IT-жобаға қызығушылық жоғары
Елордадағы «Smart Сity Nur-Sultan» өңіраралық форумында таныстырылған «Нұр-Сұлтан қаласының цифрлық «сыңары» жобасы халықаралық танымалдылыққа ие бола бастады. Осы аптада Татарстандағы Иннополис жоғары технологиялар қаласында қала шаруашылығындағы үздік әлемдік тәжірибелер бойынша өткен онлайн-митапта «Нұр-Сұлтан қаласының цифрлық «сыңары» жобасы туралы айтылды.
«Ресей Федерациясының цифрлық экономикасы» бағдарламасы мен «Цифрлық экономикаға арналған кадрлар» федералды жобасы аясында Иннополис университетінің бастамасымен ұйымдастырылған шараға сарапшы ретінде Нұр-Сұлтан қаласының Цифрландыру және мемлекеттік қызметтер басқармасының басшысы Ботагөз Қасабек қатысты.
Елорданың онлайн-геопорталын қалыптастыру мақсатында қолға алынған жоба аясында қала аумағы толықтай цифрлық жүйеге көшіп, 2D форматтағы карта жасалды. 16 мың шақырымдық инженерлік жүйе цифрландырылды. Шаһардағы 140 мыңнан астам кәріз құдығы онлайн-бақылауға алынды. Жобаны іске асыру кезеңінде 100-ден астам жаңа жұмыс орны құрылған.
Қала шаруашылығын ұйымдастырудағы сәтті IT-шешім аз ғана уақыттың ішінде отандық және шетелдік мамандардың назарын аударды. Цифрландыру және мемлекеттік қызметтер басқармасы аталған жобаны өзге қалаларда іске асыру бойынша ұсыныстар түсіп, тараптар арасында келіссөздер де жүргізіліп жатқанын хабарлады.