Елордада әскери дирижерлер кәсіби шеберлігін арттырды
Астанада Ұлттық әскери-патриоттық орталығында Орталық әскери оркестрінің ұйымдастыруымен Қарулы күштердегі оркестрлердің басшылары мен әскери дирижерлер – мәдени-демалыс орталықтары бастықтарының оқу-әдістемелік жиыны өтті, деп хабарлайды аstana-akshamy.kz.
Іс-шара әскери дирижерлерді оқыту және кәсіби дайындық деңгейін тексеру мақсатымен ұйымдастырылып отыр. Олар үшін дәрістер мен практикалық сабақтар өткізілді.
Жиын жетекшісі Әскери-оркестрлік басқарма бастығы майор Алмас Ибрагимов атап өткендей, Қазақстан Қарулы күштерінде 23 штаттық әскери оркестр бар. Олардың іс-шараларға қатысуы ерекше салтанатты көңіл-күй қалыптастырады. Музыка жауынгерлердің рухын көтеріп, адамдарды біріктіреді.
– Нағыз капельмейстер тек музыкалық-орындаушылық қана емес, саптық дағдыларды да меңгеруі тиіс. Біздің салада өсуге көп орын бар, мұны өткен жылы өткізілген халықаралық әскери оркестрлер музыкалық фестивалі көрсетті, – деді басқарма бастығы.
Әскери музыканттар плацта концерт ұйымдастыруға қойылатын талаптарды зерделеп, дирижерлік аппараттың қойылымын пысықтады. Олар үшін әскери оркестрдің қызметін ұйымдастыру, дирижерді репетицияға дайындау, партитурамен жұмыс және сигнал беруші-барабаншыларды оқыту әдістемесі туралы дәрістер де оқылды.
Практикалық сабақтарда жиынға қатысушылар әскери рәсімдерді өткізу, қызметтік-саптық репертуарды дирижерлеу, әскери оркестрдің жауынгерлік және арнайы дайындығын жоспарлау кезінде әскери оркестрді басқару негіздерін пысықтады.
Жиын соңында қатысушылар емтихан тапсырды.