«التى الاشتىڭ يگى جاقسىسى باس قوسسا, توردەگى ورىن ۇستازدىكى» دەپتى ماعجان. مۇعالىم بولۋ جۇرەگىڭدى قاتىگەزدىكپەن كىرلەتپەي, سوزىڭدە قاسيەتتى, ىسىڭدە ادالدىقتى, جۇزىڭدە جىلىلىقتى ساقتاي ءبىلۋ. ءبىر كەزدەرى وسى ءبىر باعا جەتپەس ماماندىقتىڭ قادىرىن قاشىرىپ, بەدەلىن ءتۇسىرىپ الدىق. بيىلدىڭ ەڭ ماڭىزدى جاڭالىعى مۇعالىمدەرگە مەملەكەت تاراپىنان كورسەتىلگەن قولداۋدىڭ كوبەيگەندىگى ەكەنى داۋسىز. ءبىز بۇگىن ەلىمىزدەگى ەڭ ۇزدىك ەلوردالىق مۇعالىم – «قازاقستان مۇعالىمى-2020» ۇلتتىق سىيلىعىنىڭ يەگەرى, نۇر-سۇلتانداعى نازارباەۆ زياتكەرلىك مەكتەبى حيميا ءپانىنىڭ مۇعالىمى, «الەم مۇعالىمى» جاھاندىق سىيلىعىنىڭ قازاقستانداعى ەلشىسى دينارا بەيسەمباەۆا تۋرالى ايتپاقپىز.
دينارا توقتارقانقىزىنىڭ ۇستازدىق جولداعى ەڭبەك ءوتىلى – 15 جىل. ول سەمەي مەملەكەتتىك پەداگوگيكالىق ينستيتۋتىن بيولوگيا جانە حيميا مۇعالىمى ماماندىعى بويىنشا بىتىرگەننەن كەيىن, العاشقى ەڭبەك جولىن وڭىردەگى «جاس ۇلان» اسكەري مەكتەبىندە باستادى. الدىنداعى وقۋشى مەن ساباق بەرەتىن ءپانىن شەكسىز جاقسى كورۋ مۇعالىمنىڭ ومىرلىك ماقساتىنا اينالىپ كەتكەن. «شىعىس قازاقستان وبلىسىنىڭ كىشكەنتاي عانا شار قالاسىندا تۋىپ ءوستىم. بالا كۇنىمنەن بيولوگيا ءپانىنىڭ مۇعالىمى بولۋدى ارماندايتىنمىن. ويتكەنى ماعان جاندىكتەر مەن وسىمدىكتەردى سىرتتاي باقىلاۋ, ۇيدەگى قۇستار مەن ءتورت تۇلىككە قاراۋ ۇنايتىن. ستۋدەنت كەزىمدە جىل سايىن جازدا قاراعايلى ورماندا وتەتىن تاجىريبە جۇمىستارىمىزدى اسىعا كۇتەتىنمىن. تابيعات اياسىندا ءوزىمدى وسى ورتانىڭ قورعاۋشىسى سەزىندىم» دەپ دينارا بەيسەمباەۆا وتكەن كۇندەرىن ەسىنە الدى.
اباي قۇنانبايۇلىنىڭ «ادامنىڭ ادامگەرشىلىگى جاقسى ۇستازدان بولادى» دەگەن ءسوزى ءبىزدىڭ كەيىپكەرىمىزدىڭ وزىنە عانا ەمەس, ءتالىم بەرىپ, جول نۇسقاعان ومىرلىك ۇستازدارىنا دا قاتىستى ايتىلعانداي. سەبەبى دينارا توقتارقانقىزىنىڭ بۇگىنگى جەتىستىگى – پەداگوگيكالىق جولدى تاڭداۋعا كومەكتەسكەن ساۋلە جىلكىباەۆا مەن ولەگ پيلگۋك سىندى وقىتۋشىلارىنىڭ ارقاسى. دەگەنمەن ۇستازدارىنان وزعان شاكىرتتىڭ وسال ەمەس ەكەنى دە انىق. قازىر ول نزم-دە حيميانى اعىلشىن تىلىندە وقىتا وتىرىپ, عىلىمي-زەرتتەۋ جانە تاجىريبەلىك-كونسترۋكتورلىق جۇمىستارعا بەلسەنە قاتىسىپ ءجۇر. سونداي-اق دارىندى بالالارعا ارنالعان ءبىلىم بەرۋ قاجەتتىلىكتەرى باعدارلاماسىن جاساۋعا قاتىستى. ونىڭ وقۋشىلارى – حالىقارالىق وليمپيادالار مەن عىلىمي جارىستاردىڭ جەڭىمپازدارى مەن جۇلدەگەرلەرى.
قايىرىمدى ۇستاز وسى بايقاۋدان يەلەنگەن اقشالاي جۇلدەسىنىڭ 1,5 ملن تەڭگەسىن اۋىل مەكتەبىنە ارنادى. ول جاقىندا عانا قاراعاندى وبلىسىنا قاراستى احمەت اۋىلىنداعى ورتا مەكتەپتىڭ حيميا كابينەتىنە زەرتحانالىق قۇرال-جابدىقتار الىپ بەردى. ءوزى دە اۋىل مەكتەبىنەن تۇلەپ ۇشقاندىقتان, مۇنداي مەكتەپتەردىڭ جاعدايىمەن ءجىتى تانىسپىن دەيدى قولى اشىق مۇعالىم. «جاھاندىق سىيلىقتىڭ باستى قاعيداتى – قوعامعا قىزمەت ەتۋ. بايقاۋ شارتى بويىنشا ساۋالناما تولتىرۋ كەزەڭىندە-اق جۇلدە قورىن قايدا جاراتار ەدىڭىز دەگەن سۇراققا اۋىل مەكتەبىنە قولداۋ كورسەتەر ەدىم دەپ جاۋاپ بەرگەنمىن. كوروناۆيرۋس ءبىزدىڭ ەلىمىزدە ءالى دە عالىمداردىڭ, بيوتەحنولوگتار مەن حيميكتەردىڭ از ەكەنىن كورسەتىپ بەردى. سوندىقتان اۋىل مەكتەپتەرىندە عىلىممەن اينالىسۋعا تامشىداي بولسا دا سەپتىگىم تيسە – ازاماتتىق بورىشىمنىڭ وتەلگەنى» دەدى ول.
دينارا بەيسەمباەۆا بولاشاقتا اۋىلداعى ارىپتەستەرىنە ادىستەمەلىك قولداۋ كورسەتۋدى جوسپارلاپ وتىر. «ساندىق عىلىم – ۇيدە» ەلەكتيۆتى كۋرسىنىڭ اۆتورى رەتىندە ول حيميا جانە بيولوگيا پاندەرىنىڭ مۇعالىمدەرىمەن تاجىريبەسىن بولىسپەك. سونداي-اق زەرتتەۋدى ساندىق فورماتتا ۇيىمداستىرۋ بويىنشا ەلەكتيۆتى كۋرس باعدارلاماسىن ازىرلەۋدە.
ءيا, ۇستاز – ۇلت بولاشاعىنىڭ ايناسى. وتانى ءۇشىن شىن كۇيىنىپ, وقۋشىسى ءۇشىن شىرىلداپ جۇرەتىن دينارا توقتارقانقىزى سياقتى ءبىلىم سالاسىنىڭ بەتكە ۇستارلارى كوبەيسە, ۇلت بولاشاعىنىڭ دا جارقىن بولارى ءسوزسىز.
كوكتەم قارقىن
