بالاباقشادا مامان تاپشى
كەشە استانا قالالىق ءماسليحاتىندا وتكەن قوعامدىق كەڭەستە ءبىرقاتار اۋقىمدى ماسەلەلەر قارالدى. الدىمەن استانا قالالىق جۇمىسپەن قامتۋ, ەڭبەك جانە الەۋمەتتىك قورعاۋ باسقارماسى باسشىسىنىڭ ورىنباسارى ارتەم ءابىلدينوۆ وسى سالادا اتقارىلىپ جاتقان جۇمىستار جايىندا ءسوز قوزعادى. ونىڭ ايتۋىنشا, بيىلعى جىلى الەۋمەتتىك تولەمدەرگە 4 ملرد 570 ملن تەڭگە بولىنگەن.
جەرگىلىكتى بيۋدجەت ەسەبىنەن مۇمكىندىگى شەكتەۋلى جاندارعا, سونىڭ ىشىندە بالالارعا, زەينەتكەرلەرگە تەگىن قىزمەت كورسەتۋ جانە اقشالاي تولەم جاساۋ تۇرىندە 1 ملرد 997 ملن تەڭگەگە الەۋمەتتىك كومەك بەرىلگەن. سونداي-اق, 100-دەن اسا ادامعا ءتۇرلى قارجىلاي قولداۋ كورسەتىلگەن.
ودان كەيىن قالالىق قارجى باسقارماسىنىڭ وكىلى نورماتيۆتىك قۇقىقتىق اكتىلەردىڭ جوبالارىن قاراستىرۋ جايىندا قىسقاشا بايانداما جاسادى.
ءبىلىم باسقارماسىنىڭ باسشىسى قاسىمحان سەنعازيەۆ مەكتەپكە دەيىنگى ۇيىمدار توڭىرەگىندە ءاڭگىمە ءوربىتتى. بۇگىندە باس قالادا بالاباقشاعا كەزەكتە تۇرعان بالعىندار سانى 25 مىڭنان اسادى ەكەن. سوندىقتان وسى ماسەلەنى شەشۋ ءۇشىن مەملەكەتتىك تاپسىرىسپەن جۇمىس ىستەيتىن جەكەمەنشىك بالاباقشالارعا كوبىرەك مۇمكىندىك بەرىلىپ وتىر. بەلگىلى جۋرناليست بيبىگۇل جەكسەنباي بالاباقشاداعى ماماندار تاپشىلىعىن العا تارتتى. «مەنى مەملەكەتتىك بالاباقشاداعى كادر ماسەلەسى الاڭداتادى. تاربيەشىلەر ءجيى اۋىسادى. ولاردىڭ كاسىبي دەڭگەيى تومەن. مۇمكىن, مامانداردىڭ الەۋمەتتىك جاعدايىن جاقسارتۋدىڭ باسقا دا جولدارىن قاراستىرۋ قاجەت شىعار؟!» دەدى ول. ءوز كەزەگىندە قاسىمحان سەنعازيەۆ: «كادر ماسەلەسى ءبىز ءۇشىن وتكىر تاقىرىپ بولىپ وتىر.
2013 جىلدان بەرى استاناداعى گۋمانيتارلىق كولەدجگە مەملەكەتتىك تاپسىرىسپەن جىلىنا 50 تۇلەكتەن كوبەيتىپ وقىتامىز. نەگىزى, بالاباقشالاردا قىزمەت ءىستەيتىن تاربيەشىلەردىڭ 40 پايىزى باسقا مامان يەلەرى سانالادى. سول ءۇشىن مىڭ جارىم ماماندى قايتا وقىتۋ كۋرستارىن وتكىزدىك. ماسەلەن, جەكەمەنشىك بالاباقشالاردا مامانداردىڭ ەڭبەكاقىسى جوعارى. كوبىنەسە سوعان اۋىسىپ كەتەدى» دەپ جاۋاپ بەردى.