ازىق-تۇلىك ارزاندادى ما؟

«استانا اقشامى» گازەتى ەلوردا دۇكەندەرىندەگى ازىق-تۇلىك باعاسىنىڭ تۇرلەرىنە مونيتورينگ جۇرگىزۋدى جالعاستىرۋدا. بۇل جولى  سول جاعالاۋداعى ءىرى  ساۋدا ويىن-ساۋىق ورتالىقتارىن باقىلاۋعا الدىق. اتاپ ايتقاندا,  «گالمارت» (كەرۋەن), «گرين» (حانشاتىر) جانە «الما» (ازياپارك) دۇكەندەرىن ارالاپ, ونداعى باعالاردى سالىستىرعان ەدىك.

الدىمەن, «گالمارت» دۇكەنىنە باس سۇقتىق. تاڭعى ۋاقىت بولعاندىقتان با, حالىقتىڭ قاراسى تىم از. دەگەنمەن, دۇكەن سورەلەرىندەگى كەيبىر ازىق- تۇلىكتىڭ باعاسى قىمباتتاۋ كورىندى. ماسەلەن, سيىر ەتىنىڭ باعاسى 1750 تەڭگەدەن باستالادى. ال, «گرين» دۇكەنىندە سيىردىڭ ەتىن تاڭداپ ءجۇرىپ الاسىز. سۇبە, قابىرعا, سان ەتتەرىن 1300, 1460 تەڭگەدەن الۋعا بولادى. «الما» دۇكەنىندە تەك ءبىر عانا باعا بەلگىلەنگەن. ياعني, ەتتىڭ باعاسى 2200 تەڭگەدەن ساتىلۋدا.
وسى جولى قۇمشەكەردىڭ تاپشىلىعىن بايقادىق. تەك «گالمارت» دۇكەنىندە كەلىسى 299 تەڭگەدەن ساتىلۋدا. «گرين» دۇكەنىنىڭ ساتۋشىلارى قانتتى سورەگە شىعارۋعا ۇلگەرە الماي جاتقاندىقتارىن العا تارتسا, «الما» دۇكەنى كەلى­لەپ ساتپايدى ەكەن. ەسەسىنە, سورەلەردە قوراپتاعى شاقپاق قانتتىڭ تۇرلەرى كوپ. 258, 326, 460 تەڭگەدەن تولىپ تۇر. كارتوپ, قىزاناقتىڭ باعالارى دا ارزان.
ايتا كەتكەن ءجون, قياردىڭ باعاسى «گالمارت» دۇكەنىندە جەڭىلدىكپەن, ياعني, 170 تەڭگەدەن ساتىلۋدا. س-1 ساناتتاعى وتان­دىق قۇس فابريكالارىنىڭ جۇمىرتقاسى «الما» دۇكەنىندە 248 تەڭگەدەن بولسا, قالعان ەكى دۇكەندە ءسال قىمباتتاۋ بولىپ شىقتى.
بايقاۋىمىزشا, «اقمارجان», «باراقات» سەكىلدى بازاردا كوپ ساتىلاتىن كۇرىشتەردىڭ تارازىعا ولشەنگەن ءتۇرى ساتىلا بەرمەيدى ەكەن. كوبىنە «تسەسنا» فابريكاسىنىڭ ءتۇرلى قوراپتاعى كۇرىشتەرى ۇسىنىلعان. ماسەلەن, 800 گر بولاتىن قوراپتاعى «تسەسنا» كۇرىشى «گالمارتتا» – 351, «گريندە» – 344, «المادا» – 218 تەڭگە.
حالىق كوپ تۇتىناتىن ازىقتىڭ ءبىرى – كۇنباعىس مايى. ەڭ ارزانىن 382 تەڭگەگە «المادان» الۋعا بولادى. وتاندىق مۇزداتىلعان بالاپان ەتىنىڭ باعاسى ءۇش دۇكەندە دە 850-858 تەڭگەنىڭ ارالىعىندا ساتىلۋدا.

«ءوزىم «حانشاتىر» ساۋ-دا ورتالىعىندا جۇمىس ىستەيتىندىكتەن, ۇيگە قاجەتتى ازىق-تۇلىك تۇرلەرىن «گرين» دۇكەنىنەن ساتىپ الامىن. باسقا ساۋدا ورىندارىنداعى باعانىڭ جاي-كۇيىن بىلمەيمىن. ونىڭ ۇستىنە سالىستىرىپ وتىرىپ, ارزانىن بارىپ الاتىن ۋاقىت تا تاپشى. بىراق, قىزاناقتىڭ باعاسى ءالى كۇنگە دەيىن تۇسپەي تۇرعانىن انىق بىلەمىن» دەيدى ساتىپ الۋشىنىڭ ءبىرى ماقسات قازىبەكۇلى.
راسىندا, ءار دۇكەننىڭ ءوز تۇتى­نۋشىلارى بولادى. ءبىرى سول ماڭاي­دا تۇرعاندىقتان ساۋدا جاساسا, ەندى ءبىرى جولاي ءوتىپ بارا جاتىپ سوعادى. ءبىزدىڭ زەرتتەۋىمىزشە, مۇنداي ءىرى ورتالىقتارداعى دۇكەن باعالارى شامالاس بولىپ كەلەدى ەكەن.

گۇلميرا ايماعانبەت