استانا قالاسىندا كوشەگە تۇكىرگەن تۇرعىن جازاعا تارتىلدى.
وقيعا 29 شىلدە كۇنى كۇنى بولعان. استانا قالاسىنىڭ 27 جاستاعى ءبىر تۇرعىنى ۆوكزال اۋماعىنداعى سۋبۇرقاقتىڭ ماڭايىنان ءوتىپ بارا جاتىپ تۇكىرە سالعان. جاس ايەلدىڭ بۇل قىلىعىن ەرسى كورگەن تۇرعىنداردىڭ ءبىرى پوليتسياعا حابار بەرەدى. بۇگىندە ءتارتىپ بۇزۋشىعا قاتىستى اكىمشىلىك ءىس قوزعالىپ, 14 847 تەڭگە كولەمىندە ايىپپۇل سالىندى. «استانادا قىلمىسقا جول جوق. تىپتەن ۇساق زاڭ بۇزۋشىلارعا دا اياۋشىلىق جاسالمايدى. تەمىر جول ۆوكزالى ادام كوپ شوعىرلاناتىن ورىن عانا ەمەس – ەلوردانىڭ قاقپاسى. ەلىمىزدىڭ باس شاھارىنا كەلگەن ءاربىر ادامنىڭ العاشقى اسەرلەرى وسى جەردەن باستالادى. ءتارتىپ بۇزۋشىلىققا جول بەرمەي, قالا تۇرعىندارى مەن قوناقتارىنىڭ قاۋىپسىزدىگىن قامتاماسىز ەتۋ بارىسىندا كوپشىلىك ورىندارىندا تەرىس قىلىقتار كورسەتىپ, ءتارتىپ بۇزعانداردى دا نازاردان تىس قالدىرمايمىز. وسى ماقساتتا ەلوردادا «نولدىك توزىمدىلىك» ۇستانىمىن قالىپتاستىرۋ ماقساتىندا جۇمىستار جۇرگىزىلىپ جاتىر» دەيدى استانا قالالىق مامانداندىرىلعان اۋدانارالىق اكىمشىلىك سوتىنىڭ سۋدياسى ايگەرىم سادۋاقاسوۆا. بۇل رەتتە استانا قالاسىنىڭ اكىمى اسەت يسەكەشەۆ تە باس قالادا بارلىق قۇقىق بۇزۋشىلىققا «نولدىك توزىمدىلىك» تانىتۋ قاجەتتىلىگىن باسا ايتقان بولاتىن.
زاڭ بۇزۋشىلىق دەمەكشى, سوڭعى جىلدارى استانا قالاسىندا قىلمىستىق احۋال جاقسارىپ كەلەدى. ءىىد ماماندارىنىڭ مالىمەتىنە سەنسەك, جان-جاقتى جۇرگىزىلگەن شارالاردىڭ ناتيجەسىندە جەڭىل قىلمىستار ازايىپ, الاياقتىق كورسەتكىشى 3,7, بۇزاقىلىق – 46,9, سونداي-اق, كولىكتى ايداپ كەتۋ سەكىلدى جامان ادەتتەر 11,8 پايىزعا تومەندەگەن.
قىلمىستىڭ الدىن الۋ جانە اشۋ پروتسەسىندە دە وڭ ديناميكا بايقالىپ, اۋىر جانە اسا اۋىر قىلمىستاردى اشۋ بىلتىرعى جىلمەن سالىستىرعاندا ەداۋىر جاقسارعان. ءبىرىنشى جارتىجىلدىقتىڭ قورىتىندىسى بويىنشا پروفيلاكتيكالىق جۇمىستاردى كۇشەيتۋدىڭ ناتيجەسىندە ءتارتىپ ساقشىلارى قىلمىستاردىڭ ازايۋىنا ءبىرشاما قول جەتكىزىپ وتىر. ياعني, توناۋ 47,2 پايىزعا, پاتەر ۇرلىعى 4,8, بۇزاقىلىق 49,1 پايىزعا ازايعان.
«ىشكى ىستەر ورگاندارىنىڭ قىزمەتىندەگى نەگىزگى مىندەتتەردىڭ ءبىرى ناشاقورلىقپەن كۇرەسۋ بولىپ تابىلادى. وسى باعىتتا بىرقاتار جۇمىستار ءجۇرىپ جاتىر. جىل باسىنان بەرى 154 ەسىرتكى قىلمىسى انىقتالىپ, زاڭسىز اينالىمنان 230 كگ شاماسىندا ەسىرتكى الىندى. ونىڭ 14 كەلىگە جۋىعى – گەروين. تاعى 202 كگ ماريحۋانا مەن 14 كەلىدەن استام گاشيش تاركىلەندى. وسى جىلدىڭ التى ايى ىشىندە 11 «جەڭگەتاي» قىلمىستىق جاۋاپكەرشىلىككە تارتىلدى» دەيدى استانا قالاسى ءىىد ءباسپاسوز قىزمەتىنىڭ جەتەكشىسى سوفيا قىلىشبەكوۆا.
بۇركىت نۇراسىل
