Газ тарту қарқынды жүргізілуде
Елорда әкімі Алтай Көлгінов ҚР Парламенті депутаттарын газ тарату желілері құрылысының барысымен таныстырды. Бас қалаға газ тарту 3 кезеңмен жүргізіледі. Қазір құбырларды төсеу және газ реттегіш нүктелерді әзірлеу жұмыстары жалғасуда. Жылдың соңына дейін №1, 2, 3 жылу-электр орталықтарына, «Көктал-1», «Көктал-2», Агроқалашық елді мекендеріне газ тарту құбырларының құрылысын аяқтау жоспарланған.«Газ құбыры Тұңғыш Президент-Елбасы Нұрсұлтан Назарбаевтың тапсырмасымен салынуда. Елорданы дамыту мәселелеріне арналған жиында Мемлекет басшысы Қасым-Жомарт Тоқаев қаланы газдандыру үдерісін бақылауға алуды тапсырды. Ауқымды жұмыс атқарылды. Теміржолшылар, Өндіріс, Оңтүстік-Шығыс елді мекендерінде газ тарату желілерінің құрылысы басталды. Бұл елді мекендердегі үйлерді келесі жылу беру маусымы басталғанша газға қосуды жоспарлап отырмыз» деді Алтай Сейдірұлы.
Жобаны әзірлеушілер хабарлағандай, газ тарату желілері көше желісі арқылы өтеді. Жекеменшік сектордың тұрғындары үйдің қоршауына дейін тартылған газ құбырынан үйіне тартады. Әкімдік тұрғындарға тегін газ есептегіш құралдарды қарастыруда. Екінші кезеңде – Мичурин, Интернациональный, Күйгенжар (1-2), Тельман (3), Пригородный, Garden Village, Family Village елді мекендеріне, үшінші кезеңде – Ильинка (1-2), Шұбар (3), Өндіріс (4) елді мекендері газдандырылады. Жобаны жүзеге асыру мерзімі: 2020-2023 жж. Газ тарту қаладағы зиянды қалдықтардың 6 есеге, қатты тұрмыстық қалдықтардың 40 мың тоннаға дейін азаюына мүмкіндік береді.