Astana IT ۋنيۆەرسيتەتىندە حالىقارالىق قايىرىمدىلىق كۇنىنە وراي وتكەن ءىس-شارادا ەل ازاماتتارى مەن جاستار كەزدەستى. ءىس-شارانىڭ ءبىر ماڭىزى – مەملەكەت باسشىسى قاسىم-جومارت توقاەۆتىڭ جولداۋىندا جاستار ساياساتىن دامىتۋعا باعىتتالعان تۇجىرىمدار تالقىلاندى.
1997 جىلى 5 قىركۇيەكتە ۇزاق جىلدىق دەرتتەن تەرەزا انا قايتىس بولدى. ونىڭ قايىرىمدىلىق ەڭبەگىن ەسكەرگەن بۇۇ باس اسسامبلەياسى 5 قىركۇيەكتى اتاۋلى كۇن رەتىندە بەلگىلەدى. سودان بەرى ۆولونتەرلەر جينالىپ, قايىرىمدىلىق قوزعالىسىن دامىتۋ ماسەلەسىن تالقىلاپ, الداعى جۇمىستاردى مەجەلەپ كەلەدى.
كەزدەسۋگە سەنات دەپۋتاتى سۇلتانبەك ماكەجانوۆ, نۇر-سۇلتان قالاسى اكىمىنىڭ ورىنباسارى ەسەت بايكەن, قوعام بەلسەندىلەرى قاتىسىپ, ۆولونتەرلىك قوزعالىستى دامىتۋدىڭ ماڭىزى تۋرالى ويىمەن ءبولىستى. ەسەت بايكەن قازاق قوعامىندا ەجەلدەن قالىپتاسقان «اسار» ءداستۇرىنىڭ جاڭعىرعان ءتۇرى ۆولونتەرلىك قوزعالىستى دامىتۋ – ەلدىكتىڭ مىزعىماس تۇعىرى ەكەنىن اتادى.
راسىندا قازاق قوعامى مىڭجىلدىقتار كوشىندە نەبىر قيىن-قىستاۋ كەزەڭدەردى باعىندىرۋدا قايىرىمدىلىق پرينتسيپتەرىنە نەگىزدەلگەن اسار ءادىسى شەشۋشى ءرول اتقاردى. قوستاناي وبلىسىندا ءتىلسىز جاۋ – ءورت جالماعان ەلدى مەكەن تۇرعىندارىنا قولداۋ كورسەتۋ ماقساتىندا جەر-جەردە ارنايى شتابتار قۇرىلىپ, قايىرىمدىلىق اكتسياسى باستالىپ كەتتى. ارىس قالاسىنداعى جارىلىس, ماقتاارالداعى سۋ تاسقىنى جانە ت.ب. توسىن جاعدايلار كەزىندە ۇكىمەت پەن جەرگىلىكتى بيلىكتەن بولەك, «جۇمىلا كوتەرگەن جۇك جەڭىل» دەگەندى ۇستانعان ەل ازاماتتارى ۆولونتەرلىك قىزمەت كورسەتىپ, ەلدىڭ ەڭسە تىكتەۋىنە ۇلەس قوستى, – دەدى اكىم ورىنباسارى.
ەستەرىڭىزدە بولسا, ەكى جىل بۇرىن پرەزيدەنت قاسىم-جومارت توقاەۆ «Birgemiz» اتتى رەسپۋبليكالىق ۆولونتەرلەر فرونت-ءوفيسىن اشىپ, ەرىكتىلەر قوزعالىسىنىڭ دامۋىنا مەملەكەتتىك دەڭگەيدە جاعداي جاسادى.
ۆولونتەرلەردى دايىنداۋ ۇدەرىسى جانە ولارمەن جۇمىس ىستەۋ تاجىريبەسى تۋرالى «استانا جاستارى» رەسۋرستىق ورتالىعى ەرىكتىلەر قوزعالىسىن دامىتۋ ءبولىمىنىڭ باسشىسى ەلۆيرا ەسمۇحانوۆا:
– قوعامنىڭ ىلگەرىلەۋىن ۆولونتەرلىك قوزعالىستىڭ بەلسەندىلىگىنەن بايقاۋعا بولادى. نۇر-سۇلتان قالاسىندا سوڭعى 10 جىلدا ۆولونتەرلىك قوزعالىس قارقىندى دامىپ, اي سايىن 30-40 مىڭ جاستار ۆولونتەرلىك قوزعالىسقا قاتىسادى. جالپى بەلسەندى 5 مىڭ ۆولونتەر اپتاسىنا 2-3 ءىس-شاراعا قاتىسادى. ولاردىڭ اراسىندا مەكتەپتىڭ جوعارى سىنىپ وقۋشىلارى, كوللەدج جانە جوو ستۋدەنتتەرى بار, – دەدى.
ۆولونتەر جاستار ەلدەگى ىرگەلى باستامالاردى قولداپ, حالىقارالىق ءىس-شارالاردىڭ جوعارى دەڭگەيدە وتۋىنە ۇلەس قوسادى. باسقوسۋ بارىسىندا الەمدىك جانە ءداستۇرلى دىندەر ليدەرلەرىنىڭ سەزى ەرىكتى جاستاردىڭ قوساتىن قوماقتى ۇلەسى تۋرالى دا ءسوز بولدى.
نۇرلات بايگەنجە
