فۋتبولدان ايەلدەر اراسىنداعى قازاقستان چەمپيوناتى مارەسىنە جەتتى. نۇر-سۇلتان قالاسىنىڭ №8 سديۋسشور كومانداسى قولا جۇلدەگەر اتاندى.
COVID-19 جاعدايىنا بايلانىستى بيىلعى چەمپيوناتتىڭ رەگلامەنتىندە وزگەرىستەر ورىن الدى. وسى جاعدايعا وراي قازاقستان كاسىپقوي فۋتبول ليگاسى بارلىق ەپيدەميولوگيالىق-سانيتارلىق تالاپتاردى ساقتاي وتىرىپ, بىرىنشىلىكتى تولىققاندى اياقتاۋ جونىندە شەشىم قابىلداعان بولاتىن.
ايەلدەر چەمپيوناتىنىڭ شەشۋشى ويىندارى شىمكەنت قالاسىندا ۇيىمداستىرىلدى. بيىلعى بىرىنشىلىكتىڭ جۇلدەسى ءۇشىن 6 ۇجىم جارىسقا ءتۇستى. نەگىزگى باسەكە شىمكەنت, كوكشەتاۋ جانە نۇر-سۇلتان قالاسى كوماندالارى اراسىندا ءوتتى دەۋگە نەگىز بار.
«ءبىزدىڭ چەمپيوناتقا دايىندىعىمىز جاقسى بولدى. مەكەمە باسشىلىعى وقۋ-جاتتىعۋ جيىندارىن تولىققاندى وتكىزۋ ءۇشىن بارلىق ءتيىستى جاعدايدى جاسادى. تەك ءبىر جەتىسپەگەنى, چەمپيونات الدىندا جولداستىق كەزدەسۋلەر وتكىزە المادىق. العاشقى باقىلاۋ ويىنىن چەمپيونات باستالۋعا ءۇش كۇن قالعاندا عانا وتكىزدىك. بۇل, ارينە, جەتكىلىكسىز بولدى. وسىنداي جاعدايدىڭ ورىن الۋىنا پاندەميانىڭ اسەر ەتكەنى ءسوزسىز. ستاديوندار مەن مەكتەپتەر جابىلىپ قالدى. دەگەنمەن, قىزدارىمىزدى جەكە جاتتىعۋلار جاساۋ ارقىلى فورمالارىن ۇستاۋعا تىرىستىق. ەڭ باستىسى, كوماندا ويىنشىلارى چەمپيوناتقا قاتىسۋعا, جۇلدەگەرلەر قاتارىنان كورىنۋگە ىنتالى بولدى. ەندى, مىنە, سول جىگەردىڭ ارقاسىندا كوزدەگەن ماقساتىمىزعا جەتتىك دەپ ويلايمىن» دەيدى №8 سديۋسشور كومانداسىنىڭ باس جاتتىقتىرۋشىسى يليا مەلانوۆيچ.
ال چەمپيوناتتىڭ قورىتىندىسىنا كەلسەك, شىمكەنت قالاسىنىڭ «بيك-قازىعۇرت» كومانداسى قازاقستان چەمپيونى اتاعىن جەڭىپ السا, كوكشەتاۋدىڭ «وقجەتپەس» كومانداسى ەكىنشى, نۇر-سۇلتان قالاسىنىڭ №8 سديۋسشور كومانداسى ءۇشىنشى ورىننان كورىندى.
