استانانىڭ ىرگەسىندەگى قوياندى اۋىلىنىڭ توڭىرەگىندە حالىقارالىق بۇركىتشىلەر ءتۋرنيرى ءوتتى.
ايگىلى قۇسبەگى كۇنتۋعان توقتىبايۇلىن ەسكە الۋعا ارنالعان بۇل دودا جاقسى داستۇرگە اينالىپ, بيىل ءتورتىنشى رەت ۇيىمداستىرىلدى. وعان ەلىمىزدىڭ 10 وبلىسىنان 30-دان اسا بۇركىتشى قاتىستى. بۇعان قوسا موڭعوليادان ەكى بۇركىتشى كەلدى.
ۇلتتىق سپورتتىڭ بىرەگەيى بۇل بۇركىتشىلەر ءتۋرنيرىن مادەنيەت جانە سپورت مينيسترلىگىنىڭ جوسپارىنا سايكەس استانا قالاسى اكىمدىگى مەن ۇلتتىق سپورت تۇرلەرى قاۋىمداستىعى ۇيىمداستىردى.
ەكى كۇنگە جالعاسقان باسەكەنىڭ جالپى جۇلدە قورى 500 مىڭ تەڭگەنى قۇرادى.
– الەم بويىنشا بۇركىت سالۋ سپورت ءتۇرى رەتىندە ءۇش-ءتورت ەلدە عانا تىركەلگەن. سونىڭ ءبىرى – ءبىزدىڭ ەل. قۇسبەگىلىكتى سپورت تۇرىندە دامىتۋدىڭ باستى ماقساتى – اتادان قالعان بۇركىت سالۋ ءداستۇرىن جوعالتپاي ساقتاپ قالۋ. اتالمىش تۋرنيردە ەلىمىزدىڭ ءار وڭىرىنەن ەڭ ۇزدىك بۇركىتشىلەر قاتىستى. ەكى كۇن بويى وتكەن باسەكەنىڭ ناتيجەسىندە جەڭىمپاز اتانعان بۇركىتشىلەرىمىز ەلىمىزدىڭ اتىنان باسقا دا حالىقارالىق بىرىنشىلىككە قاتىساتىن بولادى, – دەدى ۇلتتىق سپورت تۇرلەرى قاۋىمداستىعىنىڭ اتقارۋشى ديرەكتورى راحات جاقسىباي.
تۋرنير بۇركىتتى قولعا شاقىرۋ, ەركىن ۇشىرۋ, شىرعاعا سالۋ سەكىلدى كەزەڭدەردەن تۇردى. سونداي-اق بۇركىتتى قويان مەن تۇلكىگە دە سالدى. قۇسبەگىلەر تەك بۇركىتپەن شەكتەلمەي, قارشىعا مەن يتەلگىنى دە قولعا شاقىرىپ, كەپتەرگە سالىپ جانە دالبايعا ويناتىپ باق سىنادى.
سونىمەن, جارىس قورىتىندىسى بويىنشا بۇركىت سالۋدان جامبىل وبلىسىنان كەلگەن باباجان باعداۋلەت توپ جاردى. ەكىنشى ورىندى الماتىلىق اقبەرەل قۇرمانعاليەۆ, ءۇشىنشى ورىندى الماتى وبلىسىنان الماس سەيىتجان يەلەندى.
قارشىعا ۇيرەتكەندەردەن الماتى وبلىسىنىڭ تۇلەگى ايان سەيىتجان ۇزدىك بولدى. ەكىنشى ورىن – اقمولالىق حازىباي اۆسالامنىڭ, ءۇشىنشى ورىن – جامبىلدىق بەرىكبولسىن جالعاسۇلىنىڭ ەنشىسىندە.
ال يتەلگىدەن ماڭعىستاۋلىق ايشۋاق تايمانوۆ باس جۇلدەنى قانجىعاسىنا بايلادى. ودان كەيىن استانالىق رۋسلان ماعزۇموۆ بولسا, ۇزدىك ۇشتىكتى اتىراۋلىق ارمان قوشقاروۆ تۇيىندەدى.
