Конституция күні мерекесіне орай Есіл ауданына қарасты «Жағалау» ықшам ауданында полиция бөлімі ашылды.
Салтанатты шарада аталмыш ықшам аудан тұрғындарын Конституция күні мерекесімен құттықтаған Есіл ауданының әкімі Төлеген Закарьянов жаңадан ашылып жатқан полиция бөлімінің қызметкерлеріне сәттілік тіледі.
Жаңадан ашылған №26 полиция бөлімі Айтматов көшесі, 29а мекенжайында орналасқан. Барлық керек-жарақпен қамтамасыз етілген бөлімде әзірге бес тәртіп сақшысы қызмет етеді.
Учаскелік инспекторлар тұрғын үйлердің кіреберістеріне, дүкен, дәмхана, дәріханаларға ақпараттық стендтер орнатып, өздері жайлы және полиция бөліміне, тұрғындарды бөлімге қалай хабарласуға болатыны туралы ақпараттардан құлағдар етуде. Кезекші бөлімнің жұмыс кестесі – таңғы сағат 08:00-ден кешкі 23:00-ге дейін. Одан басқа уақытта инспекторларға WhatsApp арқылы хабарласуға болады.
