دۇنيە جۇزىلىك دونور كۇنىنە وراي ترانسفۋزيولوگيا عىلىمي-وندىرىستىك ورتالىعىندا «باسقالاردى دا ويلا. قان تاپسىر. ومىرىڭمەن ءبولىس!» اتتى ارنايى ءىس-شارا ءوتتى.
ادام ءومىرىن امان الىپ قالۋ ءۇشىن قان تاپسىرۋدىڭ ماڭىزى زور. سونىمەن قاتار, قان تاپسىرۋ دونوردىڭ دەنساۋلىعىنا دا وتە پايدالى ەكەنىن ايتادى دارىگەرلەر. وسىنداي يگىلىكتى ءىستى ناسيحاتتاۋعا ارنالعان شاراعا جينالعان دەنساۋلىق ساقتاۋ مينيسترلىگىنىڭ وكىلدەرى مەن «نۇر وتان» پارتياسىنىڭ مۇشەلەرى, قوعام بەلسەندىلەرى, ءتۇرلى مەكەمە قىزمەتكەرلەرى جانە تۇراقتى دونورلار ترانسفۋزيولوگيا عىلىمي-وندىرىستىك ورتالىعىنىڭ ءماجىلىس زالىندا باس قوستى. شارا بارىسىندا مەكەمە باسشىسى جاندوس بۇركىتباەۆ جينالعانداردى اتاۋلى كۇنمەن قۇتتىقتادى. ال ءوز كەزەگىندە وليمپيادا چەمپيونى, بىلعارى قولعاپ شەبەرى, «Astana Arlans» كاسىبي بوكس كلۋبىنىڭ باس مەنەدجەرى باقتيار ارتاەۆ كوپ جىلدان بەرى تۇراقتى تۇردە قان تاپسىرىپ جۇرگەن بىرقاتار دونورلاردى ارنايى العىس حاتپەن ماراپاتتادى. ماراپاتقا يە بولعانداردىڭ ءبىرى – ۆاسيلي ساليەنكو: «مەنىڭ قان تاپسىرىپ جۇرگەنىمە 30 جىل بولدى. ناۋقاستارعا قانى ساعات سايىن, ءتىپتى مينۋت سايىن قاجەت بولۋى مۇمكىن. ەگەر ءبىر تامشى قانىم ءبىر ادامنىڭ ءومىرىن ساقتاپ قالاتىن بولسا, ول – مەن ءۇشىن ۇلكەن باقىت. وسىنداي يگى ىسكە جاستاردى دا بەلسەندى اتسالىسۋعا شاقىرامىن» دەيدى.
وسى كۇنى استانا مەديتسينا ۋنيۆەرسيتەتىندە №4 قالالىق ەمحانانىڭ گەرونتولوگ دارىگەرلەرى مەن اتالمىش وقۋ ورنىنىڭ پروفيلاكتيكالىق مەديتسينا, سپورتتىق مەديتسينا كۋرسى جانە تاعامتانۋ كافەدراسىنىڭ عالىمدارى, تىل ەڭبەككەرلەرى, ەڭبەك ارداگەرلەرى مەن قالالىق جانە اۋدانداردىڭ ارداگەرلەر كەڭەستەرىنىڭ تۇراقتى كوميسسيالارىنىڭ مۇشەلەرى ءۇشىن دەنساۋلىقتى ساقتاۋ جايىندا سەمينار-ترەنينگ وتكىزدى. شارانى استانا قالاسى قوعامدىق دامۋ ىستەرى باسقارماسى مەن قالالىق ارداگەرلەر كەڭەسى ۇيىمداستىردى.
رايحان بالتاباي,
ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى
