«تريۋمف بالى» باستالعاندا تەبىرەنىپ كەتتىك. ەرتەگىگە الدە رومانتيكالىق كينوعا ەنىپ كەتكەندەيمىز. اق كويلەك پەن سموكينگ كيىپ, وقۋشىلار الدىمىزدا تۇر. وزدەرى تىم كوپ. كونگرەسس ورتالىعىن ۆالس تەربەدى…
ءان اۋەنىمەن بيلەپ جۇرگەندەر – الەمدى, قازاقستاندى, ۇستازدارىن مويىنداتقاندار. اتا-اناسىنان اسىپ تۋعاندار. وزدەرى تىم قاراپايىم. ال جۇرىستەرى سەنىمدى. ولار قر ءبىلىم جانە عىلىمي مينيسترلىگىنىڭ ديپلومدارىن الدى. ءبىلىم باسقارماسىنان العىس حات ۇستادى. ۇستازدارى دا ماراپاتتالدى.
«بۇگىن 6-شى رەت «تريۋمف بالىن» وتكىزىپ, ەڭ دارىندى, تالانتتى 30 استانالىق وقۋشىنى ماراپاتتادىق. ءار جىل سايىن وسى بالدا ورەندەردىڭ كوبەيىپ كەلەتىنى قۋانتادى. ولارعا تابىس تىلەيمىن! سىزدەر, ءبىزدىڭ استانامىزدىڭ بەت-بەينەسىسىزدەر! وسىنداي جاس بۋىن ءبىزدى, ەلوردامىزدى تانىستىرىپ جۇرگەنى مەنى قۋانىشقا بولەيدى» دەدى استانا قالالىق ءبىلىم باسقارماسىنىڭ باسشىسى ءانۋار جانعوزين.
تۇلەكتەردىڭ كوبى – استاناداعى «نۇر وردا», «زەردە» زياتكەرلىك مەكتەپتەرىنىڭ شاكىرتى. ارالارىندا قاراپايىم مەكتەپ-ليتسەي وقۋشىلارى دا بار. جاراتىلىستانۋ جانە گۋمانيتارلىق پاندەر بويىنشا جالپى ءبىلىم بەرەتىن مەكتەپ وقۋشىلارى رەسپۋبليكالىق جارىستارىنىڭ 12 جۇلدەگەرى, حالىقارالىق وليمپيادانىڭ 5 جەڭىمپازى, رەسپۋبليكالىق جانە
حالىقارالىق عىلىمي جوبالار كونكۋرسىنىڭ 13 جەڭىمپازى ماراپاتتالدى. برازيليا, كورەيا ەلدەرىندە عىلىمي جاڭالىق اشقاندار دا ءجۇر ىشىندە.
ەڭ قۋانتارلىعى, «استانا دارىنى» عىلىمي-تاجىريبەلىك ورتالىعىنىڭ ديرەكتورى مايرا قۇرمانباەۆانىڭ سوزىنشە, 50-دەن استام وقۋشى شەتەلدىك بىرنەشە ۋنيۆەرسيتەتتەن شاقىرتۋ العان. سويتە تۇرا, ولاردىڭ كوپشىلىگى نازارباەۆ ۋنيۆەرسيتەتىن تاڭداعان.
تاعى دا «قازاق ءۆالسى» شىرقالىپ, 250 بالا, 70 جۇپ دوڭگەلەنە ۆالس باستادى. ۆالس جالعاسا بەرسە دەدىك. ويتكەنى قازاق جاستارىنىڭ ارمان مەن جەڭىس ءبيى ەدى بۇل!
