قازاق ءانىن الەمدە ­اۋەلەتكەن ديماش

جاقىندا نيۋ-يوركتەگى «Barclays Center» ساحناسىندا ديماش قۇدايبەرگەننىڭ جەكە كونتسەرتى ءوتتى. قازاقستاننىڭ اقش-تاعى مادەنيەت كۇندەرى اياسىندا قر مادەنيەت جانە سپورت مينيسترلىگىنىڭ قولداۋىمەن وتكەن بۇل كونتسەرتكە اقش, اۆستراليا, مەكسيكا, رەسەي, چيلي, بولگاريا, فيليپپين, يسپانيا, كانادا, جاپونيا سياقتى 60-تان اسا ەلدەن 15 مىڭعا جۋىق كورەرمەن جينالدى.گرەممي سىيلىعىنىڭ يەگەرى, پەرۋ­لىك اتاقتى ءانشى ەۆا ايلان ديماش قۇدايبەرگەننىڭ ءان كەشىن تاماشالاۋ ءۇشىن ءوز كونتسەرتىن كەيىنگە شەگەرىپ, نيۋ-يورك­كە ۇشىپ كەلگەنىنىڭ ءوزى اتالعان ءان كە­شىنىڭ اتاعىن ودان ءارى اسپانداتسا, ­ديماشتىڭ ءار ۇلت اۋەندەرىن, اسىرەسە, قازاقتىڭ حالىق اندەرى مەن كۇيلەرىن عاجاپ سەزىممەن, ءتاتتى اۋەنمەن ورىنداعانى تىڭداۋشىلارىن ايرىقشا اسەرگە بولەگەن ءتارىزدى. ديماش حالىق ءانى «دايديداۋدى» قازاق تىلىندە شىرقاعاندا, زال تولى كورەر­مەن ورىندارىنان تۇرىپ, بىرگە ايتقان ۆيدەو­سىن كورىپ, قازاقستاندا وتىر­عان ءبىزدىڭ دە بويىمىزدى ماقتانىش سەزىمى كەرنەدى. ال اقش-تاعى قازاقتاردىڭ ديماش كەشىنەن العان اسەرى ءتىپتى بولەك. سونىڭ ءبىرى – ­نازىم جانعازينوۆانىڭ ەستەلىگى.
«ساعات تاڭعى 08:00. اقش, نيۋ-يورك قالاسى. وسىلايشا ­ديماشتىڭ امەريكاداعى كونتسەرتى اياقتالدى» دەپ باستاپتى ول ءوزىنىڭ تەبىرەنىسكە, القاۋعا, ماقتانعا تولى جازباسىن.
«مەن بۇگىن ۇيقىدان مۇلدەم باسقا ادام بولىپ وياندىم. ومىرىمدە ءبىرىنشى رەت مەن ءوزىمنىڭ قازاق دەگەن حالىقتىڭ قىزى ەكەندىگىمدى ماقتان تۇتىپ, كەۋدەم تولا قۋانىشپەن وياندىم. جۇرەگىم «مەن قازاقپىن!» دەپ دۇرسىلدەپ وياندى. وسى سەزىممەن الەمنىڭ ەڭ الىپ, ەڭ كەرەمەت قالالارىنىڭ بىرىندە وتىرىپ, بۇگىن ءوز ەلىمدى قاتتى ساعىندىم.
شىنىمدى ايتسام, وسىعان دەيىن جەر كولەمى بويىنشا 9-ورىنداعى, جەر استى پايدالى قازبالارعا وتە باي, تاريحى دا, تاعىلىمى دا مول بولسا-داعى, مەنىڭ وسىنداي ەلىمدى ەشكىم بىلمەيتىنىنەن, مەندە ازىراق بولسا دا ءوزىمدى كەمشىن ۇلتتىڭ قىزىنداي تومەن سەزىنۋ, ءوز-وزىمە سەنبەۋ بار ەدى, ونى جاسىرىپ قايتەم؟ مەن وسى ۇلتتىڭ وسكەلەڭ ۇرپاعى ەكەندىگىمە ۇيالاتىنمىن دا.
بىراق بۇگىن ءبىزدى قويىپ, ەرەسەكتەرىمىزدىڭ ءوزى حالىق اندەرىن بىلمەيتىنى جانە تىڭدامايتىنى ءۇشىن مەن بۇگىن ءبىرىنشى رەت قاتتى ۇيالدىم. ۇلكەندەرگە كەرەك ەمەس دۇنيە, بىزگە نە ءۇشىن كەرەك دەيتىنبىز. ول ويىم­نىڭ مۇلدە بەكەر ەكەنىن شىنداپ سەزىندىم. كەشە تۇندە ءبىز قازاقتاردىڭ وزدەرى قازاقتىڭ ۇلتتىق قۇندىلىقتارىن قانشالىقتى باعالامايتىنىمىزدى انىق ءتۇسىندىم. جۇرەگىم اۋىردى, جىلادىم…
كەشە وسىناۋ الىپ ەل – امەريكادا 15 مىڭنان استام ادام ديماشپەن بىرگە حالىق ءانى «دايديداۋدى» قوسىلا شىرقاعان كەزدە مەن جۇرەگىم جارىلا جىلادىم. كونتسەرت اياقتالعاننان كەيىن ارتىما قاراسام, ءاربىر ءۇشىنشى قوناقتىڭ قولىندا مەنىڭ ەلىمنىڭ كوك تۋى جەلبىرەپ كەتىپ بارادى. قانداي ماقتانىش دەسەڭىزشى! بۇل كەشتە ماعان ءتىپتى تۋىمنىڭ ءتۇسى دە مۇلدەم باسقاشا ىستىق قابىلداندى.
نيۋ-يوركتە كورگەنىمدەرىمنىڭ ءبارىن تىلمەن ايتىپ جەتكىزە المايمىن! ديماش مەنىڭ ويىمدى تۇبەگەيلى وزگەرتتى. مەنىڭ رۋحىمدى وياتتى. تۇڭعىش رەت قازاق ەكەنىمە قاتتى قۋاندىم. كونتسەرتتەن كەيىن ديماش ءوزىنىڭ ءدال وسىنى بالا كەزىنەن ارمانداعانىن ايتتى. امەريكا تۋرالى ەمەس, امەريكادا ءان سالۋدى دا ەمەس, امەريكاعا, ءتىپتى بۇكىل الەمگە وزىمەن قوسىلىپ قازاقتىڭ حالىق اندەرىن جاتقا ايتقىزسام دەپ ارمانداعانىن ايتتى. جانە ول مۇنى جاسادى.
كەشەگى «Barclays Center»-دە بولعان وقيعا ءبىزدىڭ تاريحىمىزدا قالادى. مەن وعان سەنەمىن. قازاقستاندىق جاس ءانشى الەم جۇلدىزدارى جينالعان اۋديتوريانى جيناپ, امەريكالىق مىڭداعان كورەرمەندى قازاقتىڭ حالىق اندەرىن شىرقاتىپ, دومبىرانىڭ ۇنىنە جىلاتتى.
جاسا, ديماش! جاسا, قازاق ەلى!».
ديماش قۇدايبەرگەننىڭ اقش-تا وتكەن ءان كەشى تۋرالى بۇدان ارتىق ەشتەڭە ايتۋدىڭ قاجەتى جوق. سەبەبى ديماش «ءوز اسىلىمىز­دى باعالاماي, جاتتىڭ جاسىعىن جاعالاپ جۇرگەنىمىزدى» دە, «ءوزىڭدى-ءوزىڭ سىيلاساڭ, جات جانىنان تۇڭىلەر» دەگەن اتالى ءسوزدىڭ استارىن دا وسى ءان كەشىمەن-اق دالەلدەپ كەتكەن سەكىلدى.
ديماش 12 جەلتوقسان كۇنى نۇر-سۇلتانعا ورالدى. اۋەجايدا ونى وتانداستارىمىز ۇلكەن سالتاناتپەن قارسى السا, سول كۇنى قر ءتا­ۋەلسىزدىك كۇنىنە وراي ديماش ­قۇدايبەرگەنگە «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى بەرىلدى.