گولوۆكين – «استانا» ساپىندا

گەننادي گولوۆكين «استانا» پرەزيدەنتتىك كاسىبي سپورت كلۋبىنىڭ قۇرامىنا قابىلداندى.

ەلباسى نۇرسۇلتان نازارباەۆتىڭ باستاماسىمەن وتكەن جىلدىڭ سوڭىندا قۇرىلعان «استانا» پرەزيدەنتتىك كاسىبي سپورت كلۋبى ەلىمىزدەگى ەڭ ۇزدىك سپورت ۇيىمدارىن بىرىكتىرىپ, حالىقارالىق ارەنادا قازاقستاننىڭ جاعىمدى ءيميدجىن تانىتۋدى جۇزەگە اسىرىپ وتىرعان ايتۋلى قۇرىلىمعا اينالدى. بۇگىندە «استانا» اتاۋىمەن اتالاتىن ۆەلوسيپەد, باسكەتبول, فۋتبول, سۋ سپورتى كوماندالارى, «استانا ارلاندارى», «استانا داكار تيم», «قازاقستان بارىسى», «بارىس» حوككەي كلۋبى سپورت ۇيىمدارى دا پرەزيدەنتتىك كلۋبتىڭ قامقورلىعىمەن حالىقارالىق جارىستاردا ەل نامىسىن قورعاپ ءجۇر.
ءبىر ايتارلىعى, «استانا» پكسك ءوز قۇرامىنا الەمدىك سىنداردا تابىستى ونەر كورسەتىپ جۇرگەن جەكەلەگەن سپورتشىلاردى دا قامقورلىعىنا الىپ وتىر. اتاپ ايتقاندا, وليمپيادا ويىندارىنىڭ ەكى دۇركىن چەمپيونى يليا يلين مەن الەم چەمپيوناتىنىڭ كۇمىس جۇلدەگەرى, مانەرلەپ سىرعاناۋشى دەنيس تەن دە «استانا» كلۋبىنىڭ مۇشەلەرى سانالادى. ەندى, مىنە, وسىنداي ەل ابىرويىن كوتەرۋگە ايتۋلى ۇلەس قوسىپ جۇرگەن تالانتتى سپورتشىلاردىڭ قاتارىنا اتاقتى بوكسشىمىز گەننادي گولوۆكين دە قوسىلىپ وتىر.
گەننادي گولوۆكيننىڭ «استانا» پرەزيدەنتتىك كاسىبي سپورت كلۋبىنا قا­بىلدانعانىنا وتە قۋا­نىش­تىمىن. ول بۇگىندە كاسىپقوي بوكستان الەم چەمپيونى, وسىعان دەيىن 28 جەكپە-جەك وتكىزىپ, بارىندە جەڭىسكە جەتتى. اۋەسقوي بوكس­تا دا الەم چەمپيونى, وليمپيادا ويىندارىنىڭ كۇمىس جۇلدەگەرى بولعان. بۇگىن ءبىز وسى تالانتتى سپورتشىمىزدى پرەزيدەنتتىك كلۋبتىڭ قۇرامىنا قا­بىلداپ وتىرمىز. الداعى ۋاقىتتا ول جەكپە-جەكتەرگە «استانا»كلۋبى اتىنان تۇسەتىن بولادى, – دەپ اتاپ ءوتتى «استانا» پرەزيدەنتتىك كاسىبي سپورت كلۋبىنىڭ پرەزيدەنتى باقتيار ارتاەۆ سپورتشى
مەن كلۋب اراسىنداعى كەلىسىمگە قول قويۋ ءراسىمى بارىسىندا.

عالىم قوجابەكوۆ