ەلوردانىڭ دەنساۋلىق ساقتاۋ سالاسى قىزمەتكەرلەرىنىڭ كاسىبي مەرەكەسى ەرەكشە مازمۇندا اتالىپ ءوتتى. وسى ءبىر ادام ساۋلىعى دەگەن ابزال ىسكە ايرىقشا ۇلەسىن قوسىپ جۇرگەن اق جەلەڭدى ابزال جانداردى ۇلىقتايتىن «ALTYN SHIPAGER» سىيلىعى تابىس ەتىلدى.
مەرەكەلىك جيىندا استانا قالاسىنىڭ اكىمى اسەت يسەكەشەۆ قۇتتىقتاۋ ءسوز سويلەپ, ساحنا تورىنە ەلوردا دەنساۋلىق ساقتاۋ ءىسىنىڭ باستاۋىندا تۇرعان بىلىكتى دارىگەرلەرگە قۇرمەتىن كورسەتتى. س.اقشولاقوۆ, م.الشىنباەۆ, ا.بايگەنجين, ن.باتپەنوۆ, ۆ.بەنبەرين, م.قۇلجانوۆ, ق.وماروۆ, يۋ.پيا, ن.پەتۋحوۆا, م.شايداروۆقا «مەديتسيناعا قوسقان ۇلەسى ءۇشىن» العىس حاتىن بەردى.
سونىمەن بىرگە, قالا اكىمى استانا قالاسى ونكولوگيالىق ورتالىعىنىڭ ونكولوگ-حيرۋرگى ءانۋار ابدىكارىموۆكە, №1 قالالىق اۋرۋحاناداعى تامىر حيرۋرگيا ءبولىمىنىڭ دارىگەر-انگيوحيرۋرگى ازامات ابدۋللينوۆكە, №1 قالالىق اۋرۋحانانىڭ تراۆماتولوگ-ورتوپەد دارىگەرى ايان سۇلەيمەنوۆكە, №2 بالالار اۋرۋحاناسىنىڭ حيرۋرگيالىق ينفەكتسيالار ءبولىمىنىڭ مەڭگەرۋشىسى جۇماتاي ماكەنوۆكە, №2 قالالىق بالالار اۋرۋحاناسىنىڭ تراۆماتولوگ-ورتوپەد دارىگەرى ولجان باينازاروۆ جانە قوعامدىق دەنساۋلىق ساقتاۋ باسقارماسىنىڭ باس مامانى جاننا ەسقاليەۆاعا پاتەر كىلتىن تاپسىردى.
ادام ساۋلىعىنىڭ ءبىر تىرەگى دارىگەرلەرگە ارنالعان «ALTYN SHIPAGER» سىيلىعى 12 اتالىم بويىنشا انىقتالىپتى. باس قالامىزدىڭ ماڭىزدى سالاسىنىڭ دامۋ ديناميكاسىنا كوز جىبەرسەك, سوڭعى 20 جىلدا ۇلكەن سەرپىلىس بولعان. استانادا 20 مىڭعا جۋىق دەنساۋلىق ساقشىلارى قىزمەت ەتەدى. وسى جىلدارى 25-تەن اسا مەديتسينالىق نىسان سالىنىپ, 8 ميلليونعا جۋىق وتا جاسالعان ەكەن. كۇندە ەلوردامىزداعى ەمحانالاردا 8 500 تۇرعىن ەم الادى, 400-گە جۋىق ناۋقاس اۋرۋحاناعا جاتقىزىلادى, 120-عا جۋىق اۋىر وپەراتسيا جاسالىپ, جەدەل جاردەم قىزمەتى كۇنىنە 1 500 شاقىرتۋعا قىزمەت كورسەتەدى. «قازىرگى كۇندە كەي مەديتسينالىق مەكەمەلەر 150 پايىز جۇكتەمەمەن جۇمىس جاساۋدا. قازاقستاندىقتاردىڭ كوپشىلىگى استاناعا كەلىپ ەمدەلگىسى كەلەدى. وسى كورسەتكىشتىڭ ارتىندا سىزدەردىڭ ماڭداي تەر ەڭبەكتەرىڭىز, ماماندىقتارىڭىزعا دەگەن ادالدىقتارىڭىز تۇر» دەگەن قالا اكىمى بۇل سالانىڭ ءالى دە الەۋەتىن اسىرۋ مىندەتىن العا تارتتى.
«ALTYN SHIPAGER» سىيلىعى دارىگەرلەردىڭ كوپشىلىككە بەلگىسىز كۇردەلى جۇمىسىنىڭ ءبىر قىرىن تانىتقانداي. مىسالى, №2 قالالىق ەمحانانىڭ باس دارىگەرى يۆان لي «دەنساۋلىق ساقتاۋ ءىسىنىڭ ءتيىمدى مەنەدجەرى», №1 پەريناتالدى ورتالىقتىڭ ءبولىم مەڭگەرۋشىسى اسىلجان ەرەكەشوۆ «بىرەگەي وتا جاساعانى ءۇشىن», ونكولوگيا ورتالىعىنىڭ ءبولىم مەڭگەرۋشىسى دارحان احمەدين «دياگنوستيكا مەن ەمدەۋدىڭ جاڭا ءادىسىن ەنگىزگەنى ءۇشىن» اتالىمىمەن ماراپاتتالدى.
بۇل سىيلىق ەلوردا دارىگەرلەرىنىڭ ەڭبەگىن ۇلىقتاتىپ, قوعامداعى بەدەلىن اسىرۋعا ىقپالى بولارى انىق. ولاردى ادام جانىنىڭ اراشاسى قىزمەتىنە ەرەكشە ىلتيپاتپەن, اسقان ىجداعاتتىلىقپەن قاراۋعا ىنتالاندىرارى حاق. وسىنداي ماقساتپەن تۇساۋىن كەسكەن العاشقى كەشتە استانالىق «ۇزدىك دارىگەر» انىقتالدى. قالالىق №1 ەمحاناسىنىڭ وتولارينگولوگيا ورتالىعىنىڭ جەتەكشىسى گۇلميرا مۇحاماديەۆا شيرەك عاسىر بويىنا تابان اۋدارماي وسى ورتالىقتا ەتكەن ۇزدىك ەڭبەگى ءۇشىن وسى اتاققا لايىقتى دەپ تابىلدى.
ساۋلە نۇراشەۆا,
№2 قالالىق بالالار جۇقپالى اۋرۋلارى اۋرۋحاناسىنىڭ باس دارىگەرى:
– استانانىڭ 20 جىلدىعىندا دەنساۋلىق ساقتاۋ سالاسىندا دا وراسان جۇمىستار اتقارىلدى. ءوزىم باسشىلىق ەتەتىن اۋرۋحانا تۋرالى ايتسام, ول قالاداعى تەمىر جول اۋرۋحاناسىنىڭ ءبىر ءبولىمى عانا بولىپ, كەڭەيە كەلە ۇلكەن ورتالىققا اينالدى. 2015 جىلى «100 اۋرۋحانا مەن 100 مەكتەپ» باعدارلاماسىنا ساي سالىنعان جاڭا عيماراتقا كوشتىك. 250 ناۋقاسقا ارنالعان جەكەدارا بوكستاردان, زاماناۋي قۇرالدارمەن جابدىقتالعان حالىقارالىق تالاپتارعا ساي جۇمىسى جولعا قويىلعان. دەرتكە شالدىققان سابيگە ەكى ساعات ىشىندە بارلىق زەرتتەۋ-تالداما قورىتىندىسىندا كلينيكالىق ءاناليزى بويىنشا دياگنوزىن قويۋعا مۇمكىندىگىمىز بار. بۇل – ۇلكەن جەتىستىك.
داۋلەتحان ەسىموۆ,
قوعامدىق دەنساۋلىق ساقتاۋ ۇلتتىق ورتالىعىنىڭ كەڭەسشىسى, مەديتسينالىق ۇيىمدار اليانسى قوعامدىق ۇيىمىنىڭ باسشىسى:
– كەڭ كولەمدە العاندا قىزمەت كورسەتۋ ساپاسى حالىقارالىق دەڭگەيگە جەتىپ قالدى. ونى مەديتسينالىق ءتۋريزمنىڭ دامۋىمەن بايلانىستىرۋعا بولادى. شەتەلدىك ازاماتتار ءبىزدىڭ ورتالىقتاردا وتا جاساتىپ, ەمدەلىپ كەتۋدە. رەسپۋبليكالىق دەڭگەيدەگى كارديولوگيالىق, نەيروحيرۋرگيالىق ورتالىقتارمەن بىرگە №1, 2 قالالىق اۋرۋحانالار بازاسى دۇنيە جۇزىلىك ساپاعا ساي كەلەدى. وسى رەتتە, اكىمدىكتىڭ «ALTYN SHIPAGER» سىيلىعىن جاريالاپ, دارىگەرلەرگە ىقىلاس كورسەتۋى ەڭ الدىمەن ولاردىڭ قىزمەتىنە العىسىنان تۋىندايدى.
گۇلجاينات ابدەشەۆا, №4 قالالىق ەمحانانىڭ اعا مەيىربيكەسى:
– ءبىزدىڭ ەمحانا ۇلى وتان سوعىسىنىڭ قاتىسۋشىلارى مەن مۇگەدەكتەرiنە جانە سولارعا تەڭەستiرiلگەن ادامدارعا, اۋعان سوعىسى مەن چەرنوبىل اپاتىنا قاتىسۋشىلارعا قىزمەت ەتەدى. بۇل – ءبىز ءۇشىن ۇلكەن جاۋاپكەرشىلىك. ونى ەمحانانىڭ بارلىق قىزمەتكەرلەرى جاقسى ءتۇسىنىپ, قىزمەت ساپاسىن ارتتىرۋعا ءمان بەرەدى. جاسى ۇلعايعان سايىن ارداگەرلەرىمىز ەرەكشە قامقورلىقتى قاجەت ەتەدى. بۇل رەتتە, دارىگەرلەردەن باستاپ, قاتارداعى قاراپايىم قىزمەتكەرلەر ۇلكەن ۇجىمنىڭ ءبىر تەتىگىنە اينالىپ, ورتاق ءمىندەتكە ءبىر كىسىدەي جۇمىلىپ كەتەدى. ءوزارا سەنىم مەن دارىگەرلەر تاراپىنان ىقىلاس قارتتارىمىزدىڭ كوڭىلىن سەرگەك ەتىپ, قاۋقار بەرەدى.
ءبىزدىڭ كۇندەلىكتى ەڭبەگىمىزدىڭ ءناتيجەسىن ۇلىقتاپ, ارنايى سىي-سياپات جاساپ, ارامىزدان ۇزدىگىن سايلاپ جاتقانىمىز, اسىرەسە, مەملەكەتتىك مەديتسينا مەكەمەلەرىندە ەڭبەك ەتىپ جاتقان مامانداردى ىنتالاندىرۋعا ىقپالى زور.
ايگۇل ۋايسوۆا
