Саңлақтар сабақ берді
Астанадағы №35 мектеп-лицейде денешынықтырудың ерекше үлгісі өтті. «Физкульт-Ура!» әлеуметтік жобасы аясында оқушыларға сабақты Олимпиада ойындарының үш дүркін жүлдегері Гюзель Манюрова мен Олимпиада чемпионы Юрий Мельниченко жүргізді.
Балалар кәсіпқой спортшылардың жетекшілігімен жаттығу жасап, эстафеталық ойындарға қатысты. Олимпиада чемпиондары дененің барлық бұлшық етін дамытуға арналған жаңа фитнес-технологиялардың үздік қимылдарын көрсетті.
Гюзель Манюрова спорттың адам өміріндегі маңыздылығын түсіндіріп, оқушыларға бүкіреймей, арқаны тік ұстап жүруге бағытталған жаттығу топтамасын жасатты.
– Мұндай шаралардың арқасында балалар үлкен жетістіктер мектептегі шынығудан басталатындығын ұғады.
Теледидардан көріп жүрген ел мақтаныштарын мұғалім ретінде танып, денешынықтыруға деген қызығушылығы артады. Бұл жобаға Данияр Елеусінов те қолдауын білдірді. Алдағы уақытта ол өзі оқыған №54 мектеп-лицейінде сабақ өткізбекші, – дейді «Астана» Президенттік клубының спорттық менеджері, олимпиада чемпионы Юрий Мельниченко.
Мәдина ЖАҚЫП