Президент Нұрсұлтан Назарбаев елімізді әлемнің дамыған 30 елінің қатарына қосу жолында бірегей істерге қадам басуда. Әсіресе, Қазақстанда білім беру мен ақпараттық технология салаларын жетілдіре түсу үшін іргелі шаралар қолға алынуда. Атқарылған шаруалар да нәтижесіз емес, бізден көрші елдер үлгі алатын дәрежеге де жетіп үлгердік. Айталық, жақында Тәжікстан өкілдері электрондық үкіметті құрудың қазақстандық тәжірибесін үйрену мақсатымен Астанаға келді. Бұл жөнінде газет тілшісіне «Ұлттық ақпараттық технологиялар» АҚ басқарма төрағасы Руслан Еңсебаев әңгімелеп берді.
– Алыстан ат терлетіп келген ағайынға алдымен қай жетістіктеріңізді көрсеттіңіздер?
– Қазақстандағы «электрондық үкімет» құру тәжірибесін үйрену үшін Астанаға Тәжікстан Республикасы мемлекеттік органдарының өкілдері келді. Тәжікстан делегациясымен кездесу аясында, «Ұлттық ақпараттық технологиялар» АҚ өкілдері «электрондық үкімет» порталы, электрондық құжат айналымы жүйесі, «Е-лицензиялау» жүйелері және «e-Learning» жұмысын жан-жақты көрсетті. Сондай-ақ Қазақстан Республикасының ақпараттандыру саласындағы бірыңғай техникалық саясатын іске асыру жөніндегі тәжірибемізбен бөлістік. Сонымен қатар, Астананың қонақтарына осындағы Халыққа қызмет көрсету орталықтарының ықпалдастырылған ақпараттық жүйесі қалай жұмыс істейтіндігі туралы түсіндірілді.
– Шетелдіктер пікірі жөнінде айта аласыз ба, мәселен, біздегі ақпараттық технология жүйесі олардың көңілінен шықты ма?
– Әлбетте, біздің тәжірибеміз, жұмыс жүйеміз оларға ұнады деп ойлаймын. Өйткені, Тәжікстан Республикасы Президенті жанындағы мемлекеттік басқару институтының ғылым және халықаралық қатынастар жөніндегі ректор орынбасары Акмалджон Абдухаликов қазақстандық ақпараттық технологияның қарқынды дамуына таңғалысын жасырмады. «Тәжікстанда Қазақстандағы сияқты көптеген е-үкімет қызметін қамтамасыз ететін заңнамалық және нормативтік-құқықтық құжаттар қабылданған, алайда оларды іске асыру механизмі әзірше дұрыс жолға қойылмаған. Қазақстан, бұл жөнінде айтарлықтай нәтижелерге жеткен екен. Біз де сіздердің тәжірибелеріңізді қабылдаймыз деп үміттенемін» деп ағынан жарылды ол.
– Мұндай шаралар алдағы уақытта да жалғасуы мүмкін бе?
– Егер біздің тәжірибемізді үйренгілері келіп, ұсыныс жасайтындар болса, әрдайым дайынбыз. «Ұлттық ақпараттық технологиялар» АҚ көрші елдерге электрондық үкіметті құруда және дамытуда әдістемелік көмек көрсетуден бас тартпайды.
Асхат РАЙҚҰЛ
