استانا اكىمى يمانعالي تاسماعامبەتوۆ ريگا قالاسىنىڭ مەرى نيل ۋشاكوۆپەن رەسمي تۇردە كەزدەستى. جۇزدەسۋ بارىسىندا ەكى استانانىڭ ءوزارا ىنتىماقتاستىعىن دامىتۋ, ءوزارا ءتيىمدى تاجىريبە الماسۋ ماسەلەلەرى كەڭىنەن تالقىلاندى.
ەلوردا اكىمى بالتىق جاعالاۋىنان كەلگەن مەيماندارعا استانادا جۇزەگە اسىرىلىپ جاتقان ءىرى جوبالار جونىندە ايتىپ بەردى.
– قازاقستان لاتۆيانى بالتىق وڭىرىندەگى ماڭىزدى ارىپتەسى رەتىندە تانيدى. قوس ەلدىڭ استاناسى ەكونوميكالىق الەۋەتى مەن قۇرىلىمى جاعىنان ءبىر-بىرىنە ۇقساس. ايتالىق, سىزدەردەگى سياقتى استانا ەكونوميكاسىنىڭ 60 پايىزىن ورتا جانە شاعىن كاسىپكەرلىك سالاسى قۇرايدى. قالامىزدا قۇرىلىس سالاسى دا قارقىندى دامىپ كەلەدى. سونىڭ ءبىر ايعاعى – ءبىز جىلىنا 1 ملن 300 مىڭ شارشى مەتر تۇرعىن ءۇي تاپسىرامىز. جاس شاھار ءۇشىن بۇل – ەداۋىر جەتىستىك, – دەدى يمانعالي نۇرعاليۇلى.
قالا اكىمى استانانىڭ 2017 جىلى ەكسپو كورمەسىن وتكىزۋگە دايىندالىپ جاتقانىنا توقتالا كەلە, مۇنداي حالىقارالىق شارا قارساڭىندا بىرلەسكەن كاسىپورىندار قۇرىپ, ءىرى جوبالاردى جۇزەگە اسىرۋ ارتىق بولمايتىنىن جەتكىزدى. سونداي-اق, يمانعالي نۇرعاليۇلى لاتۆيالىقتارعا ەلورداداعى مەملەكەتتىك ماڭىزى بار نىساندار, يندۋستريالدىق پارك, يننوۆاتسيالىق تەحنولوگيالار, ءبىلىم, كولىك, جول سالالارىنداعى تابىستاردى تانىستىردى.
ءوز كەزەگىندە ريگا مەرى نيل ۋشاكوۆ قوس شاھاردىڭ ءوزارا ەكونوميكالىق جانە مادەني بايلانىسى نىعايا تۇسكەنىن اتاپ ءوتىپ, بارلىق سالا بويىنشا جاراسىمدى بايلانىس تۇزىلەتىنىنە سەنىم ءبىلدىردى.
– استانامەن تىعىز قارىم-قاتىناس ورناتۋعا ءبىز دە ىقىلاستىمىز. ەلدەرىڭىزدەگى قۇرىلىس, تۋريزم, باسقا دا سالالارداعى تاجىريبەلەر ءبىزدى ەرەكشە قىزىقتىرادى. سوندىقتان ارىپتەستىك بايلانىسىمىز ۇزىلمەي, ودان ءارى دامي تۇسەتىنىنە سەنىمدىمىن, – دەدى ريگا مەرى.
بۇدان كەيىن شاھار باسشىلارى ەكى قالانىڭ ەكونوميكا, تۇرعىن ءۇي, جولاۋشىلار كولىگى سالاسى توڭىرەگىندە پىكىر الماستى.
جالپى, قازاقستان مەن لاتۆيا اراسىنداعى ديپلوماتيالىق بايلانىس 1992 جىلدىڭ جەلتوقسانىنان باستاپ ورناعان بولاتىن. بيىلعى جارتىجىلدىقتا ەكى ەل اراسىنداعى تاۋار اينالىمى 155,6 ملن اقش دوللارىن قۇراعان. بۇل كورسەتكىش بىلتىر 361,2 ملن اقش دوللارى كولەمىندە بولعان.
ەلىمىز لاتۆيالىقتارعا مۇناي ونىمدەرىن, ماقتا تالشىعىن, زىعىر تۇقىمىن, تاعى باسقالاردى ەكسپورتتايدى.
ال, ريگا لاتۆيانىڭ اناعۇرلىم ەكونوميكالىق دامىعان ءىرى ونەركاسىپ ورتالىعى بولىپ سانالادى. ايتالىق, لاتۆياعا قۇيىلاتىن شەتەل ينۆەستيتسيالارىنىڭ ىشكى جالپى ونىمدەگى ۇلەسى 55 پايىزدى قۇراسا, سونىڭ 78 پايىزى وسى ريگا قالاسىنا باعىتتالعان.
