استانادا وسى كۇندەرگە دەيىن 2011-2020 جىلدارعا ارنالعان تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى بويىنشا 16 كوپ قاباتتى ءۇي جوندەلدى. سولاردىڭ ون ەكىسى وسى جىلدىڭ ەنشىسىندە. ەڭ سوڭعى تاپسىرىلعانى ميرزويان كوشەسى 19 مەكەنجايىندا ورنالاسقان.
كەشە اتالمىش باعدارلامانىڭ ورىندالۋىنا جاۋاپتى ورگاندار اتقارىلعان جۇمىستاردىڭ ناتيجەسىمەن تانىسىپ شىقتى. اتالمىش مەكەنجايداعى بەس قاباتتى ءۇي 1984 جىلى سالىنعان. «وركەن قالا» جشس مەردىگەرلەردى تارتىپ, وسى ءۇيدىڭ شاتىرى مەن قاسبەتىن, جەرتولەسىن, پاتەرلەرگە كىرەبەرىس الاڭدارىن جوندەدى. ينجەنەرلىك جەلىلەردى اۋىستىرىپ, اۆتوماتتى جىلۋ بەرۋ پۋنكتىن ورناتتى. ءۇيدى جاڭعىرتۋ جۇمىستارىنا 113 ملن تەڭگە جۇمسالدى.
«باعدارلامانىڭ ىسكە قوسىلعانىنا 3-4 جىلدىڭ ءجۇزى بولدى. سارىارقا جانە الماتى اۋداندارىنداعى ەسكىرگەن كوپ قاباتتى ۇيلەردى جوندەپ جاتىرمىز. بىراق, بۇل جۇمىستارعا جىل سايىن بيۋدجەتتەن قارجى بولىنە بەرمەيدى. ماسەلەن, بىلتىر قارجى بولماعاندىقتان ۇيلەردى جاڭعىرتۋ جۇرگىزىلمەدى. بيىلعى بيۋدجەتتە اتالعان جۇمىستارعا قارجى قاراستىرىلىپ, ءبىراز ءۇي جوندەلدى. كەلەسى جىلى دا اقشا بولىنەر بولسا, وتىز شاقتى ءۇيدى جوندەيمىز» دەيدى تۇرعىن ءۇي ينسپەكتسياسى باسقارماسىنىڭ باسشىسى تالعات رىسبەكوۆ.
وسى ۇيدە 2006 جىلدان بەرى تۇراتىن ءسانيا بەرماحانوۆا اتقارىلعان جۇمىستارعا ءوز پىكىرىن ءبىلدىردى. «بۇرىن توبەمىزدەن سۋ كەتىپ جاتاتىن. ابدەن توزعان ءۇيىمىزدى جوندەۋ جۇمىستارىنان كەيىن تانىماي قالدىق. ءىشى-سىرتى جايناپ شىعا كەلدى. ول ءۇشىن پيك باسشىمىز گەننادي ساۆەنكوعا راحمەت ايتۋعا ءتيىستىمىز. بۇل كىسى: «تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى بويىنشا ءۇيىمىزدى جوندەتە الامىز. وسىعان قاجەتتى قۇجاتتاردى تاپسىرايىق» دەپ, ءبىزدى ءۇش جىل بويى ۇگىتتەدى. ءبىز, شىنىنا كەلگەندە العاشىندا وعان سەنبەدىك. اقىرى گەننادي نيكولاەۆيچ ءبىزدى سەندىردى. اتقارىلعان جۇمىستاردىڭ ناتيجەسىنە كوڭىلىمىز تولىپ وتىر» دەيدى.
جوندەۋ جۇمىستارىنان كەيىن دە كەيدە اقاۋلار شىعىپ جاتاتىنى جاسىرىن ەمەس. مىنا ءۇيدى جاڭعىرتۋ قانشالىقتى ساپالى اتقارىلدى دەپ, تالعات رىسبەكوۆتەن سۇراعانىمىزدا ول: «قازىر ناقتى ەشتەڭە ايتا المايمىن, اقاۋلار بولسا كەيىننەن شىعۋى مۇمكىن. بىراق, ازىرگە جۇمىس ساپاسىز اتقارىلدى دەپ, مەردىگەرلەرگە ورىنسىز كىنا ارتا المايمىز» دەپ جاۋاپ بەردى.
امانعالي شميتۇلى
