ەلورداداعى «استانا ەكو-پوليگون نس» كاسىپورنى جىل باسىنان بەرى 545 مىڭ توننا قالدىقتاردى قابىلداعان.
قالاداعى كوپ قاباتتى ۇيدە تۇرامىن. كۇندە تاڭ بوزارىپ اتقاننان ءۇيدىڭ ىرگەسىندە ورنالاسقان جاشىكتەردەگى قوقىستاردى جۇمىسكەرلەر ماشيناعا تيەپ, ارتىپ جاتادى. وسى كورىنىستى ءجيى كورەمىن. سوندا «قالادان كۇن سايىن قانشاما قالدىقتار شىعادى, سونىڭ بارلىعى قايدا بارادى؟» ەكەن دەپ ويلايتىن ەدىم. جاقىندا ونىڭ دەرەگىن ءبىلدىم.
ەلوردانىڭ شەتىندەگى «كوك بازاردان» ءارى قوياندى اۋىلىنا قاراي قوقىس توگىلەتىن پوليگون ورنالاسقان. كۇن سايىن قالدىقتاردىڭ ءبارىن وسىندا اكەلەدى. جوعارىدا ايتقان كاسىپورىن قالانىڭ قاتتى تۇرمىستىق جانە وندىرىستىك قالدىقتاردى قابىلداۋ جانە كومۋ جۇمىستارىمەن اينالىسادى. مۇندا جۇمىس تاۋلىك بويى جۇرگىزىلەدى. كۇنىنە ورتا ەسەپپەن 1000 توننادان استام قوقىستار مەن قالدىقتار قابىلدانادى. قالدىقتاردى ارنايى ۇياشىقتارعا تەگىستەپ كومۋ وڭاي شارۋا ەمەس. سونىڭ ءبارىن ۇجىم مۇشەلەرى ءمىنسىز اتقارىپ كەلەدى.
– ءبىز قالاداعى قالدىقتاردى قابىلداپ الاتىن بىردەن-ءبىر كاسىپورىن سانالامىز. ۇجىمدا 100-گە جۋىق قىزمەتكەر جۇمىس ىستەيدى. ولار تاۋلىك بويى تىنىمسىز ەڭبەك ەتەدى. كۇنىنە ءبىزگە قانشاما قوقىس تيەلگەن اۆتوكولىك كەلەدى. سونىڭ بارلىعىن رەت-رەتىمەن ءبولىپ وتىرامىز. سوڭعى ون جىل ىشىندە وسىندا 3 ملن اسا قوقىس كومىلگەن. ودان كەيىن بىزدە قۇرىلىس قالدىقتارىن وڭدەيتىن شاعىن تسەح جۇمىس ىستەيدى. قيىرشىق تاستاردى ىرىكتەپ, قايتا قالپىنا كەلتىرەمىز. باستى ماقساتىمىز – استانانىڭ سانيتارلىق احۋالىن قالىپتى جاعدايدا ساقتاۋ. سول ءۇشىن جان ايانباي جۇمىس ىستەپ جاتىرمىز, – دەيدى «استانا ەكو-پوليگون نس» كاسىپورنىنىڭ جاۋاپتى مامانى بەيبىتبەك ابدىكارىموۆ.
تاياۋدا «استانا-تازارتۋ» كاسىپورنى ەلوردادان التى جىل ىشىندە 1 ميلليون توننادان استام قوقىس شىعارىلعانىن جاريالادى. جالپى, قالادا جىل وتكەن سايىن قوقىس جيناۋ جۇيەسى جەتىلىپ كەلەدى. پلاستيككە ارنالعان كونتەينەرلەردى ورناتۋ جۇمىستارى دا تىڭعىلىقتى جۇرگىزىلۋدە. الداعى ۋاقىتتا قاعازعا ارنالعان جاشىكتەر قويىلماق. «استانا-تازارتۋ» جشس-ءنىڭ باس ديرەكتورى يۆان لاۆرينەنكونىڭ ايتۋىنشا, ەلوردانى اباتتاندىرۋ ەرەجەلەرىنە سايكەس, قوقىس شىعارۋ كۇنىنە ءبىر رەت جۇرگىزىلەدى, بىراق قالانىڭ قارقىندى دامىپ, ءوسىپ كەلە جاتقانىن ەسكەرە وتىرىپ, كوپتەگەن نۇكتەلەرگە كۇنىنە 2-3 رەتتەن بارۋعا تۋرا كەلگەن. بۇل كونتەينەرلەردىڭ تولىپ كەتۋىنە جول بەرمەۋ ءۇشىن جاسالادى ەكەن. سونىمەن بىرگە ەلوردادا قوقىستى ءبولىپ جيناۋ جوباسى جاقسى ناسيحاتتالۋدا.
ءبىر سوزبەن ايتقاندا, قالدىقتاردى جيناۋ, ونى كومۋ ماسەلەسى دە وڭاي شارۋا ەمەس. ءارى-بەرىدەن سوڭ, ول دەر كەزىندە جينالماسا, ادام دەنساۋلىعى مەن ەكولوگياعا تيگىزەتىن زاردابى مول بولماق. ەندەشە, ءاربىر قالدىققا بەي-جاي قارامايىق.
ازامات ەسەنجول
