فۋتبولدان ەل بىرىنشىلىگىنىڭ 30-تۋرىندا «استانا» ءوز الاڭىندا شىمكەنتتىڭ «ورداباسى» كومانداسىمەن كەزدەستى.
چەمپيوندىقتىڭ ەسىگىن قاعىپ تۇرعان ەلوردالىقتار بۇل جولى قوناقتاردىڭ «قالتاسىن» تۇگەل قاقپاي, ءبىر ۇپاي عانا الىپ قالدى. تەڭ اياقتالعان ويىن گولسىز بولمادى. الايدا ويىننىڭ كورىگىن قىزدىرعان قيىپ الىپ قارايتىن ساتتەر – تەك ەكىنشى تايمنىڭ ەنشىسىندە.
ەسەپتى الدىمەن الاڭ يەلەرى اشتى. 54-مينۋتتا مارين توماسوۆتىڭ ايىپ الاڭىنىڭ سىرتىنان اڭىراتىپ تەپكەن دوبى توعىزدىققا توپ ەتە قالدى. بۇل گولعا «ورداباسى» كوپ ۇزاماي, اراعا ءتورت مينۋت سالىپ جاۋاپ بەردى. بۇعان قوناعىن سىيلاعان «استانانىڭ» قاقپاشىسى الەكساندر موكين «كومەكتەستى». ول انتونيو رۋكاۆينادان كەيىن قايتقان دوپتى الىسقا اتتاندىرامىن دەپ جازا باستى. دالىرەك ايتقاندا, موكيننىڭ تەپكەن دوبىنا جاسۇلان مولداقاراەۆ اياعىن توسا سالىپ ەدى, ونىسى بوس جاتقان توردان ورىن تاپتى. ءسويتىپ تارازى باسى تەڭەستى. جانە بۇل ەسەپ ويىن سوڭىنا دەيىن وزگەرىسسىز قالدى.
سونىمەن, چەمپيوندىققا اسىقپاعان «استانا» تۋرنير كەستەسىندەگى قورجىنىنا ءبىر ۇپاي سالىپ, 71 ەتتى. ونىڭ بوساڭسىعانىن پايدالانىپ, قۋىپ جەتۋگە الماتىنىڭ «قايراتى» دا اسا قۇلىقتى بولا قويمادى. «قايرات» ءوز جەرىندە قوستانايدىڭ «توبىلىمەن» ويناپ, كەزدەسۋ گولسىز اياقتالدى. قالعان ويىندارعا دا كوز جۇگىرتىپ وتسەك, «ەرتىس» «قايساردان» 0:1, «شاحتەر» «اقتوبەدەن» 0:1 ەسەبىمەن ۇتىلدى. ال «اتىراۋ» «اقجايىقتى» 2:1 ەسەبىمەن جەڭسە, «قىزىلجار» مەن «جەتىسۋ» 1:1 ەسەبىمەن تەڭ تارقاستى.
