مەملەكەت باسشىسى قاسىم-جومارت توقاەۆ ەل استاناسىنىڭ اتاۋىن تۇڭعىش پرەزيدەنت – ەلباسى نۇرسۇلتان نازارباەۆتىڭ قۇرمەتىنە وراي نۇر-سۇلتان دەپ وزگەرتۋ تۋرالى جارلىققا قول قويعانى بەلگىلى. كەشە ەلوردا اكىمدىگىنىڭ ۇيىتقى بولۋىمەن «ەلدىك پەن بىرلىكتىڭ ەلورداسى – نۇر-سۇلتان» اتتى كونتسەرت ءوتتى.
كونتسەرتكە ونەر جۇلدىزدارىنان بولەك سپورتشىلار, قالا تۇرعىندارى مەن ءتۇرلى ۇيىمداردىڭ, مەكەمەلەردىڭ وكىلدەرى قاتىستى. ولار ءىس-شارا بارىسىندا باس قالا اتاۋىنىڭ وزگەرۋىنە قاتىستى ءوز ويلارىن ءبىلدىردى.
– ەلباسى ەگەمەندىك العان ۋاقىتتان باستاپ سپورتشىلارعا دەگەن قامقورلىعىن اياعان ەمەس. استانا اتاۋىن تۇڭعىش پرەزيدەنتىمىزدىڭ قۇرمەتىنە وراي وزگەرتىلۋىن قولدايمىن. كوپ ۇزاماي جۇرت نۇر-سۇلتان اتاۋىنا ۇيرەنىسىپ كەتەتىنىنە سەنىمدىمىن, – دەيدى بوكستان لوندون وليمپياداسىنىڭ قولا جۇلدەگەرى مارينا ۆولنوۆا.
ال باس قالامىزدا بىلتىر عانا اشىلعان «رىسكەلدى قاجى» مەشىتىنىڭ باس يمامى ياحيا قاجى ابدوللاۇلى قالا, ەل اتاۋىن بەدەلدى تۇلعالاردىڭ اتىنا وزگەرتۋ قالىپتى جايت ەكەنىن ايتا كەلىپ, مۇنداي ۇردىسكە شاريعات جولىندا ەش شەكتەۋ قويىلماعانىن قوزعاپ ءوتتى.
– مىسالعا, ساۋد ارابياسىنىڭ ءوزى تۇڭعىش باسشىسى ابدۋل-ازيز يبن ابدۋرراحمان ال-ساۋدتىڭ اتىنا قويىلعان. ودان وزگە دە پاتشالاردىڭ, باسشىلاردىڭ اتىمەن اتالعان قالالار, كوشە اتاۋلارى از ەمەس. ياعني يسلام الەمىندە بۇعان تىيىم سالىنباعانىن ەسكە سالا كەتكەن ءجون, – دەدى يمام.
قالا تۇرعىندارىنا ارناپ دوس جانە اعايىندى جۇگىنىسوۆتەرمەن بىرگە ساحنادا ونەر جولىن ەندى باستاعان انشىلەر ءان شىرقادى.
