ەلورداداعى تۇرعىن ءۇي ورتالىعىنا تاجىريبە الماسۋ ءۇشىن رەسەيلىك دەلەگاتسيا كەلدى. كەزدەسۋدە الەۋمەتتىك تۇرعىن ۇيمەن قامتاماسىز ەتۋ, اپاتتىق جاعدايدا تۇرعان ۇيلەردى ءسۇرۋ, مۇلىك يەلەرىنىڭ بىرلەستىكتەرىن قۇرۋ, كوپپاتەرلى تۇرعىن ۇيلەر مەن ليفت جابدىقتارىن جاڭارتۋ جانە جوندەۋ سياقتى وزەكتى ماسەلەلەر تالقىلاندى.
قالا اكىمىنىڭ ورىنباسارى نۇرلان نۇركەنوۆ قۇرىلىستىڭ جوعارى قارقىنىنا قاراماستان, ازاماتتاردى تۇرعىن ۇيمەن قامتاماسىز ەتۋ نۇر-سۇلتان قالاسى اكىمدىگىنىڭ تۇراقتى باقىلاۋىنداعى ماڭىزدى ماسەلەلەردىڭ ءبىرى بولىپ قالاتىنىن ايتتى.
«ەلوردا حالقىنىڭ ءوسۋىن ەسكەرە وتىرىپ, كوممۋنالدىق تۇرعىن ءۇي قورىنان تۇرعىن ۇيگە مۇقتاجدار سانى دا وسۋدە. ەگەر 2018 جىلى 110 الەۋمەتتىك پاتەر بەرىلسە, 2019 جىلى 2900 پاتەر بەرىلسە, وتكەن جىلى قولجەتىمدى تۇرعىن ءۇي سانى بىرنەشە ەسەگە ارتتى. 7000-نان استام پاتەر بەرىلدى» دەدى ول.
اكىم ورىنباسارىنىڭ ايتۋىنشا, بيىلعى جىلى بارلىق قارجىلاندىرۋ كوزدەرى ەسەبىنەن 10000 پاتەرلىك 3,2 ملن شارشى مەتر تۇرعىن ءۇيدى پايدالانۋعا بەرۋ جوسپارلانعان.
جيىن بارىسىندا نۇر-سۇلتان قالاسىنىڭ تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى ءانۋار سايپوۆ دەلەگاتتارعا تۇرعىن ءۇي ورتالىعىنىڭ جۇمىسىمەن تانىستىردى. ەلورداداعى رەنوۆاتسيا باعدارلاماسى باس جوسپار مەن قالانىڭ ىقشام قۇرىلىسى بويىنشا كەشەندى جوسپار اياسىندا جۇزەگە اسىرىلىپ جاتقانىن جەتكىزدى.
«جوبانىڭ ءبىرىنشى كەزەڭى 2013-2017 جىلدار ارالىعىندا ءوتتى. سول كەزدە 3519 پاتەرلىك 228 اپاتتى ءۇي بۇزىلدى. 2018 جىلدان باستاپ 2022 جىلعا دەيىنگى كەزەڭگە ەسەپتەلگەن ەكىنشى كەزەڭدى ىسكە اسىرۋ شەڭبەرىندە اپاتتى جاعدايداعى 54 ءۇي – 874 پاتەردىڭ تۇرعىندارىن كوشىرۋ جوسپارلانعان. 2018-2020 جىلدارى 492 پاتەرگە 30 ءۇيدىڭ تۇرعىندارى كوشىرىلدى. 2021-2022 جىلدارعا 382 پاتەرلىك 24 ءۇي جوسپارلانعان. ونىڭ ىشىندە بيىل 257 پاتەرلى 8 اپاتتى ءۇي اياقتالادى. قالعان اپاتتى ۇيلەر بويىنشا ءتيىستى جۇمىستار جۇرگىزىلۋدە» دەدى ءا.سايپوۆ.
نۇر-سۇلتان قالاسىنىڭ تۇرعىن ءۇي ورتالىعىندا قولجەتىمدى باسپانا تۋرالى تولىق مالىمەت پەن مامانداردىڭ كەڭەسىن الۋعا بولادى.
