استانادا ءVى قازاقستان رەسپۋبليكاسى پرەزيدەنتىنىڭ كۋبوگى ءۇشىن وتكەن حالىقارالىق تۋرنير مارەسىنە جەتتى. بايراقتى باسەكەدە 15 ەلدىڭ مىقتى بوكسشىلارى سىنعا ءتۇستى. ءتورت سالماقتا قىزدار قولعاپ تۇيىستىرسە, ەر جىگىتتەر 10 سالماقتا جەكپە-جەككە شىقتى.
جىل سايىن ۇيىمداستىرىلاتىن جارىستىڭ دەڭگەيى ەداۋىر كوتەرىلگەنى بايقالدى. بىرىنشىدەن, جارىسقا قاتىسۋشىلار اراسىندا وليمپيادا ويىندارىنىڭ, الەم چەمپيوناتىنىڭ چەمپيوندارى مەن جۇلدەگەرلەرى كوپ بولدى. ەكىنشىدەن, ءتۋرنيردىڭ جۇلدە قورى باسقا ەلدەردە وتەتىن وسىنداي حالىقارالىق جارىستاردان الدەقايدا قوماقتى بولدى. اتاپ ايتقاندا, باعالى سىيلىقتارمەن قاتار جەڭىمپازدار 2000 (اقش) دوللار, كۇمىس جۇلدەگەرلەر – 1500 دوللار, ال ءۇشىنشى ورىنعا ىلىنگەندەر 500 دوللار كولەمىندە سىياقى الدى.
ال جارىستىڭ وزىنە كەلەر بولساق, نەگىزىنەن, قازاق بوكسشىلارى باسىمدىق تانىتتى دەۋگە بولادى. قىزدار باسەكەسىندە استانالىق ءسانيا سۇلتانقىزى (57 كەلى) وتە جاقسى ونەر كورسەتتى. جاقىندا عانا قازاقستان چەمپيونى اتانعان ءسانيا بۇل جارىستا دا بارلىق جەكپە-جەكتەرىندە قايسارلىق تانىتتى. 60 كەلى سالماقتا قازاقستاننىڭ ەڭبەك سىڭىرگەن جاتتىقتىرۋشىسى بەرىك مارجىقباەۆتىڭ شاكىرتى ريمما ۆولوسەنكو ايقىن باسىمدىلىقپەن توپ جاردى. ونىڭ ءوز سالماعىندا كۇشتى ەكەنىنە كۇمان بولمادى.
قىزدار بوكسىندا ەڭ جەڭىل سالماقتا جاپونيا ارۋى ناميكي تسۋكۋمي جەڭىمپاز اتاندى. كۇنشىعىستىڭ قىزى جارتىلاي فينالدا ءبىزدىڭ ەكى دۇركىن الەم چەمپيونىمىز نازىم قىزايبايدى توقتاتقان ەدى. ال اۋىر سالماقتا ريو وليمپياداسىندا قولا مەدال العان داريعا شاكيموۆا كۇمىستى قاناعات تۇتۋعا ءماجبۇر بولدى. شۆەتسيانىڭ بۇرىمدى بوكسشىسى لاۆ حولگەرسون قازاق قىزىنىڭ جولىن بوگەدى.
ال ەرلەر سايىسىندا «جان الىپ, جان بەرىسكەن» جەكپە-جەكتەر كوپ بولدى. 48 كەلىدە قازاقستان قۇراماسىنىڭ ءبىرىنشى جانە ەكىنشى ءنومىرلى بوكسشىلارى التىن ءۇشىن ايقاسقا شىقتى. تەمىرتاس ءجۇسىپوۆ جومارت ەرجاننان ايلاسىن اسىرا ءبىلدى. 52 كەلىدە الماتىلىق ءانۋار مۇزاپاروۆ فيليپيندىك لادون روگەندى جەڭدى. 56 كەلى سالماقتا الەم چەمپيونى قايرات ەراليەۆ چەمپيون اتاندى. ول جارتىلاي فينالدا وليمپيادا ويىندارىنىڭ چەمپيونى وزبەك بوكسشىسى شاحوبيددين زويروۆتى جەڭگەن بولاتىن. ال فينالدا وسىعان دەيىن استانالىق حالىقارالىق دارەجەدەگى سپورت شەبەرى ءىلياس سۇلەيمەنوۆتەن باسىم تۇسكەن اقش بوكسشىسى ديۋك رەيگەندى تىزە بۇكتىردى. قايرات پەن ديۋك بىلتىر الەم چەمپيوناتىنىڭ فينالىندا دا كەزدەسكەن بولاتىن. 64 كەلىدە قازاقستاندىق بەكداۋلەت يبراگيموۆ, 69 كەلىدە اسلانبەك شىنبەرگەنوۆ توپ جاردى. 75 كەلى سالماقتا ەكى مىقتى بوكسشىمىز قولعاپ ءتۇيىستىردى. الەم چەمپيوناتىنىڭ ءفيناليسى ءابىلحان امانقۇل مەن بەلگىلى بوكسشى ەرىك ءالجانوۆ اراسىندا وتكەن وتە تارتىستى ايقاستا جاس الەم چەمپيونى باسىمدىق تانىتتى. 81 كەلىدە وزبەكستان مىقتىسى بەكتەمىر مەلكۋزيەۆ پەن ءبىزدىڭ جاس بوكسشى بەك نۇرماعانبەت شايقاستى. بۇل جەكپە-جەكتە وزبەك بوكسشىسى جەڭىمپاز اتاندى. بىراق قالىڭ جانكۇيەر بەكتىڭ ونەرىنە ءتانتى بولعانى سونشالىق, ورىندارىنان تۇرىپ قوشەمەت ءبىلدىردى. 91 كەلىدە قازاقتىڭ تاعى ءبىر جاس جىگىتى كەرەمەت توبەلەس كورسەتتى. اتاپ ايتقاندا, ابزال قۇتتىبەكوۆ وسىعان دەيىن ءبىزدىڭ ۆاسيلي لەۆيتتى جەڭگەن رەسەي بوكسشىسى سادام ماگومەدوۆتى تىزەرلەتتى. ال ەڭ اۋىر سالماقتا قازاقستان چەمپيونى, الەم چەمپيوناتىنىڭ كۇمىس جۇلدەگەرى قامشىبەك قوڭقاباەۆ رەسەيلىك ماكسيم ءبابانيندى تەر شىعارماي-اق ۇتتى.
سونىمەن, ءبىر اپتا بويى قالىڭ جانكۇيەردى ارباعان پرەزيدەنت كۋبوگى ءۇشىن وتكەن حالىقارالىق تۋرنير دە مارەسىنە جەتتى. ەندى وسى جارىستا جۇلدەگەر اتانعان قازاق بوكسشىلارىنان ۇلتتىق قۇراما جاساقتالىپ, الداعى تامىز ايىندا يندونەزيادا وتەتىن ازيا ويىندارىندا ەل نامىسىن قورعايتىن بولادى.
