ۇلتتىق اكادەميالىق كىتاپحانادا حالىقارالىق nۇركى اكادەمياسىنىڭ ۇيىمداستىرۋىمەن بەلگىلى عالىم, مەملەكەت جانە قوعام قايراتكەرى مىرزاتاي جولداسبەكوۆتىڭ «ۇلى دالا مادەنيەتى» جانە «قورقىت اتا» اتتى كىتاپتارىنىڭ تانىستىرىلىمى بولدى.
جيىنعا مەملەكەتتىك حاتشى قىرىمبەك كوشەرباەۆ, پرەمەر-مينيستر ورىنباسارى بەردىبەك ساپارباەۆ جانە زيالى قاۋىم وكىلدەرى قاتىستى. شارا باسىندا زەردەلى وقىرمانعا جول تارتقان جيناق تۋرالى ايتۋلى عالىمنىڭ ءوزى كەڭىرەك ايتىپ بەردى.
– ادەبيەتتەگى كونە داۋىرلەر تاريحى تۋرالى ەڭبەكتەرىم ءار جەردە جازىلىپ, شاشىلىپ ءجۇردى. بىردە مۇحتار قۇل-مۇحاممەد ءىنىم جولىققاندا «ۇلى دالا ادەبيەتى» دەگەن كىتاپتى نەگە جازبايسىز. ءبارى دايىن تۇر عوي» دەدى. سول ماعان قامشى بولىپ, وسى ەڭبەكتەردى جيىپ-تەرىپ, حالىقارالىق تۇركى اكادەمياسىنا بەردىم.
قازىر ءبارى ايتۋعا جەڭىل. كەزىندە وڭاي بولعان جوق. بۇرىن مەكتەپتە قازاق ادەبيەتىنىڭ تاريحى 18-عاسىردا ءومىر سۇرگەن بۇقار جىراۋدان باستالادى دەيتىن. ونىڭ اۆتورى قازاققا بەلگىلى اكادەميك قاجىم جۇماليەۆ ەدى. سول كەزدە ءوزى مومىن, بىراق ىشتەي بۇلقىنىپ جۇرەتىن بەيسەنبەي كەنجەباەۆ اعامىز: «جوق ولاي ەمەس, ادەبيەت حالىقپەن بىرگە تۋادى, بىرگە قالىپتاسادى, بىرگە داميدى. قازاق ادەبيەتىنىڭ تاريحى ارعى جاقتان كەلە جاتىر» دەپ دالەلدەدى. مەنى اسپيرانتۋراعا الىپ قالىپ, ەجەلگى تۇركى ءداۋىرىن زەرتتەۋگە تاقىرىپ بەردى. سوندىقتان العاشقى جيناققا كونە تۇركى جازبا ەسكەرتكىشتەرىنە قاتىستى زەرتتەۋلەرىمەن بىرگە قازاق اۋىز ادەبيەتىنىڭ بىرقاتار مۇرالارى قامتىلدى.
ال «قورقىت اتا» كىتابى تۇركى تەكتەس حالىقتاردىڭ باعىنا ساقتالىپ قالعان دۇنيە دەپ ايتامىن. قورقىت اتانىڭ كىندىك قانى مەن ماڭگىلىك تىنىس تاپقان جەرى – قازاق دالاسى. بۇگىنگە دەيىن «قورقىت اتانىڭ» ەكى نۇسقاسى ساقتالعان. ونىڭ ءبىرىنشىسى – ۆاتيكان كىتاپحاناسىندا, ەكىنشىسى – درەزدەن كىتاپحاناسىندا. بۇل كىتاپ بۇعان دەيىن ورىس, تۇرىك, ازەربايجان تىلدەرىنە اۋدارىلعان. كەزىندە اۋەلبەك قوڭىراتباەۆ اعامىز ورىس تىلىنەن قازاقشاعا ءتارجىمالادى. كەيىن ونى شاكىر ىبىراەۆ باستاعان عالىمدار دا تۇرىك تىلىنەن اۋداردى. مەن ەندى «قورقىت اتا» كىتابىن قاسىما گۇلىم شاديەۆا دەگەن قارىنداسىمدى الىپ, درەزدەن نۇسقاسىنان جاڭاشالادىم, – دەدى اۆتور.
