كوپ جىلداردان كەيىن قايتا جاڭعىرعان مەرەكەنىڭ قۋانىشى بولەك بولاتىن. ويتكەنى كەڭەس زامانىنىڭ كۇيىپ تۇرعان كەزىندە دە ناۋرىز كوجە قايناتاتىن قارا قازانىن وتتان تۇسىرمەگەن اجەلەرىمىزدىڭ مەرەكەنى جوعالتپاعان ەڭبەگى قايتتى. سول كۇندەردى ەسكە الساق, شاعىن اۋىلىمىزدىڭ اق جاۋلىقتى انالارى تاباقتارىنا ءتۇرلى تاماعىن سالىپ, اجەمىزگە الىپ كەلەتىن. ونىڭ شيكىسى قازانعا ءتۇسىپ, پىسكەنى داستارقاندى تولتىراتىن. وسىلايشا باس قوسىپ, ناۋرىز كوجەدەن ءدام تاتىپ, مارە-سارە بولاتىن. بالالار دا ءماز-مەيرام بولىپ ۇلكەندەردىڭ اياعىنا وراتىلىپ, مەرەكەنىڭ ورتاسىندا جۇرەتىن.
وسىدان كوپ جىل بۇرىن سول اۋىلعا ناۋرىز كۇندەرىندە جولىم ءتۇستى. بۇرىنعى ءداستۇر ۇمىتىلماعان, ەڭ باستىسى اجەلەرىمىزدىڭ زامانداستارىنىڭ ءۇشىنشى-ءتورتىنشى ۇرپاقتارى باس قوسىپتى. ۇلكەن قارا قازان وشاقتا قايناپ, كوجە ءپىسىرىلىپ جاتتى. جينالعان قاۋىم كوكتەمنىڭ شۋاعىنا جىلىنىپ, قاۋقىلداسۋدا. جاس بالالار ونەر كورسەتىپ, سىيلىعىن الىپ جاتتى. مەن بولسام مول جايىلعان داستارقاننان اجەمنەن قالعان استى ءىزدەدىم. ەت تاعامدارىن ءتۇگەندەپ بولىپ, سۇتتەن جاسالاتىن قۇرت, ىرىمشىك, قاۋىنقۇرت, بالقايماق, سۇزبە, قاتىق, سارى ماي سياقتى تاعامداردى, داننەن جاسالاتىن مايسوك, جەنتتى ىزدەدىم.
قۇدايعا شۇكىر, بۇل تاعامداردى قالاي جاساۋدى جاس كەلىندەر ۇمىتپاپتى. قايتا كەيبىرىنىڭ قۇرامىن تۇرلەندىرىپ جەۋگە سۇيكىمدى ەتىپ جاسايتىن بولىپتى. دەگەنمەن ۇلتتىق تاعامدار نەگە تەك قانا ناۋرىزدىڭ مەرەكەلىك داستارقانىنا قويىلادى؟ قۇنارلى, ادام اعزاسىنا پايدالى تاعامداردى كۇندەلىكتى پايدالانۋىمىزعا نە كەدەرگى بولىپ ءجۇر؟ از ناسيحاتتالادى ما, الدە باعاسى قىمبات پا؟
سوڭعى كەزدەرى قازاقستان مۇسىلماندارى ءدىني باسقارماسىنىڭ نۇسقاۋىمەن ولىكتى اقتىق ساپارعا اتتاندىرۋدىڭ ءتارتىبى جاريالاندى. حالىق تا ءمۇفتياتتىڭ سوزىنە قۇلاق ءتۇرىپ, بەلگىلەنگەن شەڭبەردەن اسىپ كەتپەيتىن بولدى. ءتىپتى مارقۇمنىڭ ساداقاسىنا جايىلعان داستارقاننىڭ اس ءمازىرىن رەتتەپ, تاعامداردىڭ ءتىزىمىن جاساپتى. ونىڭ ىشىندە جوعارىدا اتالعان سۇيىكتى تاعامىمىز تۇگەل كەلتىرىلگەن. بۇل دا جاقسى شىعار. الايدا كۇندەر وتە كەلە وسى تاعامدار تەك ءمازىردىڭ اسى بولىپ قالىپ, جايشىلىقتا جەلىنبەيتىن دۇنيەگە اينالىپ كەتەدى مە دەپ قورقامىن. وعان جەتكىزبەس ءۇشىن ۇلتتىق تاعامدارىمىزدى دارۋمەندەر مەن اقۋىزدارعا باي, جوعارى كالوريالى, قۇنارلى, ماڭىزى زور تاعامدار رەتىندە لايىقتى ناسيحاتتاۋ كەرەك. كوپ بەينەت پەن تازا تابيعي ونىمدەردەن جاسالاتىن ءونىم بولعاندىقتان, بازارداعى باعاسى دا ارزان ەمەس. وسى ونىمدەردىڭ كەيبىرى وندىرىستىك تاۋارعا اينالماعانى سەبەپتى, ۇلت تاعامدارىن ارنايى ساتاتىن بولىكتەرىندە كەلىلەپ قويىپ, شەتىنەن ولشەپ بەرىپ جاتادى. تاۋاردى تارتىمدى ەتەتىن ونىڭ وراۋى بولسا كەرەك. ەگەر ۇلتتىق تاعامداردى لايىقتى ناسيحاتتاعىمىز كەلسە, ونى دا ەسكەرگەن ءجون. ونسىز دا تاعامنىڭ بەرەكەسى كەتىپ, انالارىمىزدان قالعان اس كۇندەلىكتى داستارقانىمىزدا ەمەس, ءتاتتى ەلەس بولىپ قالۋى دا ابدەن مۇمكىن.
