قر ءبىلىم جانە عىلىم ءمينيسترى اسحات ايماعامبەتوۆ پەداگوگتاردى ارتىق شارۋادان بوساتۋ جۇمىستارى تۋرالى بۇدان بۇرىن دا ايتقان بولاتىن ەدى.
ونىڭ ەڭ باستىسى – مۇعالىمدەردى قاعازباستىلىقتان مەيلىنشە بوساتۋ. ويتكەنى مەملەكەت باسشىسى ديرەكتورلاردى تاعايىنداۋ, مۇعالىمدەردىڭ مارتەبەسىن ارتتىرۋ جونىندە ارنايى تاپسىرما بەرگەن. وسى رەتتە ەلىمىزدە پەداگوگ مارتەبەسى تۋرالى زاڭ قابىلداندى. ول زاڭعا 5,3 تريلليون تەڭگە قارجى بولىنگەن. بيىل قاڭتاردان باستاپ مۇعالىمدەردىڭ جالاقىسى 25 پايىزعا ارتتى. ارينە, پاندەميا كەزەڭىندە مۇعالىمدەر كۇنى-ءتۇنى جۇمىس ىستەۋگە ءماجبۇر بولدى. ويتكەنى قانداي جاعدايدا دا وقۋشىلارعا ءبىلىم بەرۋدى توقتاتپاۋ پارىز. وسى كەزدە ۇستازداردى جۇمىسىنان تىس شارۋالارعا جۇمساماۋ, ولاردى قاعازباستىلىقتان ارىلتۋ كەرەكتىگى جونىندەگى ماسەلەلەردى ۇدايى نازاردا ۇستاعان مينيستر بۇگىن دە بۇل ماسەلەگە ارنايى توقتالدى.
«پەداگوگ جۇمىسىنىڭ ساپاسى وقۋشىلاردىڭ ءبىلىم ساپاسىنا تىكەلەي اسەر ەتەدى. سوندىقتان پەداگوگ ارتىق شارۋامەن اينالىسپاۋى كەرەك. بالالاردىڭ ءبىلىمى مەن تاربيەسىنە جۇمىس ىستەيتىنىن ءتۇسىنۋى كەرەك. سوندىقتان ءبىز ءارى قاراي پەداگوگ مارتەبەسىن كوتەرۋدى, ارىپتەستەرىمىزدى قولداۋ مەن دامىتۋ ءۇشىن جاعداي جاساۋدى جالعاستىرامىز. ەندى مۇعالىمدەر كۇنىنە ەكى قۇجاتتى عانا تولتىرادى. بۇل جۇمىستاردى قايتادان قاراستىرىپ جاتىرمىز» دەدى مينيستر. ونىڭ ايتۋىنشا, مۇعالىم جۇكتەمەسىن ازايتۋ ءۇشىن قۇجاتتار سانى دا قىسقارتىلعان. مۇنداي جەڭىلدىك تەك مەكتەپ مۇعالىمدەرىنە ەمەس, مەكتەپكە دەيىنگى ۇيىمداردىڭ, كوللەدج, جوعارى بىلىمنەن كەيىنگى ۇيىمداردىڭ پەداگوگتارىنا قاتىستى. ەندىگى جەردە مۇعالىم تىكەلەي ءوز فۋنكتسيالارىمەن عانا اينالىساتىن بولادى. مينيسترلىك تاراپىنان تەكسەرۋشىلەرگە ەسەپ بەرۋ سىندى ماسەلەلەر قايتا قارالىپ, شەكتەۋلەر الىنىپ تاستالعان.
