Астанадағы Конгресс-холл сарайында Тәуелсіздіктің ширек ғасыр тойына арналған Қазақстанның еңбек сіңірген қайраткері, профессор Айтқали Жайымов пен Халықаралық байқаулардың лауреаты, композитор Арман Жайымовтың «Шаттық елі» деп аталған концерті өтті.
Жайықтың жағасында туған Жайымов ағамыздың өнерін жұртшылық жақсы біледі. Ол – кешегі даңқты дирижерлер Нұрғиса Тілендиев пен Төлепберген Әбдірашевтің ізгі жолын жалғаған талантты азамат. Ұлт музыкасын биік белеске көтерген өнерпаз. Алматыдағы Құрманғазы атындағы мемлекеттік академиялық Халық аспаптары оркестрінің көркемдік жетекшісі және бас дирижері болды. Бір жылдары Монғолияның Ұлан-Батор қаласында дирижер, ұстаз-консультант болып қызмет те атқарды. Қазақ ұлттық консерваториясының домбыра кафедрасы жанынан дәстүрлі ән, шертер, сыбызғы кластарының ашылуына белсене үлес қосты. Бірқатар музыкалық кітаптар жазды. Бүгінде дарынды ағамыз елордадағы Мемлекеттік филармония қазақ халық аспаптары оркестрінің көркемдік жетекшісі және бас дирижері. Өнерлі шәкірт тәрбиелеп отырған ұлағатты ұстаз.
Оның баласы Арман Жайымов та болашағынан көп үміт күттіретін жас талант. Бірнеше байқаулардың лауреаты. Қазақстан Композиторлар Одағының мүшесі. Ол өзінің жеке концерттерімен Германия, Австрия, Түркия және Ресей секілді елдерде өнер көрсетіп, ол жақтағы көрермендерден жоғары баға алған. Әкелі-балалы өнерпаз бірігіп, қалам тербеген «Бейбарыс сұлтан» (сөзін Ұлықбек Есдәулет жазған) операсының либреттосы талғамы жоғары жұртшылықтың көңілінен шықты.
Сиқырлы сазға толы кеште ұлттық музыканың жалауы желбіреді. Бабалардан қалған бағзы әуендер әуеледі. Қорқыт атамыздан басталған Кетбұға, Құрманғазы, Дәулеткерей, Түркеш, Махамбет және Тәттімбет секілді ұлы тұлғалардың күмбірлеген күйлері салтанат құрды. Абыл, Есір, Байсерке, Қартбай, Қазанғап, Сейтек және Сүгір сынды дәулескер домбырашылардың мұңлы сазға толы туындылары ойналды.
Ол шығармалардың барлығы оркестрмен шырқалғанда тұла бойыңыз шымырлап, шыңырау ойға жетеледі. Бойда ұлттық қан ойнап, тұлпар мінгендей әсерде болдық. Сонымен бірге отандық және шетел композиторларының халық аспаптары оркестріне лайықтап түсірген шығармалары жол тартты. Әсіресе, елордалық тыңдармандарға Астана оркестрінің орындауында алғаш рет Алпамыс балетінен
«Мыстандар биі» және «Тайшық ханның қуаныш биі» атты жаңа туындысы ұсынылды. Жұртшылық оны өте жылы қабылдап, ұзақ уақыт қол шапалақтап, құрмет көрсетті.
Сондай-ақ, концертте ҚР еңбек сіңірген қайраткері Азамат Жылтыркөзов, Бибігүл Жанұзақ, Республикалық байқаулардың лауреаты Жазгүл Даңылбаева, Шахризада Тыныштық, Ботагөз Ташимова, Алтынбек Әбілда және Айгерим Кульшина секілді көпшілікке жақсы танылып қалған жас өнерпаздар халық әндері мен классикалық шығармалары шырқалды. Көрнекті композитор Ғазиза Жұбанова атындағы ішекті квартет мүшелері де тамаша музыкалық сый жасады.
Қысқасы, азаттықтың торқалы тойына арналған шаттық кеші жұртшылықты шадыман көңілге бөледі.
Азамат ЕСЕНЖОЛ
