۋ ەتكەن كاسىپ وكىلدەرىنىڭ ەرەن ەڭبەگىن ەسكەرىپ, قۇرمەت كورسەتۋدىڭ بەلگىسى. سالا ماماندارى قاشان دا ءومىردىڭ قيىندىعىمەن بەتپە-بەت كەلگەن ءتۇرلى تاعدىر يەسىنە جاناشىرلىق تانىتىپ كەلەدى. ولار قاي كەزدە بولماسىن جەتىم جانە ەرەكشە قاجەتتىلىگى بار بالالارعا, كوپبالالى انالارعا, جالعىزباستى قارتتارعا كومەك كورسەتۋگە دايىن.
قازىرگى تاڭدا نۇر-سۇلتان قالاسىندا 2 مىڭنان استام الەۋمەتتىك قورعاۋ جۇيەسىنىڭ قىزمەتكەرى كومەككە مۇقتاج 150 مىڭداي ازاماتقا قىزمەت كورسەتۋدە.
قوعامنىڭ تۇراقتى دامۋى ازاماتتاردىڭ الەۋمەتتىك قورعالۋىنا بايلانىستى. بۇل تۇرعىدان الىپ قاراعاندا ەلوردالىق الەۋمەتتىك سالا قىزمەتكەرلەرى مەملەكەت پەن قولداۋدى قاجەت ەتەتىن ازاماتتار اراسىنداعى دانەكەر بولىپ كەلەدى, – دەدى ە.كاناليموۆ.
مۇنان سوڭ ول الەۋمەتتىك قورعاۋ جۇيەسىنىڭ ءبىر توپ قىزمەتكەرىن قالا اكىمىنىڭ قۇرمەت گراموتاسىمەن جانە قالالىق ءماسليحات حاتشىسىنىڭ, قالا اكىمى ورىنباسارىنىڭ العىس حاتتارىمەن ماراپاتتادى.
Nur Otan پارتياسىنىڭ قالالىق فيليالى توراعاسىنىڭ ءبىرىنشى ورىنباسارى ساقتاعان سادۋاقاسوۆ تا سالا ماماندارىن باس پارتيا اتىنان كاسىبي مەرەكەمەن قۇتتىقتاپ, قالالىق «الەۋمەتتىك قورعاۋ جۇيەسىنىڭ ۇزدىگى» بايقاۋىنىڭ جەڭىمپازدارىنىڭ ەسىمىن جاريالادى.
[smartslider3 slider=685]
كونكۋرستىق كوميسسيانىڭ شەشىمىمەن «الەۋمەتتىك قورعاۋ سالاسىنداعى ۇزدىك مەملەكەتتىك قىزمەتشى» اتالىمى بويىنشا سارىارقا اۋداندىق الەۋمەتتىك تولەمدەر ءبولىمىنىڭ باسشىسى سالتانات ستانباەۆا ماراپاتتالدى. «الەۋمەتتىك قورعاۋ سالاسىنداعى ۇزدىك ازاماتتىق قىزمەتكەر» اتاعى «نۇرلى جۇرەك» الەۋمەتتىك قىزمەت كورسەتۋ ورتالىعىنىڭ دەنە شىنىقتىرۋ ءپانىنىڭ مۇعالىمى كلارا يمەنالينوۆاعا بۇيىردى. «شاراپات» الەۋمەتتىك قىزمەت كورسەتۋ ورتالىعىنىڭ قىزمەتكەرى تانشولپان بايەكەنوۆا «ۇزدىك الەۋمەتتىك قىزمەتكەر» اتاندى. «ۇزدىك الەۋمەتتىك قورعاۋ مەكەمەسى» اتالىمىندا «قامقور» الەۋمەتتىك قىزمەت كورسەتۋ ورتالىعى ۇزدىك شىقتى. «ۇزدىك الەۋمەتتىك ۇكىمەتتىك ەمەس ۇيىم» اتاعىن اسەل جاسان جەتەكشىلىك جاسايتىن «بالام-اي» مۇگەدەك بالالاردى قولداۋ قايىرىمدىلىق قورى ەنشىلەدى. «ۇزدىك اقپاراتتىق جۇمىس» ارنايى اتاعىنا «جانۇيا» وتباسى ينستيتۋتىن قولداۋ ورتالىعى يەلىك ەتتى.
جەڭىمپازدارعا ديپلومدارمەن بىرگە باعالى سىيلىقتار تابىستادى. الەۋمەتتىك قورعاۋ جۇيەسى قىزمەتكەرلەرىن «قىزمەت» مەملەكەتتىك, بانك مەكەمەلەرى جانە قوعامدىق قىزمەت كورسەتۋ قىزمەتكەرلەرىنىڭ سالالىق كاسىپوداعى دا قۇتتىقتاپ, ۇيىم اتىنان جەكەلەگەن ازاماتتارعا قۇرمەت كورسەتتى.
جيىن سوڭى ەسترادا جۇلدىزدارى مەن ەلوردالىق ونەر ۇجىمدارىنىڭ كونتسەرتتىك باعدارلاماسىنا جالعاستى.
