پرەزيدەنتتىككە جالپىۇلتتىق سوتسيال-دەموكراتيالىق پارتياسى اتىنان ۇمىتكەر نۇرلان اۋەسباەۆ شىمكەنتكە ارنايى ساپارمەن باردى. ەڭ الدىمەن ايماقتىق سايلاۋالدى شتابقا ات باسىن بۇرىپ, پارتيا اكتيۆىمەن كەزدەستى. ودان كەيىن ازاماتتاردى قابىلدادى.
وسى كەزدەسۋلەر بارىسىندا نۇرلان اۋەسباەۆ جسدپ بەلسەندىلەرىن ءوزىنىڭ سايلاۋالدى باعدارلاماسىنىڭ نەگىزگى تارماقتارىمەن تانىستىردى. قۇجاتتا ەلىمىزدەگى ساياسي رەفورمالارعا ايرىقشا نازار اۋدارىلعانىن اتاپ ءوتتى. ۇمىتكەردىڭ پىكىرىنشە, «الدىمەن ەكونوميكا, كەيىن ساياسات» ستراتەگياسى ءتيىمسىز بولىپ شىقتى. پارتيالىق-ساياسي ءورىستى تولىققاندى رەفورمالاۋ قاجەت.
كەزەك كۇتتىرمەيتىن تاعى ءبىر وزەكتى ماسەلە – ەكونوميكاعا تۇساۋ بولىپ وتىرعان جەمقورلىق. بۇل جاعىمسىز قۇبىلىستى جويۋ ءۇشىن جسدپ-دان ۇمىتكەر پاراقورلارعا قاتىستى جازانى بارىنشا قاتايتۋدى ۇسىنادى. ن.اۋەسباەۆتىڭ پىكىرىنشە, سىبايلاس جەمقورلىق قىلمىسى ءۇشىن سوتتالعانداردى مەرزىمىنەن بۇرىن بوساتۋ قۇقىعىنان ايىرۋ قاجەت.
بيۋدجەت قاراجاتىنىڭ بولىنۋىنە قاتىستى حالىقتىق باقىلاۋ ورناتىلعان كەزدە عانا سىبايلاس جەمقورلىقپەن كۇرەسۋگە بولادى. نۇرلان اۋەسباەۆتىڭ پايىمداۋىنشا, ول ءۇشىن ەلگە وليگارحتاردىڭ ەمەس, حالىقتىڭ ءتۇرلى توپتارىنىڭ قىزىعۋشىلىقتارىن قورعايتىن كۇشتى ءبىر پالاتالى پارلامەنت قاجەت.
«بۇل جەردە باستى نازاردا وليگارحتاردىڭ قىزىعۋشىلىعى, مۇددەسى ەمەس, قاراپايىم حالىقتىڭ الەۋمەتتىك جاعدايى ءبىرىنشى ورىندا تۇرۋى ءتيىس دەپ ويلايمىن. قازىرگى كەزدە قاتارداعى قازاقستاندىقتاردىڭ كەدەيلەنۋى ەتەك الۋدا. ازىق-تۇلىك باعاسىنىڭ ۇزدىكسىز ءوسۋى قالىپتى جاعدايعا اينالىپ كەتتى. ءبىز بۇلاردىڭ بارىنە كوزىمىزدى جۇمىپ قاراماي, قازىردەن باستاپ ءىس-قيمىلعا كوشۋىمىز كەرەك» دەدى ۇمىتكەر.
