Елордада «ЭКСПО-2017» халықаралық көрмесі кезінде қылмыс көрсеткіші шамамен 22 пайызға төмендеген.
Үш ай ішінде ЭКСПО қалашығында 31 қылмыс тіркеліп, олардың барлығы әшкере болды. Көбісі көрме аумағына тыйым салынған заттарды алып кіру әрекетімен байланысты. Дегенмен көрме аумағының алдында полицейлер мұны анықтап, тосқауыл қойып отырған.Бір айта кетерлігі, 90 күннің ішінде қалта ұрлығы, алаяқтық, тонау мен айлакерлік секілді қылмыстар орын алған жоқ. Полиция қызметкерлері елордада қала тұрғындары мен қонақтарына ыңғайлы әрі қауіпсіз сезінуі үшін бар күшін жұмсады.
Шетелдік азаматтарға және астаналықтарға қатысты ауыр немесе аса ауыр қылмыстар орын алған жоқ. Осындай ауқымды шараны өткізу кезінде полиция қызметкерлері қоғамдық тәртіпті қамтамасыз етті.
Қалалық әкімдіктің бастамасымен көрме қарсаңында барлық мемлекеттік органдардың қатысуымен кең ауқымды «Құқықтық тәртіп» жедел алдын алу шарасы өткізілді. Оған мыңнан астам ҚР Ұлттық гвардияның полицейлері мен әскери қызметкері тартылды.
ЭКСПО көрмесін өткізу кезінде елорда тұрғындары мен қонақтары, оның ішінде шетелдіктер полицейлердің қызметіне көңілі толатындарын айтып, алғыстарын білдірген болатын. Мәселен, маусым айының соңында АҚШ азаматы Саша Мишель Гюто полицияға xабарласып, көмек сұраған. Ол такси көлігінде ноутбугын ұмытып кеткендігін айтқан. Тәртіп сақшылары шетелдік азаматты тасымалдаған жүргізушіні анықтап, жеке заттары бар сөмкені қайтарған.
Гүлдана ТАЛҒАТҚЫЗЫ
