بۇگىندە باس قالانىڭ اۋەجايى شەتەلگە شىعاتىن 33 باعدارعا, ال رەسپۋبليكا ىشىندە 17 باعدارعا تۇراقتى تۇردە قىزمەت كورسەتۋدە. بۇل ورايدا نۇرسۇلتان نازارباەۆ اتىنداعى حالىقارالىق اۋەجايدىڭ جولاۋشىلار اعىنى ارتا تۇسۋدە.
مامانداردىڭ مالىمەتىنشە, اتالمىش اۋەجايدان اقش-تىڭ نيۋ-يورك قالاسىنا تىكەلەي ۇشاتىن كۇن دە الىس ەمەس كورىنەدى. بۇل باعىتتاعى اۋە بايلانىسى 2021 جىلى اشىلادى دەپ جوسپارلانىپ وتىر. قازاقستاننىڭ ۇلتتىق تاسىمالداۋشىسى – Air Astana كومپانياسى قازىرگى ۋاقىتتا بۇعان قىزۋ دايىندىق جۇمىستارىن جۇرگىزۋدە.
قازىرگى تاڭدا استانادا جاڭا شەتەلدىك اۆياكومپانيالار سانى كوبەيگەن. سوعان وراي جازعى ماۋسىم باستالعالى بەرى شەتەل باعىتى بويىنشا جاڭا بەس باعدار قوسىلسا, ەل ىشىندەگى رەيستەر تاعى دا ءۇش باعدارمەن تولىعىپتى. مامانداردىڭ سوزىنشە, حالىقارالىق رەيستەرگە قىزمەت كورسەتەتىن ءبىرىنشى تەرمينال بۇگىندە ءبىر ۋاقىتتا ىشكى جانە سىرتقى رەيستەرگە, ياعني 2150 جولاۋشىعا قىزمەت كورسەتۋگە قاۋقارلى. ال ەكى تەرمينالدى قوسا العاندا, جىلىنا 8 ملن 230 مىڭ جولاۋشىعا قىزمەت كورسەتۋگە مۇمكىندىك بار كورىنەدى. 2016 جىلمەن سالىستىرعاندا بىلتىر جولاۋشىلار اعىنىنىڭ ءوسىمى 25 پايىزعا ارتقان.
شەتەلدىڭ ۇلكەن قالالارىن قازاقستان شاھارلارىمەن بايلانىستىرىپ, ورتا ازياداعى ايماقتىق حابقا اينالۋ ءۇشىن نۇرسۇلتان نازارباەۆ اتىنداعى حالىقارالىق اۋەجاي ترانزيتتىك تاسىمال الەۋەتىن ارتتىرۋعا دەن قويىپ وتىرعانىن ايتادى ماماندار.
–Air Astana جولاۋشىلار اعىنىن ۇلعايتۋعا جول اشاتىن ارنايى باعدارلاما ازىرلەۋدە. ال اۋەجايدا ترانزيتتىك جولاۋشىلارعا قولايلى بولۋ ءۇشىن كاپسۋلالى قوناق ۇيلەر قويىلادى. ولار ماۋسىم ايىنىڭ سوڭىندا, استانانىڭ 20 جىلدىعى قارساڭىندا بەرىلەدى. 1 ماۋسىمنان باستاپ اۋەجايدا ءمودۋلدى جۇك قويماسى پايدالانۋعا بەرىلدى. ول پەررونعا تىكەلەي شىعاتىن باقىلاۋ اۋماعىندا ورنالاسقان. نىساننىڭ جالپى اۋماعى 1100 شارشى مەتردەن اسادى.
نۇرداۋلەت كاكىشتەگى
جاقسى جاڭالىقتىڭ جارشىسى بولا بەرىڭىزدەر!