التىن ماحانبەتوۆا, ءانشى-پروديۋسەر: «ءانشى بولعىم كەلەدى» باعدارلاماسى — مەنىڭ تولقۇجاتىم»

– ماماندىعىڭىزدىڭ التىن قازىعى ۇستازدىق ەكەنى بەلگىلى. دەسە دە, قالىڭ قازاق ءسىزدى «ءانشى بولعىم كەلەدى» اتتى جوبا ارقىلى تانيدى. بۇل باعدارلامانىڭ يدەياسى كىمگە تيەسىلى؟

– ءيا, «ءانشى بولعىم كەلەدى» بالالار باعدارلاماسى مەنىڭ تولقۇجاتىم دەسەم دە  بولادى.  تۇڭعىش  رەت 2002 جىلى ناۋرىز ايىندا «الماتى وڭتۇستىك استانا» تەلەارناسىندا جارىققا شىقتى. ەفيردە 10 جىل ءجۇرىپ,  جاس ونەرپازدارمەن بىرگە ەرجەتكەن  باعدارلامام ونەرگە ىڭكار مىڭداعان ورەننىڭ «العاشقى ساحنا مەكتەبى» بولا ءبىلدى دەپ ويلايمىن. العاش بالالار مۋزىكالىق باعدارلاماسىن  اشۋ  جانە ونىڭ تاقىرىبى جايلى ويلانعان ساتتە, بىردەن ويىما ورالعانى   ءوزىمنىڭ كىشكەنتاي كۇنىمدەگى «ءانشى بولعىم كەلەدى» دەگەن ارمانىم بولاتىن. سول بالالىق  قيالىما ءوزىمنىڭ جوبام ارقىلى قايتا ورالىپ,  بالالارمەن بىرگە «ءانشى بولعىم كەلەدىنى»  شىرقاپ جۇرگەندە, كوزدى اشىپ-جۇمعانشا 10 جىل وتە شىققانىن بايقاماي دا قالىپپىن.

– ونجىلدىق تاريحى بار باعدارلامامەن اتتاس كىتاپ تا جارىق كورگەن ەكەن. ول كىتاپتىڭ ەرەكشەلىگى نەدە ءارى تارالىمى قالاي بولىپ جاتىر؟

– قۇلاعى تۇرىك, كوزى قاراقتى قاۋىمعا بەلگىلى, 2009 جىلى ناۋرىز ايىندا  «ءانشى بولعىم كەلەدى» اتتى بالالار مۋزىكالىق كومەدياسىنىڭ تۇساۋىن كەسكەن بولاتىنمىن. ارينە, بالا جانىن تۇسىنەتىندەر  جانە بالالار ءۇشىن  بۇل تۋىندى  قىزىقتى فيلم بولدى دەپ ايتا الامىن. قارجىنىڭ تاپشىلىعىنا بايلانىستى جارناماسى ازداۋ بولدى. دەگەنمەن وزىمىزگە جەتكىلىكتى كورەرمەندەر اۋديتورياسىن جيناي بىلدىك. سىنشىلار تاراپىنان وڭ باعا بەرىلدى. سونداي-اق, كىتابىم  دا «ءانشى بولعىم كەلەدى» دەپ اتالدى. ولاي بولاتىن سەبەبى, فيلمدە دە, كىتاپتا دا مەنىڭ بالالارعا ارناعان شىعارماشىلىق قولتاڭبام بار.   ءان جيناعىمدا  بەلگىلى, سونداي-اق,  جاس  اقىنداردىڭ ولەڭدەرىنە جازىلعان بالالارعا ارناعان 94  ءانىم ءماتىنى  جانە نوتاسىمەن, وعان قوسا وسى اندەردى ورىنداۋشى ءانشى-ونەرپاز شاكىرتتەرىمنىڭ فوتولارىمەن  «ونەر»  باسپاسىنان  جارىق كوردى.  ءارى وعان قوسىمشا رەتىندە اندەرىمنىڭ ءۇنتاسپاسى مر-3 تۇرىندە جارىققا شىقتى. قازىر  «اتامۇرا» , «ونەر» باسپالارىنان تارالىپ جاتىر.

– بالالار شىعارماشىلىعىنا بەت بۇرعانىڭىزعا ون جىلدان استى. قانداي وي ءتۇيدىڭىز؟ اتالعان سالانىڭ كەمشىن تۇستارى مەن جەتىستىگى دەپ نەنى اتار ەدىڭىز؟

– بالالار شىعارماشىلىعىنا تۇبەگەيلى بەت بۇرعان العاشقى جىلدارىمدا   مەنىڭ باعدارلامام ەفيردەن اپتا سايىن كورەرمەنمەن قاۋىشاتىن جالعىز بالالار  بايقاۋى بولاتىن.  قۋاناتىنىم – باعدارلاما سوڭىنان  كوپتەگەن بالالار حابارلارى دۇنيەگە كەلدى. تاعى ءبىر جەتىستىگىم – «ءانشى بولعىم كەلەدى»   بالالار اندەرىن تۋدىرۋعا  سازگەرلەر مەن اقىندارعا  شابىت بەردى.   قازىر بىزدە بالالار اندەرى بار, بالا بالاشا ءان سالا الادى. جەتە الماي جۇرگەن كەمشىن تۇسى دەپ قارجى ماسەلەسىن ايتار ەدىم.  ساپالى دۇنيەگە مىندەتتى تۇردە قارجى جەتكىلىكتى تۇردە قۇيىلۋى ءتيىس. پروديۋسەرلىك ورتالىقتى اشقان ساتتەن باستاپ, الدىمەن اللانىڭ, ودان سوڭ حالىقتىڭ قولداۋىمەن ءوز كۇنىمىزدى ءوزىمىز كورىپ كەلە جاتىرمىز.

بۇدان بولەك, اپتالىق  باعدارلامام عانا ەمەس, جىلدار  بويىنا مەرەكەلىك داتالارعا وراي ۇلكەن ساحنالاردا  ءتۇرلى كونتسەرتتىك كەشتەرىمدى كورەرمەن نازارىنا ۇسىنىپ كەلەمىن. مازمۇنى, ءمانى, ستسەناريى, ورىندالاتىن اندەردىڭ ساپاسى  تۇرعىسىنان كەمشىلىگى جوق  دەرلىك. ال فەستيۆالدەرىمدە, وكىنىشكە قاراي, بىردە جارىقتان, بىردە دىبىستان نە بولماسا ساحنالىق بەزەندىرۋدەن, نە تۇسىرىلىمنەن كەمشىن تۇستار كەزدەسىپ تۇرادى. ونىڭ ءبارى تۇپتەپ كەلگەندە قارجىنىڭ جەتىسپەۋشىلىگىنەن  بولاتىن جاعداي.

جالپى, بالالار شىعارماشىلىعىمەن اينالىساتىن ۇستازدارعا  قويار تالابىم جانە ەسكەرتۋىم – بالا بالالار ءانىن شىرقاۋ كەرەك. بۇل پسيحولوگيالىق تۇرعىدان دا, فيزيولوگيالىق تۇرعىدان دا دۇرىس جول.

– ءانشى بولعىسى كەلەتىن مىڭداعان ءبۇلدىرشىن ءسىزدىڭ باستاماڭىزبەن ساحنادان باعىن سىناپ كورىپتى. جۇزدەن جۇيرىك شىققاندارىنىڭ باسىن قوسىپ الماتىدا كەش وتكىزدىڭىز. ەندى استانالىق اعايىنمەن كەزدەسپەك ەكەنسىز…

– ءساۋىر ايىندا اباي اتىنداعى ۇلتتىق وپەرا جانە بالەت تەاترىندا «الماتى» ەسترادالىق-سيمفونيالىق وركەسترىنىڭ سۇيەمەلدەۋىمەن «ءانشى بولعىم كەلەدىنىڭ» 10 جىلدىق مەرەيتويىنا وراي اۆتورلىق كەشىمدى وتكىزدىم. كەش بارىسىندا ونەر جۇلدىزدارىمەن  بىرگە  ونەرپاز شاكىرتتەرىم  بىرگە قوس داۋىستا مەنىڭ اندەرىمدى شىرقادى. سول جەردە حالىقتىڭ الدىندا ءان جيناعىم مەن ءۇنتاسپامنىڭ تۇساۋكەسەرىن جاسادىم.

تانىمال انشىلەر مەن بالالار  قوس داۋىستا ءان سالاتىن «مەن باقىتتى بالامىن » اتتى فەستيۆالىمدى جۇرتشىلىق نازارىنا جىلما-جىل ۇسىنۋدى داستۇرگە اينالدىرعانىم كوپشىلىككە ءمالىم. بۇل دا مەنىڭ ءتول جوبام. قازىر جاسىراتىنى جوق, بۇكىل تەلەارنالاردا تانىمال ءانشى مەن تالاپكەر بالانىڭ دۋەتىن جارىسا جاساپ جاتىر.

ال سۇراعىڭىزعا كەلسەك, 25 قازان كۇنى «ءانشى بولعىم كەلەدىنىڭ» ون جىلدىعى  اياسىندا ەلوردالىق كورەرمەندەرگە ارنالعان شىعارماشىلىق كەشىمدى وتكىزۋدى  جوسپارلاپ وتىرمىن.  «كونگرەسس-حولل»  سارايىندا وتەتىن كونتسەرتتىك باعدارلامادا  «استانا»  ەسترادالىق-سيمفونيالىق وركەسترىنىڭ سۇيەمەلدەۋىمەن مەنىڭ اندەرىمدى ەلىمىزگە تانىمال انشىلەر مەن ەكى قالانىڭ جاس ونەرپازدارى  شىرقايتىن بولادى. قازىر قىزۋ دايىندىق ۇستىندەمىن.  جاندى داۋىستا وتەتىن كەشتىڭ كورەرمەنگە بەرەر اسەرى زور بولاتىنىنا سەنىمدىمىن.

جازىپ العان اينۇر شوشاەۆا