QALA BALASY QAIDA DEMALADY?

Endı bır aptadan keiın kezektı oqu jyly aiaqtalyp, oquşylar jazǧy demalysqa şyǧady. Jyl saiyn jaz qyzyǧyn töl merekelerımen bastaityn örender üşın biylǧy lagerlerdıŋ jūmysy ­­29 mamyrdan bastalǧaly otyr. Jazǧy kanikulda bala keler oqu jylyna küş jinaidy. Būl uaqytty balanyŋ tiımdı paidalanuyn eskerıp, jazǧy demalysty olardyŋ tanymy men dene tärbiesıne oŋ äserın tigızetındei etıp ūiymdastyru qajet. Būǧan jazǧy demalys lagerlerınıŋ äserı mol. Sonymen, elordalyq örender üşın biylǧy demalys qandai bolmaq?

Qalamyz boiynşa 83 mekteptıŋ janynan aşylǧan lagerler 29 mamyr men 23 mausym aralyǧynda jūmysyn bastaidy. Oǧan 1-4-synyptarda oqityn 45 000 bala qatysady. Lagerlerdıŋ barlyǧy derlık ekı auysymda jūmys ısteidı. Är bala kündelıktı tamaǧy üşın 500 teŋge tölese, az qamtylǧan otbasylar üşın būl 319 teŋgenı qūraidy. Mektep janyndaǧy lagerler №2, 29, 31 mektepterde ūiymdastyrylmaǧan. Öitkenı būl mektepterde biyl kürdelı jöndeu jūmystary jürgızıledı. Mektep jasyndaǧy balalardyŋ şyǧarmaşylyq äleuetın damytyp qana qoimai, densaulyǧyn nyǧaituǧa, sauyqtyruǧa, olardyŋ boiynda salauatty ömır süruge yntasyn qalyptastyruǧa, tıptı, balalardyŋ eresekter tarapynan qarausyz qalǧan bos uaqytyn qysqartu üşın būl demalystardyŋ maŋyzy zor.
Al orta buyn, iaǧni 5-7-synyp oquşylaryn qamtu maqsatynda mektep janyndaǧy «Didarly jaz» sporttyq-oiyn alaŋdary jūmys ısteidı.
3 mausymnan 12 şılde aralyǧynda türlı sporttyq şaralarmen 5-7-synyptyŋ 4000 oquşysyn qamtu közdelıp otyr. Būǧan qosa, «Aibyndy mau­sym» mektep janyndaǧy äskeri-sporttyq alaŋdary da bar. Būl joba boiynşa 8-10-synyp oquşylarynyŋ tegın demalysy men jūmysyn qamtamasyz etu közdelgen.
Būl alaŋdardyŋ basty maqsaty – qala mektepterınıŋ estafeta komandalary arasynda qūramalyq sport türlerı men türlı voleibol, basketbol, futbol, atqyştar syndy oiyndar boiynşa sporttyq-būqaralyq qyzmettı ūtymdy ūiymdastyru. Quanyştysy, alaŋdarǧa arnaiy keletın mektep oquşylarynyŋ qarasy öte köp. Jyl saiyn osyndai qyzyqty kezdesuler men türlı oiyndardyŋ ötuıne atsalysyp jürgen oquşylardyŋ quanyşynda şek bolmaidy. Būl balany jazǧy demalys­ta öz betımen ketpei, jüielı türde bır maqsatqa jūmys jasauǧa da baulidy.

Qalalyq Bılım basqarmasy qosymşa bılım beru jäne tärbie jūmystary bölımınıŋ jetekşı mamany Erkökşe Kafizovtyŋ aituynşa, äsırese, jetım, ata-­anasynyŋ qamqorlyǧynan aiyrylǧan, äleumettık az qamtylǧan jäne köp balaly otbasydan şyqqan balalardyŋ demalysyn jäne qamtyluyn ūiymdastyru maŋyzdy röl atqarady. «Osy jaz boiy jürgızıletın 5 auysymnyŋ 3 auysymy osy sanattaǧy balalar üşın tegın ūiymdastyrylady. Aqmola oblysy, Ereimentau audanynyŋ Alǧabas auyly maŋynda ornalasqan «Batyr» şatyrly lagerınıŋ 3 auysymynda 12 mausym men 20 şılde aralyǧynda 375 jetım balaǧa, az qamtylǧan otbasylarynan şyqqan balalarǧa tegın demalys ūiymdastyrylady. Lager turistık-ölketanu jäne ekskursiialyq, dene şynyqtyru-sauyqtyru qyzmetın de qosa atqarady» deidı ol.
Aita keterlıgı, 29 mamyr men 10 şılde aralyǧynda «Balalar qalasy» men Oquşylar sara­iyndaǧy «Jazǧy demalys akademiiasynda» demalys ūiymdas­tyrylady. Qūny – 20000 teŋge. 12 künnen tūratyn lagerdıŋ öte qyzyqty öterıne kümän joq. Sebebı onda oqytu, jüzu elementterı, syrǧanau, mūzdaǧy sabaqtar, lingvistika, bastauyş şahmat, interaktivtı park, beineleu önerı, teatr studiiasy syndy türlı üiırmeler qamtylǧan. Mahambet Ötemısūly atyndaǧy Oquşylar saraiynda jürgızıletın «Jazǧy şyǧarmaşylyq mektebı» jobasy da oquşylar üşın öte qyzyqty bolady. Ol da aqyly. Būl mektep te balalardyŋ şyǧarmaşylyq, tanymdyq jäne ziiatkerlık qabıletterın, bastamalary men müddelerın, ūiymdastyrylǧan demalys üşın qolaily jaǧdai jasai otyryp, qyzyqty demalys ūiymdastyrady.
Sonymen qatar, mektepter men qosymşa bılım beru ūiymdaryndaǧy ūiymdastyrylatyn türlı jūmyspen qamtu türlerı – kögaldandyru jäne jöndeu brigadalary mektep aumaqtaryn abattandyru boiynşa ziiatkerlık, şyǧarmaşylyq jäne tıldık üiırmeler, halyq­aralyq, respub­likalyq pändık olimpiadalar, şyǧarmaşylyq baiqaular men sporttyq jarys­tar ūiymdastyrylady.
Sondai-aq, ata-analar özderınıŋ jeke bastamasymen res­publikanyŋ är aimaqtary, şetel lagerlerınde balalarynyŋ jazǧy demalysyn ūiymdas­tyryp, jeke firmalardyŋ ūiymdastyruymen türlı tıl üirenu baǧdarlamalary boiynşa oquǧa jıberse, joǧary synyp oquşylaryn zaŋǧa säikes jeŋıl jūmysqa uaqytşa ornalastyra alady.
Jazǧy mausymda demalys­ty ūiymdastyru boiynşa ūsynylatyn qyzmetter sapasyn anyqtau maqsatynda M.Öte­mıs­ūly atyndaǧy Oquşylar saraiynda, Bılım basqarmasynyŋ saittarynda arnaiy jelıler ūiymdastyrylǧan.
Ata-analar men barlyq müddelı tūlǧalar bılım beru mekemelerındegı jazǧy demalys qyzmetı sapasy boiynşa ūsynystary men şaǧymdaryn joldai alady.

Güljan RAHMAN