وتكەن عاسىردىڭ 80-ءشى جىلدارى اۋعانستاندا بولعان سوعىس جايلى كوپ ايتىلماسا دا, كەڭەس اسكەرى جاۋىنگەرلەرىنىڭ باستان كەشكەن قاسىرەتى تۋرالى از-كەم حابارىمىز بار ەدى.
كەشە عانا باسپادان شىققان «قاندى كويلەك قارۋلاس» اتتى كىتاپ قولىمىزعا تيگەندە سول سوعىستىڭ تاعى ءبىراز اقيقاتىنا قانىعىپ قالدىق. اۆتورى – اۋعان قاسىرەتىن كورگەن جاۋىنگەردىڭ ءوزى. ءبىزدىڭ ارىپتەسىمىز, «استانا اقشامى» گازەتى باس رەداكتورىنىڭ ورىنباسارى عالىم قوجابەكوۆ. كىتاپتىڭ كىرىسپەسىندە جازىلعان اۆتوردىڭ مىنا ءبىر سوزدەرى ەرەكشە كوزگە ءتۇستى: «وسى كىتاپتا اۋعانستاندا بولعان الاپات سوعىس جايلى كوڭىلىمنىڭ سىرى, جۇرەگىمنىڭ مۇڭى بار. ءبىزدىڭ جاۋىنگەرلەردىڭ باستان كەشكەن قاسىرەتىن بالالارىمىز, نەمەرەلەرىمىز, شوبەرەلەرىمىز كورمەسە ەكەن… وسى ەڭبەگىمدى اۋعاستاندا جۇرگەندە مەنىڭ اماندىعىمدى تىلەپ, جاندارىن شۇبەرەككە ءتۇيىپ, الاڭداپ-ەلەڭدەپ جۇرگەن اياۋلى اناشىم قياش پەن اسقار تاۋداي اكەم قوسىمجاننىڭ رۋحىنا ارنادىم» دەگەن جاۋىنگەر-جۋرناليست شىن مانىندە تەبىرەنىپ جازعان ەكەن.
كىتاپتىڭ نەگىزگى ارقاۋىندا اۋعانستاندا ەرلىگىمەن كوزگە تۇسكەن, اسكەردەن كەيىن جاستار اراسىندا اسكەري-پاتريوتتىق جۇمىس جۇرگىزگەن, الايدا سوعىستىڭ سالدارى سالعان سىرقاتىنان جازىلماي دۇنيەدەن ەرتە ءوتىپ كەتكەن قاندى كويلەك قارۋلاسى قازبەك ابدراحمانوۆ جايىندا جازىلادى. سونداي-اق بۇگىندە ورتامىزدا جۇرگەن مايدانگەر دوستارى تۋرالى دا تولعانادى.
تاعىلىمدى باسىلىمدا اۋعانستاندا ينتەرناتسيونالدىق بورىشىن وتەۋ كەزىندە قازا تاپقان قازاقستاندىق جاۋىنگەرلەردىڭ ەسىمدەرى تۇگەلدەي اتالىپتى. «ەرلىككە مىڭ تاعزىم!» دەگەن وسىنداي بولار دەگەن ويعا كەنەلدىك.
استانا قالاسىنداعى «وتان سوعىسى مۇگەدەكتەرىنە ارنالعان ورتالىق كلينيكالىق گوسپيتال» كىتاپحاناسىندا وتكەن تۇساۋكەسەر شاراسىنا قاتىسقان مايدانگەر جىگىتتەرگە قاراپ تۇرىپ, وتان الدىنداعى انتىنا ادالدىق تانىتقان جاۋىنگەر-ينتەرناتسيوناليست اعالارعا ريزاشىلىق بىلدىردىك.
