العاش رەت قازاق كۇرەسىنەن ەۋروپا چەمپيوناتى Qazaq Kuresi جالاۋىن جەلبىرەتتى. حالىقارالىق اۋقىمداعى تاريحي وقيعانىڭ وتەتىن جەرى بولىپ گرۋزيا ەلى تاڭدالدى, دەپ حابارلايدى ەلوردا ينفو.
قازاقتىڭ ۇلتتىق سپورتىنىڭ مەرەيىن اسىرعان سپورتتىق شاراعا ۇزىن سانى 21 ەلدەن كەلگەن 80-نەن اسا پالۋان قاتىستى.
ەۋروپا كۇرەس فەدەراتسياسى چەمپيوناتتىڭ گرۋزيا ەلىندە وتكىزىلۋىن بۇل ەلدىڭ كۇرەسكە ەرەكشە دەن قويعانى ىقپال ەتكەنىن ايتىپ وتىر. قازاق كۇرەسى – گرۋزيادا تانىمالدىعى جاعىنان گرۋزين كۇرەسى مەن دزيۋدودان كەيىن ءۇشىنشى ورىندا. ونىڭ ۇستىنە بيىل گرۋزيا كۇرەستەن ىشكى بىرىنشىلىگىن وتكىزىپ, وندا جۇزدەن اسا سپورتشى باق سىناعان. سول سايىستا ءادىس-ايلاسىمەن, قارا كۇشىمەن كوزگە تۇسكەن 9 پالۋاندى گرۋزيا ەۋروپا چەمپيوناتىنا قوستى. سولاردىڭ قاتارىندا دزيۋدودان بىلتىرعى ەۋروپا چەمپيونى, «الەم بارىسىنىڭ» كۇمىس جۇلدەگەرى گۋرام تۋشيشۆيلي جانە سامبودان جاستار اراسىندا ەكى دۇركىن الەم چەمپيونى يراكلي كۋپاتادزە بار.
باتۋمي قالاسىندا وتكەن تۇڭعىش ەۋروپا چەمپيوناتىنا 21 ەلدەن (فرانتسيا, نورۆەگيا, يرلانديا, ليتۆا, ۋكراينا, رەسەي, بەلارۋس, سلوۆەنيا, پولشا, تۇركيا, يزرايل, بولگاريا, اۆستريا, ازەربايجان, ارمەنيا, البانيا, سەربيا, كيپر, ەستونيا, مولدوۆا, گرۋزيا) 80-نەن اسا پالۋان قاتىستى.
سايىستىڭ رەسمي اشىلۋ سالتاناتىندا ءسوز سويلەگەن ادجار ار ءبىلىم, مادەنيەت جانە سپورت ءمينيسترى ينگا شاميليشۆيلي گرۋزيادا ەۋروپا بىرىنشىلىگىن وتكىزىپ جاتقان قازاقستانعا زور العىس ايتتى:
«باتۋمي قالاسىندا وسىنداي چەمپيونات وتكىزۋ تۋرالى شەشىم قابىلداعان قازاقستانعا ەرەكشە ريزاشىلىعىمدى بىلدىرەمىن. سپورت ءتۋريزمى – ءبىزدىڭ باستى باعىتتارىمىزدىڭ ءبىرى. مۇنداي حالىقارالىق ءىرى شارالار ءبىزدىڭ ەلگە كوپتەپ تۋريستەردىڭ تارتىلۋىنا سەپتىگىن تيگىزەدى. سوندىقتان ءبىز وسىنداي جوبالارعا قاشاندا قولداۋ كورسەتەمىز. وسى جەردە قازاق كۇرەسىنەن جەرگىلىكتى تۋرنير ۇيىمداستىرساق دەگەن ويىمىز بار. وعان قوسا, بۇل ەلىمىزدە كەڭىنەن تارالعان گرۋزين كۇرەسىنە قاتتى ۇقسايدى», – دەدى ول.
وسى كۇنگە دەيىن ەۋروپا كۇرەس فەدەراتسياسى گرۋزيادا, ليتۆادا جانە پولشادا ىشكى چەمپيوناتتار ۇيىمداستىردى. جانە الداعى ۋاقىتتا وسى ەلدەردىڭ قاتارىن كەڭەيتۋدى كوزدەپ وتىر.
ەۋروپا كۇرەس فەدەراتسياسىنىڭ پرەزيدەنتى كارەن ارۋتيۋنيان:
«بۇل العاشقى ەۋروپا چەمپيوناتى جاڭارعان ەرەجە بويىنشا وتەتىن بولىپ ۇيعارىلدى. كۇرەس جالاڭ اياق جانە قاتتى كىلەمدە وتەدى. مۇندا نەگىزىنەن دزيۋدونىڭ شەبەرلەرى جينالعاندىقتان ءتۋرنيردىڭ بۇل شارتى ولاردى الاڭداتا قويمادى. جالپى ءبىز كۇرەستى وتە قىزىقتى جانە بولاشاعى زور سپورت ءتۇرى دەپ سانايمىز. وليمپيادا ويىندارىنىڭ باعدارلاماسىنا قوسۋعا ابدەن لايىق».
جەكپە-جەكتەر 9 سالماق دارەجەسىندە ءوتتى. العاشقى ۇشتىكتەن كورىنگەن بالۋاندارعا قوماقتى جۇلدە تاعايىندالدى: جەڭىمپازعا – 1000 دوللار, كۇمىسكە – 700 دوللار جانە قولاعا – 500 دوللار.
ال ءابسوليۋتتى سالماق دارەجەسىندە چەمپيون بولعان سپورتشى 3000 اقش دوللاردى قانجىعاسىنا بايلادى. كۇمىس جۇلدەگەرگە – 2000 اقش دوللارى, قولا جۇلدەگەرگە – 1000 اقش دوللار.
ارينە بۇل تۋرنيردە تۇيە پالۋاندار كۇرەسىنىڭ كورىگى قىزدى. فينالدا گرۋزين گۋرام تۋشيشۆيلي بولگاريادان كەلگەن ۆەسەلين يۆانوۆتىڭ جاۋىرىنىن جەر يىسكەتتى. ال قولاعا پولياك توماش تالاچ قول جەتكىزدى.
ايتا كەتۋ كەرەك, قازاق كۇرەسىنەن حالىقارالىق دەڭگەيدە وتكەن سايىستار بيىل ەۋروپا چەمپيوناتىمەن شەكتەلمەيدى. تامىزدىڭ سوڭىندا استانادا ازيا چەمپيوناتى سالتانات قۇرادى دەپ جوسپارلانۋدا.
اقىرىنداپ بۇكىل əلەمگە تارالادى