«Bäiterek» toby: MIýZİKL ÄNŞILIGIMIZ BEN AKTERLIGIMIZDI JARASTYRYP JIBERDI

– Toptyŋ on jyldyq mereitoiy qarsaŋynda qoiylǧan «Qozy Körpeş-Baian sūlu» miuziklyn tamaşaladym. Klassikalyq tuyndy zamanaui türde ūsynylǧany ūnady. Basty rölderdı  şynaiy beinelep, körermen jüregıne jetkızdıŋızder dep oilaimyn. Bıraq, on jyldyqta saǧyna kütken «Bäiterektıŋ» änderın nege estımedık? Şyǧarmaşylyq konsert qoiu oilaryŋyzda bar ma?

Güljanat Ospanova, qala tūrǧyny.

«Bäiterek» toby:

– Eŋ aldymen, Güljanat, sızge rahmet! Halyq ūnady dep baǧasyn berıp jatsa, bız mūny önerımızdıŋ jetıstıgı  dep esepteimız.  «Miuzikldan soŋ, änderıŋız joq qoi» dep, änımızdı de sūrap jatty. Miuziklda şyrqaǧan änderımız bızdıŋ repertuarǧa kırdı. Sonymen qatar, üşınşı küitabaqty jäne ekı beinebaian jazu üstındemız. Qala künıne deiın olardy da aiaqtap, tyŋdarman nazaryna ūsynatyn bolamyz.  Üşeuımız de akter bolǧannan keiın tobymyz qūrylǧan  kezdegı ortaq arman – änşılıgımız ben akterlık oiynymyzdy bır arnaǧa ūştastyryp, halyqqa osyndai miuzikl ūsynu boldy. On jyldan keiın būl armanymyz da oryndaldy.

– Erlan aǧa, bır sūhbatyŋyzda «internettı köp paidalana bermeimız, bız jaily tyŋdarman pıkırın dostarymyzdan estıp jatamyz» depsız. Al, qazır ǧalamtorda qanşalyqty jiı otyrasyzdar? Ondaǧy syrt közge män beresızder me?

Arailym

– Jaŋalyqtyŋ bärı ǧalamtorda ǧoi. Äleumettık jelılerdıŋ barlyǧynda derlık otyramyz. «Twitter», «Facebook», «Instagram», «Moi mir» siiaqty äleumettık jelılerde tırkelgenbız. Soǧan uaqyt bölıp, tyŋdarman hattaryna jauap beremız, pıkırlerdı oqyp, alǧysymyzdy aitamyz. Tyŋdarman pıkırı bız üşın öte maŋyzdy.

– Men kışkentaiymnan än aitamyn. Bıreuler menen «vokalǧa qatystyŋ ba?» dep sūrap jatady. Vokalǧa qatysu sonşa mındettı me? Sızder vokaldan sabaq berıp, şäkırt tärbieleisızder me?

Batyrjan, oquşy

Sailau Qamiev:

– Sportşylar öz denesın qalypta ūstap, jetıstıkke jetu üşın qalai jattyqsa, änşı de öz dauysyn jattyqtyryp vokalmen ainalysu kerek. Vokal än aitu mänerın qalyptastyryp, öz baǧytyŋdy taŋdau üşın qajet. Bız vokaldan sabaq ber­meimız, bıraq men Qazaq ūlttyq Öner universitetınde akterlık şeberlık pänınen därıs oqimyn, praktikany da jürgızemın. Būl oquşylarǧa emes, bakalavrlarǧa arnalǧan därıs. Bıraq, Batyrjan, dauysyŋdy tärbieleimın deseŋ, vokalǧa qatysqanyŋ jön.

– Qalalyq avtobusqa soŋǧy ret qaşan mındıŋızder jäne qaltada bır tiyn joq kezde «zaichik» bolyp, bilet tölemegen kezderıŋız boldy ma?

Maqsūt

Erlan Malaev:

– Mässaǧan, ondai kezder köp bolǧan! Student kezımızde otyrǧan taksi jürgızuşısınen de, konduktorlardan da qaşqan talai qyzyq sätter älı esımde. Soŋǧy ret Qytaidaǧy avtobusqa mındım. Taksi keptelıste köp tūryp qalady eken, al avtobustyŋ arnaiy joldary bar, ol jolda avtobustan basqa kölık jürmegendıkten, jol aşyq, dıttegen jerıŋe uaqytynda jetedı ekensıŋ.

–Änşı halyq aldynda jandy dauysta än şyrqauy tiıs dep jatamyz. Keibıreuı türlı närsenı syltau etıp, fonogrammamen aitqan dūrys, dybys taza şyǧady dep jauap berıp jatady. Sızder qandai pıkırdesızder? Fonogrammanyŋ kömegıne köp süienesızder me?

Taŋşolpan, student

Sailau Kamiev:

– 50 de 50%  ara-qatynasyn ūstanamyn. Qai kezde fonogrammamen aitu kerektıgın bılu qajet. Körşı elderde fonogramma turaly zaŋ qabyldandy. Sondai zaŋ bızge de kerek. Konsert fonogrammamen aitylsa, halyqqa aldyn ala eskertılıp, ondai konserttıŋ bilet qūnyn arzandatu kerek

– Sailau aǧa, sızdı rejiserlık qyryŋyzdan da tanimyn. «Qyz Jıbek» spektakılın, jaqynda «Qozy Körpeş – Baian sūlu» miuziklyn sahnaladyŋyz. Osy miuzikldy Qazaqstannyŋ basqa da qalalarynda qoiasyzdar ma? Bolaşaqta körermenderdı taǧy qandai tuyndylarmen quantpaqsyz?

Armangül, student

– İä, men rejisserlıkke bet būrdym. Būl saladaǧy alǧaşqy eŋbekterım klassikalyq şyǧarmalardy sahnalaudan bastaldy. Jasy ülken aǧa-apalarymyzdan oryndy syndy da estıdım, kökeige tüidım. Rejisserlıkke jaŋadan aiaq basqandyqtan, üirenerım de, jüzege asyram degen ideia da köp. Keide özgeden de emes, öz-özıŋnen de qyzǧanatyn dünieler bolady şyǧarmaşylyq adamynda. Men qazır kelesı tuyndy jaily ülken tolǧanys üstınde jürmın. Zamanaui dramaturgiia qyzyqtyrady. Josparymdaǧy qoiylymǧa qatysatyn akterlerdı de oilastyrdym. Jaqyn arada belgılı bolady.

– Otaǧasy bolu ülken jauapkerşılık qoi.  Äke retınde bala tärbiesıne qalai atsalysasyzdar?

Nazgül,  köpbalaly ana

Erlan Malaev:

– Balanyŋ sabaǧyna köŋıl bölıp, qai pännen aqsap jatyr, qaisysyna qosymşa sabaq kerek ekenın ünemı baqylap, ärdaiym äkelık aqyl-keŋesterımdı aityp otyramyn.

Nūrken Öteuılov:

– Bızdıŋ bolaşaǧymyz – qazırgı ūrpaq. Balamen syrlasyp, äŋgımelesuge ärdaiym uaqytymdy bölemın. Bırge seruendeimın, aqylymdy aitamyn, «körsın, bılsın» dep osyndai öner ordalaryna jiı aparyp tūramyn.

Sailau Qamiev:

– Qandai äke ekenımdı bılmeimın. Ony kelınşegımnen sūrau kerek şyǧar. Är er adam düniege säbiı kelgende jaqsy äke bolǧysy keledı ǧoi, ärine. Qyzy bar äkelerdıŋ sezımı qandai bolaryn bılmeimın, qyzym joq. Qazırde 3 ūldyŋ äkesımın. Jalpy, özımnıŋ mınezım de ūl balany tärbieleuge keletın siiaqty. Alla nietıme qarai bergen ǧoi 3 ūlymdy. «Äke-şeşenıŋ qadırın balaly bolǧanda bılersıŋ» degen maqal bar edı ǧoi. Jatsaq ta, tūrsaq ta balany, olardyŋ bolaşaǧyn oilaimyz. Olarmen qūrdasymdai söilesemın.

–Bügıngı estradanyŋ sız bıletın kemşılıkterı qandai jäne barlyq estrada bilıgı sızdıŋ qolyŋyzda bolsa, ol kemşılıkterdı qalai özgerter edıŋızder?

Jasūlan, asaba.

 Erlan Malaev:

– Änşılerge köp salmaq tüsıp jatady: ändı özderı jazady, beinebaiandy özderı tüsıredı, ol jazǧandaryn rotasiiaǧa bere almai qinalyp jatady. Öitkenı, qaida barsaŋ da, köp qarajatty talap etedı. Demeuşılerı joq. Änşı – änşı ǧana emes, änşı özıne adiministrator ärı prodiuser. Bır adam jalǧyz özı jūmys jasai almaidy. Tıptı, konsert qoiuǧa kelgende, ǧimaratty jalǧa aludyŋ özı qymbat. Osylarǧa jeŋıldık bolu kerek, menıŋşe.

Sailau Qamiev:

– Toi-domalaqtardan ary asa almai, tek qazaǧymyzǧa ǧana qoltaŋba berıp, älemdık deŋgeige köterılmeuımızdı estrada önerındegı ülken kemşılık dep bılemın. Estradamyzda talantty jastar köp. Jaqsy jūmys jasap, talpynyp jatqan sausaqpen sanarlyqtai ǧana pro­diuserlerımız bar. Bıraq  halyqara­lyq baiqaularda ünemı 3,7,8, 9-şy oryndardan körınedı olar. Nege? Barlyq prodiuserlerdıŋ oiyn ortaǧa salyp, osy mäsele jaiynda talqylaityn bır ülken odaq qūrylu kerek te şyǧar.  Jaqsy ideiasy bar prodiuserlerdıŋ jūmysy memleket tarapynan qoldau tauyp, olardyŋ senımdı jobalaryna qarjy bölınıp, estradamyzdy halyqaralyq deŋgeige köteru kerek.

–Tanymal bolǧannan keiın keide jeke ömırıŋız qoǧamdyq talqylauǧa  ainalyp ketıp jatatyn şyǧar. Ataq-daŋqtan bas tartyp, tynyştyqty aŋsaǧan kezderıŋız boldy ma?

Ǧaziz

Nūrken Öteuılov:

– Allanyŋ bergen nesıbesınen bas  tartyp, ysyrap jasaǧan emespın. Halyqtyŋ ystyq yqylasy, jarqyn peiılı jūmys ısteuımızge ärqaşan da küş berıp, alǧa jetelep otyrady.

Erlan Malaev:

– Tanymaldylyqtyŋ jaqsylyǧy köp qoi. Qai jerde bolsaŋ da, halyq qūrmetteidı, mereiıŋdı ösırıp, syi-qūrmetın aiamaidy, qariialar aq batasyn beredı. Qūdaiǧa şükır, eş ziianyn körgen emespın. Bıraq adam bolǧan soŋ keide tynyştyqty aŋsap, barlyq tırlıkten 10-15 künge bosap, boi jazyp, oi sergıtıp tynyqqym keletını jasyryn emes.

Daiyndaǧan

Madina QAIRATQYZY