باس قالا تۇرعىندارى الاش تاسجولى بويىنداعى كوپىردىڭ كۇردەلى جوندەلۋى ۇزاققا سوزىلىپ كەتكەنىنە نارازى. ول جەردەگى جۇمىستىڭ قاشان اياقتالاتىنى جونىندە قالالىق كولىك جانە جول-كولىك ينفراقۇرىلىمىن دامىتۋ باسقارماسىنىڭ ءباسپاسوز قىزمەتى حابارلادى.
حالىق اراسىندا «بۇكىر» دەگەن اتاۋى بار كوپىر بۇعان دەيىن اپاتتى دەپ تانىلىپ, ونىڭ سول جاعىنداعى قوزعالىس 2021 جىلدىڭ قاڭتار ايىنان باستاپ اۆتوكولىكتەر ءۇشىن جابىلعان بولاتىن. ول ارقىلى قوزعالىس 2022 جىلدىڭ جازىندا اشىلدى. بۇگىندە وتكەلدىڭ وڭ جاعى جوندەلدى.
ول كەزدە كوپىر اپاتتى دەپ تانىلىپ, ونىڭ ءبىر بولىگىنە, اتاپ ايتقاندا, جول وتپەسىنىڭ اۆاريالىق بولىگىنە كۇردەلى جوندەۋ جۇرگىزىلگەن ەدى. جوبا بويىنشا 140 مەتر كوپىر سالىندى. سونىمەن قاتار كوپىردىڭ ەكى جاعىنان 700 مەتردەن اسفالت توسەلدى. سونداي-اق مەتالل ەستاكادانىڭ ءجۇرۋ بولىگى جوندەلگەن بولاتىن.
استاناداعى الاش تاسجولى بويىنداعى كوپىردى جوندەۋ جۇمىسى سودان بەرى ءالى دە جالعاسۋدا. قالا تۇرعىندارى ونى تەزىرەك اياقتاۋدى سۇراپ وتىر.
قالالىق كولىك جانە جول-كولىك ينفراقۇرىلىمىن دامىتۋ باسقارماسىنىڭ ءباسپاسوز قىزمەتى حابارلاعانداي, الاش تاسجولىنداعى كوپىردىڭ سول جاعىندا دەفورماتسيالىق تىگىستە اسفالتبەتون جابىنىنىڭ ءىشىنارا دەفورماتسياسى پايدا بولدى. وسىعان بايلانىستى كوپىر اپاتتى دەپ تانىلدى جانە سول جاقتاعى كولىك قوزعالىسى جابىلدى. بۇگىندە اۆتوكولىكتەر جول وتپەسىنىڭ وڭ جاعىمەن ەكى جاققا دا قاتىناۋدا.
باسقارما مالىمەتىنشە, كوپىردەگى تولىققاندى قوزعالىس وسى جىلدىڭ كۇزىندە قايتا باستالادى.
«مەملەكەتتىك ساراپتامانىڭ وڭ قورىتىندىسىن العان ءتيىستى جوبا ازىرلەندى. قازىرگى ۋاقىتتا جۇمىس جۇرگىزىلۋدە. كۇزدە جول وتپەسىنىڭ سول جاعىندا دا قوزعالىس قامتاماسىز ەتىلەدى دەپ جوسپارلانىپ وتىر» دەلىنگەن ۆەدومستۆو تاراتقان حابارلامادا.
