«Астана» футбол клубы қатарынан үшінші рет Еуропа лигасының топтық кезеңіне жолдама алды.
Чемпиондар лигасының үшінші іріктеу кезеңінде сүрінген «Астана» бірден Еуропа лигасының плей-офф кезеңіне түскен еді. Сөйтіп мұнда сыралғы қарсылас Кипрдің АПОЭЛ командасына тап келді. Елордалықтардың бұл командамен осыған дейін екі рет жолы түйіскен. Біріншісінде кипрлықтарды қапы қалдырып, алғаш рет Чемпиондар лигасының топтық кезеңіне өткен. Екінші Еуропа лигасында бір топта ойнады. Қос матчтан тұрған бұл кездесулердің бәрін қоса айтқанда ешқайсысында «Астана» АПОЭЛ-ға есе жібермеді.
Биыл Еуропа лигасының плей-офында үшінші рет тағы жолықты. Никосия қаласында өткен алғашқы матч 1:0 есебімен алаң иелерінің пайдасына аяқталды.
Араға апта салып, АПОЭЛ-ді «Астана Аренада» қарсы алды.
Жауапты ойында астаналық Педро Энрикенің 16-минутта пенальтиден соққан голынан кейін есеп өзгермеді. Тіпті қосымша таймда да таразы басы теңеспеді. Сөйтіп қос матчтық кездесу тағдыры пенальти сериясында шешілді. Мұнда қалың көрерменнің зор қошеметіне бөленген Эричтің ерлігіне куә болдық. АПОЭЛ жасаған 5 соққының төртеуі далаға кетті. Оның екеуі Эричтің қолынан кейін серпілді. Ал «Астананы» Энрике мен Ричард Алмейданың соққан голдары жеңіске жеткізді.
Кеше «Астананың» топтық кезеңдегі қарсыластары анықталды.
Олар – Динамо Киев (Украина), Ренн (Франция) және Яблонец (Чехия) командалары.
