كولىك جۇرگىزۋشىلەرگە بالالاردىڭ دا ايتارى بار. ەلوردالىق جەتكىنشەكتەر وزدەرىنىڭ جۇرەكجاردى ۇسىنىس-تىلەكتەرىن سۋرەتتەر ارقىلى بەينەلەپتى. مۇنداي ايرىقشا شارانى استانا قالاسىنىڭ ءىىد جەرگىلىكتى پوليتسيا قىزمەتى ۇيىمداستىردى.
جاياۋ جۇرگىنشىلەردىڭ ىشىندە ەڭ بەيقامى – بالالار. ولار اپات اياق استىندا دەپ ويلامايدى. الدى-ارتىنا قاراماي, جولعا دا جۇگىرىپ شىعۋى مۇمكىن. پسيحولوگتاردىڭ ايتۋىنشا, بالالار كوزىنىڭ الدىنداعىن عانا كورەدى ەكەن. سوندىقتان ولاردى جول اپاتىنان ساقتاندىرۋ – اتا-انانىڭ عانا ەمەس, جول پوليتسيالاردىڭ دا مىندەتى. استانا قالاسى ىشكى ىستەر دەپارتامەنتى جەرگىلىكتى پوليتسيا قىزمەتى بالالار اراسىنداعى جول-كولىك وقيعالارىنان جاراقات الۋدى ازايتۋ ماقساتىندا «جۇرگىزۋشى, جول ءتارتىبىن ساقتا!» اتتى سۋرەت سالۋدان سايىس وتكىزدى. بالاقايلاردىڭ سالعان سۋرەتتەرى ادام اياعى كوپ جۇرەتىن ايالدامالاردا, مەكتەپتەردىڭ ماڭايىنا, قوعامدىق ورىندارعا ءىلىندى.
كونكۋرسقا ەلوردالىق 95 مەكتەپتىڭ باستاۋىش سىنىپ وقۋشىلارى قاتىستى. سايىسقا قاتىسۋشىلار ءوزىن جولدا قالاي ۇستاۋ كەرەكتىگىن, جۇرگىزۋشىلەر ەڭ الدىمەن نەگە ءمان بەرۋ كەرەكتىگىن شاعىن تۋىندىلارىندا كورسەتكەن. قيالمەن بەينەلەنگەن سۋرەتتەردىڭ ىشىندە №70 مەكتەپ-گيمنازياسىنىڭ 4 «ءا» سىنىپ وقۋشىسى ەلامان شۇلەمبايدىڭ سۋرەتى ۇزدىك دەپ تانىلىپ, ول ءبىرىنشى ورىندى جەڭىپ الدى. ەكىنشى ورىن №32 مەكتەپ-گيمنازياسىنىڭ 3 «ە» سىنىپ وقۋشىسى رۋسلان كارداشقا بەرىلسە, ءۇشىنشى ورىن №82 مامانداندىرىلعان «دارىن» ليتسەيىن 3 «ءا» سىنىپ وقۋشىسى اسىلاي جەڭىسبەككە بۇيىردى.
سونىمەن قاتار, «جۇرگىزۋشىگە ارنالعان ەڭ جاقسى ءوتىنىش!» نوميناتسياسىندا №54 مەكتەپ-ليتسەيىنىڭ 4 «ب» سىنىپ وقۋشىسى مانسۇر مادەتحانۇلى, «ماڭىزدى جول بەلگىلەرى» نوميناتسياسىندا №41 ورتا مەكتەبىنىڭ 2-سىنىپ وقۋشىسى ايگەرىم سەرىكباەۆا, «ەرەكشەلىگى ءۇشىن» اتتى نوميناتسياسىندا №67 مەكتەپ-گيمنازياسىنىڭ 4 «ە» سىنىپ وقۋشىسى ديليارا جەڭىسقىزى جەڭىمپاز اتاندى.
سايىستاعى «ەڭ جاس قاتىسۋشى» نوميناتسياسى №33 مەكتەپ-بالاباقشاسىنىڭ «0» سىنىپ وقۋشىسى دەنيس تسيبيلسكيگە بۇيىردى.
ەندى بۇل سۋرەتتەر استانا ايالدامالارىندا ىلىنەتىن بولادى.
كىشكەنتاي سۋرەتشىلەردى قۇتتىقتاعان استانا قالاسىنىڭ ءىىد جەرگىلىكتى پوليتسيا قىزمەتىنىڭ باستىعى باقىتجان مالىباەۆ «جۇرتشىلىقتىڭ ءبارى جۇرگىزۋشى ەمەس, بىراق ءاربىر ادام – جاياۋ جۇرگىنشى. سوندىقتان جول ءجۇرۋ ەرەجەلەرىن بالالاردىڭ ساناسىنا جاستايىنان سىڭىرە بەرۋ قاجەت. بۇل ولاردى جولدا بولاتىن ءارتۇرلى اپاتتاردان ساقتايدى» دەي كەلە, جۇرگىزۋشىلەردى جولدا اباي بولۋعا شاقىردى.
قىمبات توقتامۇرات
