قازاقستان پرەمەر-ليگاسىنىڭ 28-تۋرىندا «استانا» ءوز الاڭىندا تالدىقورعاننىڭ «جەتىسۋ» كومانداسىمەن وينادى.
ەۋروپا ليگاسىنىڭ كەزەكتى ويىنىنىڭ الدىنداعى بۇل ماتچتا «استانا» نەگىزگى قۇرامداعى بىرقاتار ويىنشىلارىن دەمالدىرۋدى ءجون ساناپتى. بىراق بۇل ەلوردالىقتاردىڭ كوش باسىنداعى ورنىنا كەرى ىقپالىن تيگىزە قويمادى.
الاڭ يەلەرى ءا دەگەننەن العا ۇمتىلىپ, قوناقتاردىڭ قاقپاسىنا ءبىراز قاۋىپ ءتوندىردى. تولاسسىز شابۋىل 38-مينۋتتا ناتيجەسىن بەردى. ەسەپ اشقان – رانگەلو يانگا. «جەتىسۋ» اجەپتاۋىر تىرەسكەنىمەن, ويىن سوڭىنا تاياعاندا ەكى مينۋتتا تاعى ەكى گول جىبەرىپ الدى. ول ەكەۋىن دە مارين توماسوۆ سوقتى. العاشقىسىن توعىزدىققا توپ ەتكىزسە, ەكىنشىسىندە قاقپاشىمەن بەتپە-بەت كەلىپ, بويىنان اسىرا سالدى.
وسىلايشا «استانا» 67 ۇپايمەن ارتىنان ىلەسىپ كەلە جاتقان الماتىنىڭ «قايراتىنان» 7 ۇپاي ۇزادى. «قايرات» بۇل تۋردا ءوز الاڭىندا «اقتوبەنى» 6:1 ەسەبىمەن ويسىراتا جەڭدى.
ال قالعان ويىندار بارلىعى, اتاپ ايتساق, «توبىل» – «ورداباسى», «ەرتىس» – «اتىراۋ», «قىزىلجار» – «قايسار», «شاحتەر» – «اقجايىق» ماتچتارى تۇگەل 1:0 ەسەبىمەن جانە الاڭ يەلەرىنىڭ باسىمدىعىمەن اياقتالدى.
