استانادا جاڭا SOVA فوتو-بەينەجازبا كامەراسى پايدا بولدى. ول قابانباي باتىر داڭعىلى بويىنداعى اۆتوتۇراق اۋماعىندا ورناتىلدى. العاشقى كامەرا سىناق رەجيمىندە جۇمىس ىستەپ تۇر.
«استانا تۇراق كەڭىستىگى» مەكەمەسىنىڭ مالىمەتىنشە, بۇل كامەرا جول ەرەجەسىن بۇزۋدىڭ 20-دان استام ءتۇرىن, سونىڭ ىشىندە زاڭسىز تۇراق پەن كولىكتىڭ زاڭسىز توقتاۋىن دا جازا الادى.
SOVA – جول قوزعالىسى ەرەجەلەرىن بۇزۋدىڭ الۋان ءتۇرىن باقىلايتىن جانە ولاردى بىردەن تىركەيتىن ينتەللەكتۋالدى مونيتورينگ جۇيەلەرىنىڭ كامەراسى. «اقىلدى» جابدىق تاۋلىك بويى جۇمىس ىستەيدى, ءتىپتى قاراڭعىدا دا زاڭ بۇزۋشىلىقتاردى انىقتايدى جانە كۋزوۆتىڭ كىشكەنە بولىگىنەن-اق كولىكتىڭ ءتۇرىن انىقتاي الادى. بۇل اقپارات جاساندى ينتەللەكت پەن ماشينالىق كورۋ تەحنولوگيالارىن قولدانا وتىرىپ وڭدەيتىن ينتەللەكتۋالدى پلاتفورماعا بەرىلەدى. الىنعان اقپارات اۆتوماتتى تۇردە قۇقىق قورعاۋ ورگاندارىنا جىبەرىلەدى.
قازىر ول سىناق رەجيمىندە جۇمىس ىستەيدى. جاڭا جابدىقتى قالا بيلىگى ماقۇلداسا, ەلورداداعى كوممۋنالدىق اۆتوتۇراقتاردىڭ قوزعالىس وتە كوپ جەرلەرىندە دە وسىنداي كامەرالار پايدا بولادى.
«استانا تۇراق كەڭىستىگى» كومپانياسىنىڭ ديرەكتورى شىڭعىس دوسىباەۆ جاڭا SOVA كامەراسىنىڭ قىزمەتى تۋرالى قىسقاشا تۇسىنىكتەمە بەردى.
– ەرەجەنى بۇزا وتىرىپ قويىلعان ءبىر كولىك بۇكىل قوزعالىستى ۇزاق ۋاقىتقا بوگەپ تاستاۋى مۇمكىن. مۇنداي زاڭ بۇزۋشىلىقتاردى ونلاين رەجيمدە انىقتاۋ كولىكتەردى زاڭسىز توقتاتۋ نەمەسە تۇراققا قويۋ سانىن ازايتۋعا جانە قالا كوشەلەرىندەگى كولىك وتكىزۋ قابىلەتىن ۇلعايتۋعا مۇمكىندىك بەرەدى, – دەدى شىڭعىس دوسىباەۆ.
سونىمەن قاتار SOVA كامەراسى جول بەلگىلەرىنىڭ جاعدايىن باقىلايدى جانە قالا كوشەلەرىندەگى كەپتەلىس پەن كولىك تۇراقتارى تۋرالى ستاتيستيكا اقپاراتىن جينايدى.
كامەرالار كوشەنىڭ تسيفرلىق ۇلگىسىن كورىپ, كولىكتىڭ بەلگىلى ءبىر بولىكتەرىن باسقا زاتتار ۋاقىتشا جاسىرىپ تۇرسا دا انىقتايدى.
فوتو جانە بەينەجازبا كامەرالارىنىڭ تەحنيكالىق جاعدايىن «استانا تۇراق كەڭىستىگى» مەكەمەسىنىڭ ماماندارى قاداعالايدى.
