كەشە نۇر-سۇلتان قالاسى ءماسليحاتىنىڭ كەزەكتەن تىس سەسسياسىندا قالانىڭ 2020-2022 جىلدارعا ارنالعان بيۋدجەتىنە ەنگىزىلگەن وزگەرىستەر مەن تولىقتىرۋلار قارالدى. ءتيىستى باياندامانى ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆ جاسادى. سەسسياعا قالا اكىمىنىڭ ورىنباسارى نۇرلان نۇركەنوۆ قاتىستى.
قالا بيۋدجەتىنە كىرىستەر سوماسىنا قاراي شىعىندار دا قالىپتاسقانىن ايتقان بايانداماشى, بۇل قارجى باسىمدىق بەرىلگەنىن باعىتتارعا, اتاپ ايتقاندا, الەۋمەتتىك سالاعا, بىلىمگە, دەنساۋلىق ساقتاۋعا ءبولىنىپ وتىرعانىن جەتكىزدى. سونىڭ ىشىندە الەۋمەتتىك سالاعا 1 ملرد 254 ملن تەڭگە جۇمساۋ قاراستىرىلعان.
– بۇل قارجىنىڭ نەگىزگى بولىگى ءجۇرىپ-تۇرۋى قيىنداعان ءى توپ مۇگەدەكتەرىنە جەكە كومەكشىلەردى تاعايىنداۋعا باعىتتالادى. ال 200 ميلليون تەڭگە پتسر زەرتحاناعا ارنالعان قۇرال-جابدىقتاردى ساتىپ الۋعا جۇمسالادى, – دەدى ق.ماڭقاراەۆ.
كولىك ينفراقۇرىلىمىن دامىتۋعا قوسىمشا 7 ملرد 270 ملن تەڭگە قاراستىرىلعان. سونىڭ 5 ملرد 451 ملن تەڭگەسى جولاۋشىلاردى تاسىمالداۋدى سۋبسيديالاۋعا بولىنەدى. قالانى گازداندىرۋ جۇمىسىنا قوسىمشا 404 ملن تەڭگە ءبولۋ تۋرالى شەشىم شىعارىلدى. بۇل قارجى گازداندىرۋ جوباسىنىڭ ەكىنشى جانە ءۇشىنشى كەزەڭدەرىن جالعاستىرۋعا باعىتتالادى. كەيبىر نىسانداردىڭ قۇرىلىسىن اياقتاۋعا 1 ملرد 74 ملن تەڭگە ءبولىنىپ وتىر.
1 ملرد 651 ملن تەڭگە قۇرىلىس قالدىقتارى پوليگونىن سالۋعا جانە ساياباقتار مەن شاعىن باقتار قۇرىلىسىن جالعاستىرىپ, اياقتاۋعا قاراستىرىلعان. قالا اۋداندارى اكىمدىكتەرىنە دە ءارتۇرلى جۇمىستارعا قوسىمشا قارجى ءبولىندى. بۇل قارجى نەگىزىنەن شاھاردى اباتتاندىرۋ مەن سانيتارلىق تازالاۋعا جۇمسالادى. ءماسليحات دەپۋتاتتارىنىڭ بولىنگەن قارجىنى يگەرۋ جونىندەگى ەسكەرتۋىنەن كەيىن بيۋدجەت بەكىتىلدى.
قالالىق تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى اسىلبەك ەسەنباەۆ مەملەكەت مۇقتاجدىعى ءۇشىن الىناتىن جەر تەلىمدەرى تىزبەسىمەن تانىستىردى. ونىڭ مالىمدەۋىنشە, 9 نىسان قۇرىلىسىنا ارنالعان 59 جەر تەلىمى بويىنشا ءتيىستى جۇمىستار جۇرگىزىلىپ جاتىر. بۇل تەلىمدەردىڭ جالپى سوماسى 131 ملن تەڭگەنى قۇرايدى.
جەر تەلىمدەرى تاۋەلسىزدىك داڭعىلى مەن شارل دە گولل كوشەسى قيىلىسىنداعى, ش.قۇدايبەردى مەن ماناس كوشەلەرى اۋدانىنداعى, ش.قوسشىعۇلۇلى مەن جامبىل كوشەلەرى قيىلىسىندا جاپسارلاستىرا سالىنعان ورىنجايلار مەن پاركينگى بار كوپپاتەرلى تۇرعىن ءۇي كەشەندەرى قۇرىلىسىنا, س-189 كوشەسىندەگى 600-800 ورىندىق كوپسالالى اۋرۋحانانى سالۋعا, تۇران داڭعىلى مەن №24 كوشەسى قيىلىسىنداعى ورتا مەكتەپ قۇرىلىسىنا ارنالادى.
ءتيىستى جوبا بويىنشا سارىارقا داڭعىلى بويىنداعى كوپىردەن باستاپ «كوكتال» تۇرعىن الابىنا دەيىنگى ەسىل وزەنىنىڭ ارناسى بەسىنشى كەزەك اياسىندا قايتا جاڭارتىلادى. ى.التىنسارين مەن گەتە كوشەلەرى قيىلىسىنداعى جانە ش.قوسشىعۇلۇلى, 8 مەكەنجايىنداعى اۋماقتار اباتتاندىرىلادى. ۆ.ۆيشنەۆسكي كوشەسى, 10 مەكەنجايى بويىنداعى ينجەنەرلىك جەلى جاڭارادى.
