El Täuelsızdıgınıŋ 30 jyldyǧyn merekeleu aiasynda Nūr-Sūltan qalasynyŋ äkımdıgı, Tılderdı damytu jäne arhiv ısı basqarmasy «Menıŋ tuym!» atty patriottyq şara ötkızdı.
Şara Qazaqstan Respublikasynyŋ Memlekettık Tuyn nasihattau, elorda tūrǧyndarynyŋ boiynda patriottyq sezım qalyptastyru maqsatynda ūiymdastyryldy. Aksiia barysynda Jastar saiasaty mäselelerı basqarmasy «Astana jastary» jastar resurstyq ortalyǧynyŋ erıktılerı Nūrsūltan Nazarbaev halyqaralyq äuejaiynda, vokzaldarda jäne basqa da oryndarda ornalasqan jolauşylardy tasymaldaityn kölık jürgızuşılerıne 3000 dana memlekettık jalauşa taratty.
– Şara täuelsızdıktıŋ torqaly toiy aiasynda «Tıl jäne rämız» degen ūranmen ötıp jatyr. Daiyndaǧan jalauşalardy eŋ bırınşı taksi jürgızuşılerıne ülestıremız. Öitkenı qalaǧa alǧaş aiaq basqan qonaqty kütıp alatyn da, tūrǧyndardyŋ jiı mınetını de osy kölıkter. Al qoǧamdyq kölıkten artylǧan jalauşalardy köşedegı halyqqa taratamyz. Keler jyly memlekettık rämızderımızge 30 jyl tolady. Sondyqtan būl aksiia älı de keŋ auqymda jalǧasyn tabady. Türıkter qyzyl bairaqtaryn üilerıne de, balkondaryna da ılıp qoiady. Bızde şyn patriot ekenımızdı osylai körsetuımız kerek. Biyl Prezidentımız memlekettık rämızderdı qoldanu aiasyn keŋeitu jaily arnaiy zaŋ qabyldaǧan edı. Sondyqtan kök bairaǧymyzdy köbırek körsetuımız kerek, – dedı Tılderdı damytu jäne arhiv ısı basqarmasynyŋ basşysy Säken Esırkep.
İgı şara ortalyq saiabaqtan bastau aldy. Erıktıler 30-ǧa juyq «Region» taksilerıne kök jalauşalardy zor senımmen tabystady.
– Aksiiaǧa qatysuǧa quana kelıstık. Öitkenı Memlekettık tu – elımızdıŋ tarihy jäne onyŋ bügını, halqymyzdyŋ bırlıgı men täuelsızdıgınıŋ nyşany. Sondyqtan kez kelgen qazaqstandyq Memlekettık tuymyzdy qūrmettep, törınen oryn beruı tiıs. Kompaniia jürgızuşılerı atalǧan şaraǧa şyn nietımen qatysuda, – dedı «Region» taksi kompaniiasynyŋ direktory Samat Qalymbetov.
