«جاعالاۋ» قۇرىلىسىنا جان ءبىتتى

ەلوردا اكىمى التاي كولگىنوۆ كەشە تاڭەرتەڭگى ارالاۋ كەزىندە قالاداعى «جاعالاۋ-4» جانە «جاعالاۋ-3» تۇرعىن ءۇي كەشەنىنىڭ قۇرىلىسىنا باردى.ءبىرىنشى قۇرىلىس نىسانى 2013 جىلى باستالۋى كەرەك ەدى, الايدا قۇرىلىس جۇمىستارى تەك وسى جىلى عانا قولعا الىنىپ وتىر. تۇرعىن ءۇي كەشەنى «ەلوردا قۇرىلىس كومپانياسىنىڭ» قاتىسۋىمەن «نۇرلى جەر» باعدارلاماسى اياسىندا سالىنادى. مۇنداعى ۇلەسكەرلەردىڭ سانى – 262 ادام. قازىر قۇرىلىس سالۋشىنىڭ قولىندا بارلىق قاجەتتى قۇجاتتار بار. ءۇيدى 2021 جىلى پايدالانۋعا بەرۋ جوسپارلانۋدا.
ەكىنشى نىسان «جاعالاۋ-3» تۇرعىن ءۇي كەشەنى بولدى. مۇندا ءۇيدى ينجەنەرلىك جەلىلەرگە قوسۋ جۇمىستارى جۇرگىزىلۋدە. ەلەكتر, جىلۋ جانە سۋمەن جابدىقتاۋ, جوندەۋ جۇمىستارى اياقتالۋ ساتىسىندا. قالا اكىمىمەن كەزدەسۋ بارىسىندا تۇرعىندار جۇمىستار تولىق ءجۇرىپ, ءۇيدىڭ كوز الدىندا وزگەرىپ جاتقانىن اتاپ ءوتتى. بۇل تۇرعىن ءۇي كەشەنىندە 300-دەن اسا ۇلەسكەر بار. قالادا بارلىعى 51 اياقتالماعان نىسان (76 ءۇي) بولدى. بيىل قالا اكىمدىگى 3 تۇرعىن ءۇي كەشەنىن (5 ءۇي) پايدالانۋعا بەرۋ بويىنشا جۇمىستار جۇرگىزدى. اعىمداعى جىلدىڭ سوڭىنا دەيىن تاعى 7 ءۇي قۇرىلىسىن اياقتاۋ جوسپارلانىپ وتىر.