ەلوردادا جاڭا جۇردەك اۆتوبۋس كولىگى جۇيەسى (برت) جۇزەگە اسىرىلا باستادى. كۇنى بۇگىن ۋچاسكەلەردە ينجەنەرلىك جەلىلەردى, سونىڭ ىشىندە ۇيالى بايلانىس, ەلەكتر قۋاتىن جانە سۋ قۇبىرىن جۇرگىزۋ جۇمىستارى 20% كولەمىندە ورىندالسا, قۇرىلىس الاڭدارىن اباتتاندىرۋ, توپىراق دايىنداۋ, وندىرىستىك, اكىمشىلىك عيماراتتاردىڭ ىرگە تاستارى ءۇشىن شۇڭقىرلار قازۋ جۇمىستارى تولىق قولعا الىندى.
قابانباي باتىر داڭعىلىنان سىعاناق كوشەسىنە دەيىن برت جۇيەسى باعىتىنىڭ بويىندا جانە دەپو ورنالاساتىن جەردە اعاشتاردى كەسۋ مەن كوشەتتەردى باسقا جەرگە وتىرعىزۋ جۇمىسى اياقتالۋعا تاياپ قالدى.
بۇعان دەيىن بىرنەشە رەت ءسوز بولعانىنداي, جاڭا جۇردەك اۆتوبۋس كولىگى جۇيەسى (برت) قالالىق جولاۋشىلار كولىگىمەن ىڭعايلى جانە قاۋىپسىز جول جۇرۋگە مۇمكىندىك بەرەدى. جالپى, جول قوزعالىسىن ۇيىمداستىرۋدى جاقسارتادى. ارنايى بولىنگەن جولاقتارمەن جۇرەتىن جاڭا جۇردەك اۆتوبۋستار ساتىپ الۋ جوسپارلانعان. جولدىڭ جۇرەتىن بولىگىنەن بولەك جابىق جولاۋشىلار ستانسالارى سالىنادى.
الدىمەن, اۋەجاي, «ەكسپو» قالاشىعىن, «ءابۋ-دابي پلازا» جانە جاڭا تەمىرجول ۆوكزالىن بايلانىستىراتىن ون سەگىز ستانسا ىسكە قوسىلادى. ودان ءارى تىرشىلىككە كەرەكتى جۇيەلەردى قامتۋ كەشەنى, قاۋىپسىزدىك قۇرىلعىلارى, ەلەكتروندى جولاقى تولەۋ جۇيەسى (مەترو تەكتەس), ەسكالاتورلار مەن جەدەلساتىلار ورناتىلعان ستانسالار سانى دا بىرتىندەپ ۇلعايا بەرمەك.
جاقسى ساتۇلى
