Elordadaǧy «Astana Arena» sport keşenınde halqymyzdy düiım elge tanytyp jürgen daryndy änşı Dimaş Qūdaibergennıŋ «Arnau» atty jeke konsertı öttı.
Būdan ekı jyl būryn atalǧan sport saraiynda Dimaştyŋ «Bastau» degen än keşı ötken bolatyn. Endıgı öner keşın jas änşı «Arnau» dep atapty. Osy bır üilesım tapqan ataularda tereŋ maǧyna bar dep oilaimyn.
Küllı älem köz tıkken keremet keşke talantty jastyŋ jerlesterı ǧana emes, älemnıŋ 64 elınen 10 myŋǧa juyq tyŋdarman keldı. Onyŋ ışınde qazaq jerınen şalǧai jatqan AQŞ, Ūlybritaniia, Braziliia, Meksika, Kanada, Avstraliia, Şveisariia, Malaiziia, Singapur, Afrika, Egipet, İzrail jäne Marokko sekıldı memleketterdıŋ tūrǧyndary bar. Bır ǧana Polşa elınen at terletıp 20-ǧa juyq adam kelgen. Byltyr Mädeniet jäne sport ministrlıgı Dimaşqa qazaq elı atynan «Turizm elşısı» degen märtebelı ataq berdı. Būl beker emes. Şynynda da, qazır Dimaş arqyly jalpaq älem Qazaqstandy jaŋa bır qyrynan tanydy. Osyndaida körnektı söz zergerı Ǧabit Müsırepovtıŋ «Qai halyqtyŋ bolsa da mädenietın, körkem sözın jalyndatyp jıberuge jüz talant köptık etpeidı, on talant azdyq etpeidı» degen ǧibratty sözı oiymyzǧa oraldy.
Keş şymyldyǧyn änşı «Golden Intro» siqyrly sazǧa toly änımen aşty. Artynşa «Aqquym» änın oryndap, tyŋdarmandardyŋ jüregın eljırettı. Mädeni şaranyŋ basynda Dimaş konsertke kelgen qauymǧa rizaşylyǧyn bıldırdı.
– Ärkımnıŋ öz baqyt ölşemı bar. Menıŋ baqytym – halqym men sahna. Menıŋ änderım sızderdıŋ jürekterıŋızge jetıp jatsa, armanymnyŋ oryndalǧany dep bılemın. Menı syilap, önerımdı baǧalap kelgenderıŋız üşın alǧysymdy aitamyn, – dedı ol.
Änşı byltyr kögımızden qūiryqty jūldyzdai aǧyp ötken saŋlaq sportşy, dosy Denis Tenge än arnap, köpşılıktıŋ közıne jas aldyrdy. Ol mänerlep syrǧanaudan Sochi olimpiadasynyŋ qola jüldegerı öner körsetken SOS d’un terrien en détresse kompozisiiasyn oryndap, konsertke qonaq retınde qatysyp otyrǧan Denistıŋ ata-anasyna alǧysyn jetkızdı.
– Osydan bıraz uaqyt būryn Denis ekeumız elımızde ötetın kelesı än keşımde duet aitamyz dep josparlaǧan edık. Bıraq… Allanyŋ jazǧanyna amal joq. Denis naǧyz tuma talant boldy. Az ǧana ǧūmyrynda ülken jetıstıkke jetıp, qazaq memleketınıŋ tuyn biıkke köterıp kettı. Bız ony eşqaşan ūmytpaimyz. Onyŋ esımı el tarihynda qalady, – dedı Dimaş.
Jas talant syrtta jürse de, el ömırınde bolyp jatqan jaŋalyqtarmen jaqyn tanys ekendıgın de jasyrmady.
– Juyrda Arysta bolǧan oqiǧa maǧan da qatty batty. Tıptı osyndai qysyltaiaŋ kezde konsert beru yŋǧaisyzdau körındı. Solai aitqandar da kezdestı. Alaida şetelden şaqyrylyp qoiǧan qonaqtar bar. Solardy da eskerdık. Sondyqtan Arysqa kömek retınde osy konsertten tüsken qarajattyŋ bır bölıgın audaramyn. Būl sızderdıŋ de kömekterıŋız bop sanalady, – dedı.
Keşke reseilık kompozitor İgor Krutoi qatysyp, Dimaştyŋ önerdegı jolyna sättılık tıledı. Sondai-aq Dimaş jeke konsertınde körermennıŋ jüregınen oryn tapqan tuyndylardan bölek, ystyǧy suyp ülgermegen jaŋa albomynan bes än şyrqap, jūrtşylyqtyŋ qūlaq qūryşyn qandyrdy. Qazaqtyŋ qara dombyrasyn da kümbırlettı.
Jer jüzındegı änşınıŋ bar janküierlerı köz salǧan konserttıŋ oidaǧydai ötuıne 500-den asa käsıbi maman tartylyp, 1000-ǧa juyq jaryq qūrylǧylary qoldanylǧan. Qazaqşa aitqanda, «tört qūbylasy tügel» mūndai öner keşınde Dimaş Qūdaibergen halqymyzdy älemge taǧy bır tanytyp, moiyndatty.
