قازىرگى الەمدە بولىپ جاتقان قارقىندى وزگەرىستەر ەلىمىزدەگى ءبىلىم بەرۋ جۇيەسىن دە بەيجاي قالدىرماۋدا. پەداگوگ ءبىلىم الۋشىلار مەن تاربيەلەنۋشىلەردىڭ ومىرلىك داعدىلارىن, قۇزىرەتتەرىن, وزدىگىنەن جۇمىس ىستەۋىن, شىعارماشىلىق قابىلەتتەرىن دامىتۋعا جانە سالاماتتى ءومىر سالتى مادەنيەتىن قالىپتاستىرۋعا مىندەتتى.
ول ءۇشىن الەمدىك ءبىلىم بەرۋ جۇيەسىندەگى جۇرگىزىلىپ جاتقان رەفورمالاردى تالداپ, سولاردىڭ ىشىنەن وڭ ناتيجە بەرگەن, ءبىزدىڭ حالىقتىڭ مەنتاليتەتىنە جاقىن, ۇلتتىق قۇندىلىقتارىمىزعا قايشى كەلمەيتىن تاجىريبەنى تاڭداۋىمىز كەرەك. ماعجان جۇماباەۆ ءوز ەڭبەگىندە «بالا تاربيەسى – ءبىر ونەر, ونەر بولعاندا اۋىر ونەر, جەكە ءبىر عىلىم يەسى بولۋدى تىلەيتىن ونەر. بالانى دۇرىس تاربيە قىلۋ ءۇشىن اركىمنىڭ ءوز تاجىريبەسى جەتپەيدى. باسقا ادامداردىڭ تاجىريبەسىمەن تانىسۋ كەرەك. سول باسقا ادامداردىڭ مايدانىنداعى تاجىريبەلەرىن كورسەتكەن جەكە ءبىر پانمەن, ياعني تاربيە پانىمەن تانىس بولۋ كەرەك» دەگەن بولاتىن.
ءۇش جىل قاتارىنان مەكتەبىمىز LS بويىنشا ناتيجەلى جۇمىس جاساۋدا. مەكتەپتە 15 جۇمىس توبى قۇرىلىپ, وسى توپتارعا جەتەكشىلىك جاساۋعا, جۇمىستى ۇيلەستىرۋگە دەڭگەيلىك كۋرستاردان وتكەن (ىلگەرى جانە ەكىنشى دەڭگەي) 15 سۋپەرۆايزەر تاعايىندالدى. وسىلايشا ۇجىمنىڭ 100 پايىزى LS توبىنا تارتىلدى. ويلاستىرا كەلە, ايىنا ءبىر رەت ساباقتى زەرتتەۋ كۇنى تاعايىندالدى. وسى ۋاقىتتا بارلىق مەكتەپتە جاپپاي ءبىر مەزگىلدە زەرتتەۋ ساباقتارى ءوتتى. كەلەسى كۇنى فاسيليتاتوردىڭ ء(ار ساباقتا فاسيليتاتور اۋىسىپ تۇرادى) جەتەكشىلىگىمەن ساباق تالدانىپ, سىندارلى كەرىبايلانىس بەرىلىپ, الداعى ساباقتى جوسپارلاۋ جۇزەگە استى.
جوسپارلانعان 90 ساباق تولىق ءوتتى. ناتيجەسىندە زەرتتەۋ سىنىپتارىنداعى ءبىلىم ساپاسى 1,8-4% ارالىعىندا كوتەرىلدى. اقپان ايىندا سۋپەرۆايزەرلەر ەسەبى تىڭدالىپ, تاجىريبە الماسۋ بولدى.
2019-2020 وقۋ جىلىندا استانا قالاسى بويىنشا SHARE جوباسىنداعى قاناتقاقتى مەكتەپتەر قاتارىنا بىرنەشە ءبىلىم ورداسى ىرىكتەلدى. ونىڭ اراسىندا ءاليحان بوكەيحان اتىنداعى №76 مەكتەپ-ليتسەيى دە بار. التى اي ىشىندە ءۇش workshop ءوتتى. ءىس-ارەكەتتەگى زەرتتەۋدى ۇيىمداستىرۋ جانە ونى جۇزەگە اسىرۋ, جۇيەگە اينالدىرۋ, باعامداپ وتىرۋ ءۇشىن بىرلەسە جۇمىس جاساۋ, كوللابوراتيۆتىك ورتا قۇرۋ ماڭىزدى. ەندىگى ماسەلە LS-ءدى AR ارقىلى جۇزەگە اسىرۋ بولدى. ول ءۇشىن LS سىنىپتارىنىڭ ىشىنەن 5ا جانە 5گ سىنىپتارىن اR بويىنشا فوكۋس توپتارى رەتىندە تاڭداپ الىندى. بۇل ەكى سىنىپقا ساباق بەرەتىن بارلىق ءپان مۇعالىمدەرى, SHARE جوباسىنىڭ 5 جەتەكشىسى مەن 13 ەرىكتىلەرى اپتاسىنا 1 رەت باس قوسىپ, سىنىپتاعى جالپى احۋال مەن بايقاعان وزگەرىستەردى ورتاعا سالىپ, كەلەسى قادامدى جوسپارلاپ وتىردى. بۇل جۇمىس ءالى دە جالعاسپاق.
كeمبريدج ۋنيۆەرسيتەتىمەن بىرلەسە جۇزەگە اسىپ جاتقان SHARE جوباسى ءار پەداگوگتىڭ بىلىكتىلىگىن كوتەرىپ قانا قويماي, جۇمىسىنا دەگەن كوزقاراسىن وزگەرتتى.
ساباقتى زەرتتەۋدەن ءىس-ارەكەتتى زەرتتەۋگە وتكەننەن بەرى پەداگوگتار قاۋىمداستىعى اشىقتىق پرينتسيپىندە جۇمىس جاساۋعا كوشتى. يدەيالار بازاسى كەڭەيۋدە. مۇعالىمدەر ءبىرىن-بىرىنە سىندارلى كەرىبايلانىس بەرۋگە جانە ونى دۇرىس قابىلداۋعا ماشىقتانعان. LS مەن SHARE جوباسىنداعى ءار مۇعالىم وزگەرىستى وزىنەن باستاپ, سول ەنەرگەتيكاسىن جان-جاعىنا شاشۋدا. سونىڭ ارقاسىندا ءبىلىم الۋشىلاردا دا كوپتەگەن وزگەرىستەر بايقالدى. ءپان مۇعالىمى مەن وقۋشى اراسىندا ىنتىماقتاستىق ورتا ورنادى, ناتيجەسىندە ساباققا بەلسەندىلىك ارتتى, وقۋشىلار تاقىرىپقا قاتىستى ويلارىن ءبىلدىرىپ, ءوز پىكىرلەرىن فاكتىلەر كەلتىرە وتىرا دالەلدەيتىن دەڭگەيگە جەتتى. ەڭ كەرەمەتى, قازىرگى تاڭدا پەداگوگيكالىق ۇجىمنىڭ باسىم كوپشىلىگىندە وقۋشى «ءۇنىن» ەستىپ قانا قويماي, زەرتتەپ, سەزىپ, تىڭداۋ داعدىسى قالىپتاسقان. وقۋشىنىڭ دامۋىنا قولايلى ورتا جاساۋ بۇل قازىرگى تاڭداعى باستى مىندەتىمىز بولىپ وتىر
شايزات تاشەنوۆا,
ءاليحان بوكەيحان اتىنداعى №76 مەكتەپ-ليتسەيى
ديرەكتورىنىڭ
ورىنباسارى, باستاۋىش وقىتۋ مۇعالىمى
